ހައިރައިސް އިއްސެ އެމްޑީޕީއަށް ސޮއިކޮށްފި

ބޯޓިން އެސޯސިއޭޝަންގެ ރައީސް، އިސްމާއިލް ޙަމީދު (ހައިރައިސް އިއްސެ) އެމްޑީޕީއަށް ސޮއިކޮށްފިއެވެ.

ސަރުކާރު ހިންގާ މައި ޕާޓީ އެމްޑީޕީއަށް ސޮއިކުރުމަށްފަހު އިސްމާޢީލް ޙަމީދުގެ ފޯމު ވަނީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙާ ޙަވާލުކުރައްވާފައެވެ.

އިސްމާޢީލް ޙަމީދު (އިއްސެ) ބުނީ އެމްޑީޕީއާއި ގުޅުނީ، ރައީސުލްޖުމްހޫރިއްއާ އިބްރާޙިމް މުޙައްމަދު ޞާލިޙަކީ، އެއްވެސް ބަޔަކު ބާކީ ކުރުމެއްނެތި، ހުރިހާ ޚިޔާލެއްގެ މީހުންވެސް ގޮވައިގެން އުޅުމުގެ ޤާބިލުކަން ހުރި ރައީސަކަށްވާތީކަމަށެވެ. އަދި ރައީސްވަނީ ކަންކަން ކުރުމަށް ރައްޔިތުން ހަޅޭލަވަން ނުޖެހި، ކަންކަމަށް ޙައްލު ގެނެސްދެއްވަން ދަންނަ ވެރިއެއްކަން ހާމަކޮށްދެއްވާފައި ކަމަށް އިއްސެ ބުންޏެވެ.

މީގެއިތުރުން ރާއްޖޭގެ އިޤްތިޞާދު ދެމެހެއްޓުމުގައިގެސް ރައީސް ވަނީ ނަމޫނާ ދައްކަވާފަައި ކަމަށް އިއްސެ ބުންޏެވެ. އެގޮތުން ކޯވިޑްގެ ޙާލަތުގައި ޢަމަލުކުރެއްވި ގޮތާއި، ފަތުރުވެރިކަމަށް އަލުން ރާއްޖެ ހުޅުވާލާ ދުނިޔޭގެ 1ވަނަ ޤައުމުގެ ގޮތުގައި ވިދިވިދިގެން 3 އަހަރު އޮތުމަކީވެސް ލިބުނު ބޮޑު ކާމިޔާބީއެއްކަމަށެވެ.

އެކި ދާއިރާތަކުން ގިނަ ފަރާތްތަކެއް ދަނީ، އެމްޑީޕީއާއި ގުޅެމުންނެވެ. އޭގެ ތެރޭގައި ސިޔާސީ، ދާއިރާއާއި އެކި ފަންނުތަކުގައި މަސައްކަތްކުރާ މީހުން ހިމެނެއެވެ.