ރައީސް ނަޝީދު މަޖިލީހުގެ ރައީސްކަމުން ވަކިކުރަން އަނެއްކާވެސް ހުށައަޅައިފި

ރައްޔިތުންގެ މަޖިލީހުގެ ރައީސް މުޙައްމަދު ނަޝިދުގެ އިތުބާރު ނެތްކަމުގެ މައްސަލަ އަލުން ހުށައެޅުމަށް އެމްޑީޕީން ނިންމައިފިއެވެ.

އެނގިފައިވާގޮތުގައި ރައީސް ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް ބޭނުންވާ ޢަދަދަށް މެންބަރުންގެ ސޮއި އެމްޑީޕީންމިހާރު ވަނީ ހަމަކޮށްފައެވެ. މަޖިލީހުގެ ރައީސް މަގާމުގައި ހުންނަވާ ބޭފުޅަކު އެ މަޤާމުން ވަކިކުރަން ހުށައެޅޭނީ ރައްޔިތުންގެ މަޖިލީހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެންބަރުންގެ ސޮޔާއިއެކުއެވެ. އެއީ މިހާރު މަޖިލީހުގައި ތިއްބަވާ 87 މެންބަރުންގެ ތެރެއިން 22 މެންބަރުންގެ ސޮޔެއެވެ. މަޖިލީހުގައި އެމްޑީޕީގެ 55 މެންބަރުން ތިއްބަވައެވެ.

ރައީސް ނަޝިދުގެ އިތުބާރު ނެތްކަމުގެ މައްސަލަ އެމްޑީޕީން މީގެ ކުރިންވެސް ހުށައެޅިއެވެ. ނަމަވެސް މަޖިލީހުގެ ރައީސްއާއި ނާއިބު ރައީސްގެ އިތުބާރު ނެތްކަމުގެ މައްސަލަ އެއް ވަގުތެއްގައި ވައްދާފައި އޮތުމުން އެ މައްސަލަ އެޖެންޑާނުކޮށް ބޭއްވުމަށްފަހު، އެ މައްސަލަ ފަހުން ވަނީ އަނބުރާ ނަންގަވާފައެވެ.

ރައީސް ނަޝީދަކީ ދަ ޑިމޮކްރެޓްސްގެ މެންބަރެކެވެ. އެމްޑީޕީން ރައީސް ނަޝީދުގެ އިތުބާރު ނެތްކަމުގެ މައްސަލަ ހުށައެޅުއްވީ، އެޕާޓީގެ އަޣްލަބިއްޔަތު މަޖިލީހުގައި އޮވެ، މަޖިލީހުގެ ރައީސްގެ މަޤާމު އެޕާޓީއަށް މުހިންމުވާތީކަމަށް އެމްޑީޕީގެ ބައެއް މެންބަރުން ވިދާޅުވިއެވެ.

މީގެ ކުރިން ހުށައެޅި ރައީސް ނަޝީދުގެ އިތުބާރު ނެތްކަމުގެ މައްސަލަ އަނބުރާ ނެގީ، ރިޔާސީ އިންތިޚާބުގެ ފުރަތަމަ ބުރަށްފަހު ދެވަނަ ބުރުގައި ދަ ޑިމޮކްރެޓްސްއިން އެމްޑީޕީއަށް ތާއީދު ކުރާނެކަމަށް ބަލައެވެ. ނަމަވެސް ޑިމޮކްރެޓްސްއިން ނިންމީ އެއްވެސް ކެންޑިޑޭޓަށް ތާޢީދު ނުކުރުމަށެވެ.