މަޑަގަސްކަރައިގައި ކުރިއަށްދާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގެ ޓެނިސް ޓީމު އިވެންޓުގެ ސެމީ ފައިނަލުން ރާއްޖޭގެ ޓީމު ބަލިވެއްޖެއެވެ.
މިއަދު ކުރިއަށްދިޔަ ސެމީގައި ރާއްޖޭގެ ޓެނިސް ޓީމު ނުކުތީ މަޑަގަސްކަރައާ ދެކޮޅަށެވެ. މި މެޗުން ރާއްޖެ ބަލިވީ 2-0 ގެ ނަތީޖާއަކުންނެވެ.
އެގޮތުން ފިރިހެން ސިންގަލްސް މެޗުގައި ރާއްޖޭގެ ޤައުމީ ޗެމްޕިއަން މުޙައްމަދު ފާއިހް ފަޒީލް (ފާއީ) ވާދަކުރިއިރު، އެ މެޗުން ފާއީ ވަނީ ސީދާ ދެ ސެޓުން ބަލިވެފައެވެ. މެޗުގެ ސެޓުތައް ދިޔައީ 6-4 އަދި 6-2 އިންނެވެ.
އަދި ދެވަނައަށް ކުޅުނު އަންހެން ސިންގަލްސް މެޗުގައި ރާއްޖޭގެ ޓެނިސް ތަރި ނަބާ ނިޝާން ވާދަކުރިއިރު، އެ މެޗުންވެސް އޭނާ ވަނީ ސީދާ ދެ ސެޓުން ބަލިވެފައެވެ. މެޗުގެ ސެޓުތައް ދިޔައީ 6-0 އަދި 6-0 އިންނެވެ.
މި ނަތީޖާއާއެކު މާދަމާ ކުޅޭ ތިންވަނަ ހޮވާ މެޗުގައި ރާއްޖޭގެ ޓެނިސް ޓީމު ވާދަކުރަން ޖެހޭނީ މޮރިޝަސްއާ ދެކޮޅަށެވެ.