އަދުހަމް އިސްތިއުފާ ދެއްވުމުން، އެޗްއާރުސީއެމްގެ މެންބަރުކަމަށް ހުޅުވާލައިފި

ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރުސީއެމްގެ މެންބަރުކަމުގެ މަޤާމަށް ކުރިމަތިލުމުގެ ފުރުޞަތު ހުޅުވާލައިފިއެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ އެޗްއާރްސީއެމްގެ މެންބަރަކު އިސްތިޢުފާ ހުށަހަޅުއްވާފައިވާތީ، ހުސްވެފައިވާ މަގާމަށް މެންބަރަކު ޢައްޔަންކުރެއްވުމަށްޓަކައި އެމަގާމަށް ކުރިމަތިލުމުގެ ފުރުޞަތު، ހުޅުވާލާފައިވާކަމަށެވެ. މައުލޫމާތު ލިބިފައިވާގޮތުގައި އިސްތިއުފާދެއްވާފައިވަނީ އެޗްއާރުސީއެމްގެ ނައިބް ރައީސް ޑރ. އަޙްމަދު އަދުހަމަ އަބްދުﷲ އެވެ.

ހިއުމަން ރައިޓްސް ކޮމިޝަނުގެ މެންބަރުކަމަށް ހުޅުވާލާފައިވާ ފުރުޞަތުގައި، އެކަމަށް އެދި ހުށައަޅާ ފޯމު ބަލައިގަތުމަށް ހަމަޖެހިފައިވަނީ، މިމަހުގެ 15 އަދި 16 ވަނަ ދުވަހު ހެނދުނު 09:30 އިން މެންދުރުފަހު 12:30 އަށް، ރައީސުލްޖުމްހޫރިއްޔާގެ އޮފީހުންނެވެ. އެޗްއާރުސީއެމްގެ މެންބަރުކަމަށް ކުރިމަތިލުމަށް އެދޭ ފޯމު ރައީސުލްޖުމްހޫރިއްޔާގެ އޮފީހުގެ ވެބްސައިޓުން ލިބޭންހުންނާނެއެވެ.

އެޗްއާރުސީއެމް އެކުލެވިގެންވަނީ 5 މެމްބަރުންގެ މައްޗަށެވެ. މިހާރު އެޗްއާރުސީއެމްގެ މެންބަރުކަމުގެ މަޤާމުގައި ތިއްބެވީ ރައީސް މަރްޔަމް މުނާއާއި، މެންބަރު އާމިނަތު ޝިފާޢަތު ޢަބްދުއްރައްޒާޤާއި، މެންބަރު ސަމާއު އަހުމަދު ނަޖީބުގެ އިތުރުން މެންބަރު މުއުމިނާ ވަޙީދެވެ.