އަގު ބޮޑުކުރިފަހުން މަސްވެރިންނަށް 91.7 މިލިއަން ރުފިޔާ ދޫކޮށްފި
-
މިފްކޯއިންވަނީ މަސްގަންނަ އަގު 25ރ އަށް ބޮޑުކޮށްފަ
-
މިހާތަނަށް 54502 ޓަނުގެ މަސް ކިރުވާފައިވޭ
-
މަސްވެރިންނަށް ފައިސާ ދޫކުރުމުގައި ދަތިތަކެއް އެބަހުރި
މިފްކޯއިން މަސް ގަންނަ އަގު ބޮޑުކުރިފަހުން މިހާތަނަށް 91.7 މިލިއަނަށް ވުރެ ގިނަ ރުފިޔާ މަސްވެރިންނަށް ދޫކޮށްފައިވާ ކަމަށް މޯލްޑިވްސް އިންޑަސްޓްރިއަލް ޕިޝަރީޒް ކޮންޕެނީ ލިމިޓެޑް، މިފްކޯއިން ހާމަކޮށްފިއެވެ.
މިފްކޯއިން މަސް ގަންނަ އަގު ބޮޑުކުރީ މިދިޔަ ސެޕްޓެމްބަރުމަހުގެ 16ވަނަ ދުވަހުއެވެ. އެގޮތުން 17 ރުފިޔާއަށް ގަންނަމުންދިޔަ މަސް ކިލޯއެއްގެ އަގު ވަނީ 25 ރުފިޔާއަށް ބޮޑުކޮށްފައެވެ.
މިފްކޯއިން ބުނީ މަސް ކިލޯއެއްގެ އަގު 25 ރުފިޔާއަށް ބޮޑުކުރިފަހުން މިހާތަނަށް 9401 މެޓްރިކް ޓަނުގެ މަސް އެކުންފުންޏަށް ކިރުވާފައިވާކަމަށެވެ. އަދި މިއަހަރުގެ މިހާތަނަށް 54502 ޓަނުގެ މަސް ކިރުވާފައިވާކަމަށްވެސް މިފްކޯއިން ބުންޏެވެ.
މަސް ގަންނަ އަގު ބޮޑުކުރިފަހުން މިފްކޯއިން މަސްވެރިންނަށް 91.7 މިލިއަން ރުފިޔާ ދޫކޮށްފައިވާކަމަށާއި، މިއަހަރުގެ މިހާތަނަށް މަސްވެރިންނަށް 965 މިލިއަން ރުފިޔާ ދޫކޮށްފައިވާކަމަށްވެސް މިފްކޯއިން ބުންޏެވެ.
މަސްވެރިންގެ އަތުން ގަންނަމަހުގެ އަދަދު އިތުރުވެފައިވީ ނަމަވެސް މިފްކޯއަށްވަނީ މަސްވެރިންނަށް ފައިސާ ދިނުމުގައި ގޮންޖެހުންތަކާއި ކުރިމަތިލާން ޖެހިފައެވެ.
މިކަމުގެ އެއް ސަބަބަކީ މިފްކޯއަށް ގެއްލުމުގައި މަސް ގަންނަން ޖެހުމެވެ. އަދި ފައިސާ ހޯދުމަށް ސަރުކާރަށް ބަރޯސާވާނެ ޖެހުމެވެ. މިފްކޯއިން ބުނީ، މަސްވެރިންނަށް ފައިސާ ދޫކުރުން ލަސްވެފައިވަނީ މިފްކޯއަށްވާ ގެއްލުން ފޫބެއްދުމަށް ފިނޭންސް މިނިސްޓްރީއިން މިއަހަރަށް ބަޖެޓުގައި ހަމަޖައްސާފައިވާ ފައިސާ ލިބުމުގައި ދަތިތަކެއް ކުރިމަތިވެފައިވުން ކަމަށެވެ. އަދި މަސްގަންނަ އަގަށް އައި ބަދަލާއިއެކު ފިނޭންސް މިނިސްޓްރީން ހޯދަންޖެހޭ ފައިސާގެ އަދަދު ނިސްބަތުން އިތުރުވެ، އެ ފައިސާ މިފްކޯއަށް ލިބުމުގައި ދަތިތަކެއް އެބަހުރިކަމަށްވެސް މިފްކޯއިން ބުންޏެވެ.
މިފްކޯއަކީ ފައިދާވާ ކުންފުންޏަކަށް ހެދުމަށާއި، މަސްވެރިކަމުގެ ސީޒަންގައި މަސް ގަތުމުގައި ހުރި ގޮންޖެހުންތަކަށް ހައްލެއް ހޯދުމަށް އެކުންފުނީގެ ކާރުޚާނާތައް އަޕްގްރޭޑުކުރުމުގެ މަސައްކަތް އެކުންފުނިން ދަނީ ކުރަމުންނެވެ. އެގޮތުން މި މަސައްކަތް ނިމުމުން މިފްކޯގެ ކޯލްޑް ސްޓޯރޭޖް ކެޕޭސިޓީ މިހާރަށްވުރެ %48 އިތުރުވެގެން ދާނެއެވެ. އަދި ފްރީޒިންގ ކެޕޭސިޓީ %37 އިތުރުވެގެންދާނެކަން ސަރުކާރުން ހާމަކުރެއެވެ. އަދި މަސްގަތުމުގެ ކެޕޭސިޓީ އިތުރުކުރުމުގެ ގޮތުން މަސް ކިރަން މިފްކޯއިން އިތުރު 3 ބޯޓުވެސް ދާދިފަހުން ވަނީ ގަނެފައެވެ.