އަންނަ އަހަރަށް ލަފާކުރާ ބަޖެޓް ފެށޭ ހަފްތާތެރޭ މަޖިލީހަށް ހުށައަޅާނެ: ސަރުވަޝް

އަންނަ އަހަރަށް ލަފާކުރާ ދައުލަތުގެ ބަޖެޓް ފެށޭ ހަފްތާތެރޭގައި ރައްޔިތުންގެ މަޖިލީހަށް ހުށައަޅާނެ ކަމަށް ފިނޭންސް މިނިސްޓްރީން ހާމަކުރައްވައިފިއެވެ.

ފިނޭންސް މިނިސްޓްރީގެ ފައިނޭންޝަލް ބަޖެޓް އެގްޒެކެޓިވް އަޙްމަދު ސަރުވަޝް ވިދާޅުވީ އަންނަ ހަފްތާތެރޭގައި މަޖިލީހަށް ބަޖެޓު ހުށަހެޅުމަށް ތައްޔާރުވަމުންދާ ކަމަށާއި، ބަޖެޓުގެ ޖުމްލަ އަދަދު ހާމަކުރައްވާނީ މަޖިލީހަށް ބަޖެޓު ހުށައަޅުއްވަމުން ފިނޭންސް މިނިސްޓަރ ކަމަށެވެ.

ފިނޭންސް މިނިސްޓްރީން މީގެކުރިންވެސް ވަނީ އަންނަ އަހަރަށް ހުށަހަޅާ ބަޖެޓް ޤާނޫނުގައި ބުނާ ސުންގަޑީގެ ކުރިން ހުށަހަޅުއްވާނެ ކަމަށް ވިދާޅުވެފައެވެ. ކޮންމެ އަހަރަކުވެސް އޮކްޓޯބަރުމަސް ނިމުމުގެ ކުރިން ކުރިއަށްއޮތް އަހަރަށް ލަފާކުރާ ބަޖެޓް މަޖިލީހަށް ހުށަހަޅައެވެ. އެހެންކަމުން މި މަސް ނިމުމުގެ ކުރިން ބަޖެޓް މަޖިލީހަށް ހުށަހަޅަންޖެހެއެވެ.

ފިނޭންސް މިނިސްޓްރީގެ ފިސްކަލް ސްޓްރެޓެޖީ ރިޕޯޓްގައިވާގޮތުން ބޭސްލައިން ޚަރަދާއ،ި ޚަރަދު ކުޑަކުރުމަށް އަޅާ ފިޔަވަޅުތަކުން ސަލާމަތްކުރެވޭނެ ޢަދަދުތަކާއ،ި ބަޖެޓުގައި ހިމަނާ އައު މަޝްރޫޢުތަކާއި ޕްރޮގްރާމްތަކަށް ބަލައި 2024 ވަނަ އަހަރުގެ ދައުލަތުގެ ޖުމުލަ ބަޖެޓުގެ އަންދާޒާއަކީ 50.6 ބިލިއަން ރުފިޔާއެވެ. މިއީ މިއަހަރު ބަޖެޓު ހުންނާނެ ކަމަށް ލަފާކުރެވޭ މިންވަރާއި އަޅާބަލާއިރު 5.3 އިންސައްތަ އިތުރު އަދަދެއްކަމަށްވެސް އެރިޕޯޓްގައި ވަނީ ބުނެފައެވެ.

އަންނަ އަހަރުގެ ބަޖެޓު އެކުލަވައިލުމުގެ މަސައްކަތް ކުރިއަށްދަނީ އިންތިޚާބީ ރައީސް ޑރ. މުހައްމަދު މުއިއްޒު އައްޔަންކުރައްވާފައިވާ ކޮމިޓީއަކާއި ގުޅިގެން ކަމަށް ފިނޭންސް މިނިސްޓްރީން ވިދާޅުވެއެވެ.