ބަޖެޓް 2024: ސަބްސިޑީއަށް ކުރާ ޚަރަދު ދަށްކުރުމަށް ބަދަލުތަކެއް

އަންނަ އަހަރުގެ މެދުތެރޭގައި އިންޑައިރެކްޓް ސަބްސިޑީ ރިފޯމް ތަންފީޒުކުރުމުން، ސަބްސިޑީއަށް ކުރާ ޚަރަދު ދެބައިކުޅަ އެއްބައި ދަށްވާނެކަމަށް ފިނޭންސް މިނިސްޓްރީން ހާމަކޮށްފިއެވެ.

ފިނޭންސް މިނިސްޓްރީން މިކަން ހާމަކޮށްފައިވަނީ އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށައަޅާފައިވާ އަންނަ އަހަރަށް ލަފާކުރާ ބަޖެޓުގައެވެ. އަންނަ އަހަރަށް ހުށައަޅާފައިވަނީ 49.5 ބިލިއަން ރުފިޔާގެ ބަޖެޓެކެވެ. އަންނަ އަހަރުގެ ބަޖެޓުގައި ޚަރަދުތައް ކުޑަކުރުމަށް ގިނަ ކަންތައްތަކެއް ވަނީ ހިމަނާފައެވެ.

އެގޮތުން ޚަރަދު ކުޑަކުރުމަށްޓަކައި ސަބްސިޑީ ރިފޯމްކުރުމަށް ސަރުކާރުން ވަނީ ނިންމަވާފައެވެ. އަންނަ އަހަރުގެ ބަޖެޓުގައި އިންޑައިރެކްޓް ސަބްސިޑީގެ ޚަރަދަކީ އަންނަ އަހަރާއި މެދު ރާސްތާގައި އެންމެ ބޮޑު ބަދަލެއް އަންނާނެކަމަށް ބެލެވޭ ޚަރަދެވެ. ފިސްކަލް ޕޮލިސީ ޗެޕްޓަރުގައި ބަޔާންކޮށްފައިވާ ފަދައިން، ފިސްކަލް ދެމެހެއްޓެނިވިކަން ޤާއިމުކުރުމަށް، ޚަރަދު ކުޑަކުރުމުގެ ސިޔާސަތުގެ ތެރެއިން އިންޑައިރެކްޓް ސަބްސިޑީ ރިފޯމްކުރުމަށް ވަނީ ރާވާފައެވެ.

މިގޮތުން އަންނަ އަހަރުގެ ބަޖެޓުގައި މިބައިގެ ޚަރަދު ހިމަނާފައިވަނީ، މިހާރު ސަރުކާރުން ދެމެދުންދާ އިންޑައިރެކްޓް ސަބްސިޑީތަކުގެ ތެރެއިން ކަރަންޓު ސަބްސިޑީ، ފިއުލް ސަބްސިޑީ، ކާޑު ސަބްސިޑީ އަދި ނަރުދަމާގެ ސަބްސިޑީ ނިޒާމު ބަދަލުކޮށް، ޑައިރެކްޓް ޓްރާންސްފަރ ނިޒާމަކަށް ބަދަލުކުރުމުން، ޙަރަދު ބަދަލުވާނެގޮތަށް ރިޢާޔަތްކޮށްފައެވެ.

ވޭތުވެދިޔަ އަހަރާ އަޅާބަލާއިރު، އިންޑައިރެކްޓް ސަބްސިޑީގެ ތެރެއިން މިއަހަރު ޚަރަދު އިތުރުވެފައިވަނީ ކަރަންޓު ސަބްސިޑީ، ފިއުލް ސަބްސިޑީ އަދި މަސްވެރިންނަށް ދޭ ސަބްސިޑީއަށެވެ.

ކަރަންޓު ސަބްސިޑީގެ ޙަރަދު އިތުރުވެފައިވަނީ ކަރަންޓު ސަބްސިޑީގެ ގޮތުގައި ފެނަކައިގެ ކޭޝްފްލޯ މެނޭޖްކުރުމަށް އެޑްވާންސްކޮށް ސަބްސިޑީ ދިނުމުންނެވެ. އަދި ފިއުލް ސަބްސިޑީގެ ޚަރަދު އިތުރުވެފައި ވަނީ މިއަހަރުގެ ތެރޭގައި ތަންފީޒުކުރުމަށް ރޭވުނު ފިއުލް ސަބްސިޑީ ރިފޯމް ތަންފީޒުނުކުރެވުމުން، މިއަހަރުގެ ތެރޭގައި ލިބޭނެކަމަށް އަންދާޒާކުރި ސޭވިންގ ރިއަލައިޒްނުވުމުންކަން ފިނޭންސް މިނިސްޓްރީން ފާހަގަކުރައްވައެވެ.

އަންނަ އަހަރުގެ މެދުތެރޭގައި އިންޑައިރެކްޓް ސަބްސިޑީ ރިފޯމް ތަންފީޒުކުރުމުން، ކަރަންޓް ސަބްސިޑީ، ފިއުލް ސަބްސިޑީ، ކާޑު ސަބްސިޑީ އަދި ނަރުދަމާ ސަބްސިޑީ ޚަރަދު އަންނަ އަހަރު ގާތްގަނޑަކަށް ދެބައިކުޅަ އެއްބައި ދަށްވުމަށްފަހު، 2025 ވަނަ އަހަރުން ފެށިގެން އިންޑައިރެކްޓް ސަބްސިޑީގެ ގޮތުގައި މި ބައިގެ ޚަރަދު ބޮޑުތަނުން ކުޑަވާނެކަމަށް ބަޖެޓުގައި ވަނީ ލަފާކޮށްފައެވެ.
ފިނޭންސް މިނިސްޓްރީން ވިދާޅުވީ، 2025 ވަނަ އަހަރުން ފެށިގެން ފިއުލް ސަބްސިޑީގެ ގޮތުގައި ދެވޭނީ މިހާރު މަސްވެރިންނަށް ދެމުންދާ ފިއުލް ސަބްސިޑީ އެކަނިކަމަށެވެ

2025 ވަނަ އަހަރުން ފެށިގެން ސަރުކާރުގެ ބަޖެޓުން ދޭން ރާވާފައިވާ އިންޑައިރެކްޓް ސަބްސިޑީތަކަކީ ޓްރާންސްޕޯޓް ސަބްސިޑީއާއި، މަސްވެރިންނަށް ދޭ ސަބްސިޑީއާއި، ކުނި މެނޭޖްކުރުމަށް ދޭ ސަބްސިޑީއެވެ.

މީގެތެރެއިން ރާއްޖެ ޓްރާންސްޕޯޓް ލިންކް، އާރް.ޓީ.އެލްގެ ޚިދުމަތް ފުޅާވެގެން ދިޔުމުން އަންނަ އަހަރާއި 2025 ވަނަ އަހަރު ޓްރާންސްޕޯޓް ސަބްސިޑީގެ ޚަރަދު އިތުރުވާނެކަމަށް ވަނީ ލަފާކޮށްފައެވެ. އަދި މަސްވެރިންގެ އަތުން މަސް ގަންނަ އަގު މަތިކުރުމުން، މަސްވެރިންނަށް ދޭ ސަބްސިޑީ އަންނަ އަހަރު އިތުރުވާނެ ކަމަށް ފިނޭންސް މިނިސްޓްރީން ލަފާކުރައްވައެވެ.

ނަމަވެސް މަހުގެ ޕްރޮސެސިންގ އެފިޝަންޓްކޮށް މަހުގެ ވެލިއު އެޑިޝަން އިތުރުކޮށްގެން މި ސަބްސިޑީއަށް ހިނގާ ޚަރަދު މެދުރާސްތާގައި ކުޑަކުރެވޭނެކަމަށް ބެލެވެއެވެ. މީގެއިތުރުން ހައުސިންގ ސަބްސިޑީގެ ގޮތުގައި 177.4 މިލިއަން ރުފިޔާ އަންނަ އަހަރުގެ ބަޖެޓުގައި ވަނީ ހިމަނާފައެވެ. މިއީ 5 އަހަރު ދުވަހުގެ މުއްދަތަށް ހިޔާ ފްލެޓުގެ ކުލި ކުޑަކޮށްދިނުމުން ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީގެ ކޭޝްފްލޯ މެނޭޖްކުރުމަށް ދެވޭ ސަބްސިޑީއެކެވެ.

މެދުރާސްތާގައި ކުންފުނީގެ އާމްދަނީ އިތުރުވެ، ކޭޝްފްލޯ މެނޭޖްކުރުމަށް ދަތިނުވާނެކަމަށް ލަފާކޮށް، މި ސަބްސިޑީ ދިނުމަށް ހަމަޖެހިފައިވަނީ ވަން އޮފް ސަބްސިޑީއެއްގެ ގޮތުގައި އަންނަ އަހަރު އެކަންޏެވެ.