ދެކުނުގެ އަތޮޅުތަކަށް ވައި ބާރު، ކަނޑު ދަތުރުކުރާ ފަރާތްތަކުން ސަމާލުވޭ

ދެކުނުގެ އަތޮޅުތަކަށް ވައި ގަދަވާނެ ކަމަށް ލަފާކުރެވޭތީ ކަނޑު ދަތުރުކުރާ ފަރާތްތަކުން ސަމާލުވުމަށް މޫސުމާ ބެހޭ ޤައުމީ އިދާރާއިން އިލްތިމާސްކޮށްފިއެވެ.

މިހާރު ރާއްޖެއަށް ކުރަމުން މިދަނީ ހުޅަނގު މޫސުމުގެ ވިއްސާރައެވެ. އެގޮތުން މިއަދާއި މާދަމާ ރާއްޖޭގެ އެކި ހިސާބުތަކަށް ވިއްސާރަކުރާނެ ކަމަށް އެއިދާރާއިން ލަފާކުރެއެވެ. މޫސުން ގޯސްވާނެ ކަމަށް ލަފާކުރެވޭތީ އެއިދާރާއިން ގެންދަނީ ހުދު ސަމާލުވެސް ނެރެމުންނެވެ. އެގޮތުން މިހާރުވެސް ކ.އަތޮޅުން ފެށިގެން ފ.އަތޮޅަށް ވަނީ ހުދު ސަމާލު ނެރެފައެވެ.

މޫސުމާއި ބެހޭ ޤައުމީ އިދާރާއިން ވިދާޅުވީ މާދަމާ މެންދުރުފަހުން ފެށިގެން ވާރޭ ވެހުން މަދުވާނެ ކަމަށެވެ. އެހެން ނަމަވެސް ބުރާސްފަތި ދުވަހާއި ހުކުރު ދުވަހުވެސް ވާރޭ ވެހޭނެ ކަމަށް ލަފާކުރެވޭ ކަމަށެވެ.

މިހާރު ކުރަމުންދާ ވިއްސާރައިގެ އަސަރު ރާއްޖޭގެ އެކި ހިސާބަށް ކުރާނެއެވެ. މޫސުމާބެހޭ ޤައުމީ އިދާރާއިން ބުނީ ދެކުނުގެ އަތޮޅުތަކަށް ވައި ބާރު ކަމަށެވެ. އެގޮތުން ކުރިއަށް އޮތް 24 ގަޑިއިރުތެރޭ ގަޑިއަކު 13 މޭލާއި 20 މޭލާއި ދެމެދުގެ ބާރު މިނުގައި ވައިޖެހޭނެ ކަމަށެވެ. އަދި މެދު ރާއްޖެތެރެއާއި އުތުރުގެ އަތޮޅުތަކަށް ގަޑިއަކު 5 މޭލާއި 15 މޭލާއި ދެމެދުގެ ބާރު މިނުގައި ވައިޖެހޭނެ ކަމަށެވެ. އަދި ވިލާގަނޑުގެތެރޭގައި ހުރިހާ ހިސާބަކަށްވެސް 40 މޭލަށް ވައި ގަދަވާނެކަމަށްވެސް އެއިދާރާއިން ލަފާކުރެއެވެ.

މިއަދާއި މާދަމާވެސް ބޯކޮށް ވާރެވެހި، ވައި ގަދަވާނެ ކަމަށް ލަފާކުރެވޭތީ ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށް އެ އިދާއިރާއިން ވަނީ އިލްތިމާސްކޮށްފައެވެ.

އަދި ކުރިއަށް އޮތް 24 ގަޑިއިރުތެރޭގައި ރާއްޖޭގެ ދެކުނާއި މެދު ރާއްޖެތެރޭގެ ސަރަހައްދުތަކަށް އުދައިގެ އަސަރުކުރުމަކީ އެކަށީގެންވާކަމެއް ކަމަށް މޫސުމާބެހޭ ޤައުމީ އިދާރާއިން ހާމަކުރެއެވެ.