އިޤްތިޞާދީ މައި ތަނބު، ވީއައިއޭ ނިންމަން މުޢިއްޒުގެ ދަތުރުފުޅުން 1.2 ބިލިއަން ރުފިޔާގެ އެހީއެއް

ވެލާނާ އިންޓަރނޭޝަނަލް އެއަރޕޯޓު، ވީއައިއޭ ތަރައްޤީކުރުމުގެ މަޝްރޫޢަށް ބޭނުންވާ ފައިސާ އަބޫދާބީ ފަންޑުން މިހާރު ހަމަޖެހިފައިވާ ކަމަށް އިންތިޚާބީ ރައީސުލްޖުމްހޫރިއްޔާގެ އޮފީހުން ހާމަކުރައްވައިފިއެވެ.

އަންނަ އަހަރުތެރޭ ވީއައިއޭގެ އައު ޓާމިނަލްގެ މަސައްކަތް ނިންމާ ބޭނުންކުރަން ފެށުމަކީ އިންތިހާބީ ރައީސް ޑރ. މުޙައްމަދު މުޢިއްޒުގެ އަމާޒެކެވެ. އަދި 2026ވަނަ އަހަރުތެރޭ ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުމުގެ މަޝްރޫޢު އެއްކޮށް ނިންމާ ބޭނުންކުރުމަށް ކުރަންޖެހޭ މަސައްކަތްތައް ކުރައްވާނެ ކަމަށްވެސް ޑރ. މުޢިއްޒުވަނީ މީގެކުރިން ވިދާޅުވެފައެވެ.

އިންތިޚާބީ ރައީސްގެ އޮފީހުން ބޭއްވި ނޫސްވެރިންގެ ބައްދަލުވުމުގައި އިންތިގާލީ މަރުހަލާގެ ތަރުޖަމާން މުޙައްމަދު ފިރުޒުލް ވިދާޅުވީ، އިންތިހާބީ ރައީސް ޑރ. މުޙައްމަދު މުޢިއްޒު މިމަހުގެ6އިން 7 އަކަށް ޔުނައިޓެޑް ޢަރަބް އެމިރޭޓްސް، ޔޫއޭއީއަށް ކުރެއްވި ދަތުރުފުޅުގެތެރެއިން މުހިންމު ބައްދަލުވުންތަކެއް ބާއްވާފައިވާ ކަމަށެވެ.

އެގޮތުން އިންތިޚާބީ ރައީސާއި، އަބޫދާބީ ފަންޑުގެ ބޭފުޅުންނާއިއެކު ބޭއްވެވި ބައްދަލުވުމުގެ ތެރެއިން ރާއްޖޭގެ އިޤްތިޞާދުގެ މައި ތަނބުކަމަށްވާ ވެލާނާ އިންޓަރނޭޝަނަލް އެއަރޕޯޓް، ވީއައިއޭ ތަރައްްކުރުމުގެ މަޝްރޫޢުއަށް ބޭނުންވާ ފައިސާ ހަމަޖެހިފައިވާކަމަށެވެ. ފިރުޒުލް ވަނީ ވީއައިއޭގެ މަސައްކަތް ނުނިމި ގިނަ ދުވަސް ވެގެން ދިޔުމުގެ ސަބަބުންނާއި، އެ މަޝްރޫޢުގެ ޑިޒައިންތަކަށް ގެނެސްފައިވާ ބަދަލުތަކުގެ ސަބަބުން މަޝްރޫޢުގެ އަގު އެތައް ގުނައަކަށް އިތުރުވެގެންގޮސްފައިވާކަމަށެވެ. އެހެންކަމުން އިންތިޚާބީ ރައީސްގެ ދަތުރުފުޅުން ހަމަޖެހުނު އެހީއާއެކު އެ މަޝްރޫޢު އަވަހަށް ނިންމުމަށް މަސައްކަތްކުރައްވާނެކަމަށް ފިރުޒުލް ވިދާޅުވިއެވެ.

"އެމަޝްރޫޢުއަށް ކުރިން ކަނޑައެޅި އަގަށްވުރެ އެތައް ގުނައެއް އަގު އިތުރުވެފައިވަނީ، އެ އިތުރުވި އަގުގެތެރެއިން މަސައްކަތް ނިންމުމަށް އިތުރަށް 79.80 މިލިއަން ޑޮލަރު ހޯދަން ޖެހިފައިވަނީ،" ފުރުޒުން ވިދާޅުވިއެވެ.

ފިރުޒުލް ވިދާޅުވީ ޔޫއޭއީއަށް އިންތިހާބީ ރައީސް ކުރެއްވި ދަތުރުފުޅުގެތެރެއިން ލިބިގެންދިޔަ ފުރުސަތެއްގައި ތެރޭގައި ކުރެވުނު މަޝްވަރާާތަކުގައި، އަބޫދާބީ ފަންޑުން މި ފައިސާ ހަމަޖެހިގެންދާނެ ކަމުގެ ޔަޤީންކަން ލިބިފައިވާ ކަމަށެވެ.

"އަމިއްލަ ދަތުރުފުޅުގެތެރެއިން، ކުރެވުނު މަޝްވަރާތަކުން، ޔޫއޭއީ ސަރުކާރުން އަބޫދާބީ ފަންޑުގައި އެދުމުން، އެ މަޝްރޫޢަށް 80 މިލިއަން ޑޮލަރު ނުވަތަ 1.2 ބިލިއަން ރުފިޔާ ދެއްވާނެ ކަމުގެ ޔަޤީންކަން ދެއްވާފައިވޭ،" ފިރުޒުލް ވިދާޅުވިއެވެ.

ފިރުޒުލް ވިދާޅުވީ އަބޫދާބީ ފަންޑުން ދިނުމަށް ނިންމާފައިވާ މި ފައިސާ އެކު އެއަރޕޯޓު މަޝްރޫޢު ނިންމުމަށް ބޭނުންވާ ހުރިހާ ފައިސާއެއް ހަމަޖެހިގެންދިޔައީ ކަމަށެވެ.

މީގެއިތުރުން ރާއްޖޭގެ ބަޖެޓު ސަޕޯޓަށާއި، ރާއްޖޭގެ އިޖުތިމާއީ އަދި އިޤްތިޞާދީ އެކި މަޝްރޫޢުތަކަށް އެހީތެރިކަން ދެއްވާނެ ކަމަށް ވިދާޅުވެފައިވާކަމަށްވެސް ފިރުޒުލް ވިދާޅުވިއެވެ. ވެލާނާ އިންޓަރނޭޝަނަލް އެއާރޕޯޓް ތަރައްޤީކުރުމުގެ މަޝްރޫޢު ފަށާފައިވަނީ 2016 ވަނަ އަހަރުގެ އޭޕްރީލް މަހުގެ 6 ވަނަ ދުވަހުއެވެ. އަދި އައު ޓަރމިނަލްގެ މަސައްކަތް ސަޢޫދީ އަރަބިއްޔާގެ، ސަޢުދީ ބިން ލާދިން ގްރޫޕާއި ހަވާލުކޮށްފައިވަނީ 2016 ވަނަ އަހަރުގެ މެއި މަހުގެ 22 ވަނަ ދުވަހުއެވެ.

ވީއައިއޭގެ އައު ޓަރމިނަލަކީ އަހަރަކު 7 މިލިއަން ފަސިންޖަރުންނަށް ޚިދުމަތްދެވޭ ފެންވަރަށް ތަރައްޤީކުރާ ޓަރމިނަލެކެވެ. މި ޓަރމިނަލަކީ 78 ހާސް އަކަ މީޓަރުގެ ޖާގައިގެ ޓަރމިނަލެކެވެ.

އައު ފަސިންޖަރ ޓާރމިނަލް ތަރައްޤީކުރެވިގެންދާނީ އެންމެފަހުގެ ޒަމާނީ ވަޞީލަތްތަކާއެކުއެވެ. އެގޮތުން އެއިރޯ ބޯޑިން ބްރިޖްތަކާއި، އެންމެ ފަހުގެ ޒަމާނީ ބެގޭޖް ހޭންޑްލިން ސިސްޓަމްތައް ޤާއިމްކުރުމަށް ވަނީ ހަމަޖެހިފައެވެ. އައު ޓާރމިނަލް އިމާރާތުގެ ސަބަބުން މިހާރު ހުރި ޓަރމިނަލަށް ދިމާވެފައިވާ ޖާގައިގެ ދަތިކަން ހައްލުވެ، އެފްއެންބީގެ ގިނަ އައުޓްލެޓްތަކާއި، ރީޓެއިލް ސްޕޭސްތަކާއި، ލައުންޖްތަކާއި އެހެނިހެން ޚިދުމަތްތައް މިތަނުގައި ޤާއިމުކުރެވިގެންދާނެއެވެ.