ރާއްޖެއަކީ ކުޑަ ޤައުމެއް ނަމަވެސް ފަލަސްޠީނުގެ ހައްޤުގައި ކުރަނީ ބޮޑެތި މަސައްކަތްތަކެއް: ސަފީރު

ފަލަސްޠީނުގެ ރައްޔިތުންނަށް ދުއާކުރުން ހުއްޓާނުލުމަށާއި، އެހީތެރިކަން ފޯރުކޮށްދިނުމުގައި ދެމިއޮތުމަށް ފަލަސްޠީނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަލީދު އަބޫ ޢަލީ އެދިވަޑައިގެންފިއެވެ.

ޔަހޫދީން ފަލަސްޠީނުގައި ހިނގަމުންދާ ލާއިންސާނީ ޢަމަލުތަކާއި ގުޅޭގޮތުން ޕީއެސްއެމް ނިއުސްއަށް ދެއްވި ޚާއްސަ އިންޓަރވިއުއެއްގައި ފަލަސްޠީނުން ރާއްޖެއަށް ކަނޑައަޅުއްވާފައި ހުންނަވާ ނޮން-ރެޒިޑެންޓް ސަފީރު ވަލީދު އަބޫ ޢަލީވަނީ މިފަދަ ހުރިހާ ދަނޑިވަޅެއްގައި ދިވެހި ސަރުކާރާއި ރައްޔިތުން ފަލަސްޠީނާއެކު ސާބިތުކަމާއެކު އޮންނަ އޮތުން ފާހަގަކުރައްވާ ޝުކުރުއަދާކުރައްވާފައެވެ. އަދި ފަލަސްތީނު މިނިވަންވާ ދުވަހަކުން، ދިވެހިން މި ބާއްވާ ގާތްކަން އެޤައުމުން ބަލައިގަނެ، ދިވެހިންނަށް އޤައުމުގެ ވެރިވަރަށް ގުދުސްއިން މަރުހަބާ ކިޔާނެކަމަށް ފަލަސްޠީނު ސަފީރު ވިދާޅުވިއެވެ.

"ފަލަސްތީނުގެ ރައްޔިތުން މަތިން ހަދާން ނައްތާނުލައްވާ، މިހާރުވެސް މި ކުރާގޮތަށް ދުއާ ކުރަމުންދޭ. އަދި އެހީތެރިކަން ފޯރުކޮށްދެމުން ދިޔުމަށް އެދެން. ފަލަސްތީނަށް ވެދޭ އެހީތެރިކަން އަނބުރާ އަދާކުރަން ބޭނުން. މިނިވަންވާ ދުވަހަކުން ވެރިރަށް ގުދުސްއިން ދިވެހިންނަށް މަރުހަބާ ކިޔާނަން." ސަފީރު ވިދާޅުވިއެވެ.

ސަފީރު ވިދާޅުވީ ރާއްޖެއަކީ ކުޑަ ޤައުމެއް ނަމަވެސް މި ސަރަހައްދުގައި ރާއްޖެއަކީ ބަސްވިކޭ ޤައުމެއް ކަމަށެވެ. އަދި ބައިނަލްއަޤްވާމީ ފޯރަމްތަކުގައި ރާއްޖެއިން ފަލަސްތީނުގެ ހައްޤުގައި ދައްކަމުންދާ ވާހަކަތައްވެސް ސަފީރުވަނީ ފާހަގަކުރައްވާ ސަފީރު ޝުކުރު އަދާކުރައްވާފައެވެ.

"އޯއައިސީ އަދި ޔޫއެންގައި ފަލަސްތީނުގެ ހައްޤުގައި ފޮރިން މިނިސްޓަރ ދެއްކެވި ވާހަކަފުޅުތަކަށްވެސް ޝުކުރު އަދާކުރިން. ރާއްޖެއިން އަބަދުވެސް ދަނީ ފަލަސްތީނުގެ ހައްޤުގައި އެކި އެކި ފޯރަމުތަކުގައި ވާހަކަދައްކަމުން. މިކަންކަމަށް ޝުކުރުވެރިވަން." ސަފީރު ވިދާޅުވިއެވެ.

ސަފީރު ވަލީދު ވަނީ ފަލަސްތީނުގައި ހިންގަމުންދަނީ ރައްޔިތުން އަޅުވެތިކޮށްގެން ހިނގަމުންދާ ލާއިންސާނީ ޖަރިމާއެއްކަމަށް ވިދާޅުވެފައެވެ. ހަނގުރާމައެއް ހިނގާނީ ދެޤައުމެއް ދެމެދުގައި ނުވަތަ ދެ އަސްކަރިއްޔާއެއްގެ ދެމެދުކަމަށާއި، އެހެންނަމަވެސް އިސްރާއީލުން ޒަމާނީ ހަނގުރާމަވެރި ވަޞީލަތް ބޭނުންކޮށްގެން، ހަމަލާ ދެމުންދަނީ އަޅުވެތިކޮށްފައިވާ، ހަނގުރާމައިގެ ވަޞީލަތް މަދު ފަލަސްތީނުގެ ޢާންމު ރައްޔިތުންނަށްކަމަށްވާއިރު އެއީ ހަނގުރާމައޭ ނުބުނެވޭނެކަމަށް ސަފީރު ވިދާޅުވިއެވެ.

"އިސްރާއިލުން އެބަ ޖެހޭ ފަލަސްތީނުގެ ވެރިރަށަކީ ގުދުސްކަމުގައި ދެކި އެކަމަށް އެއްބަސްވާން. ފަލަސްތީނުގެ ރައްޔިތުންނަށް އަމާންކަމާއި އެކު އަމިއްލަ ޤައުމުގައި އުޅުމުގެ ފުރުސަތު ހޯދައިދޭން ބައިނަލްއަޤްވާމީ މުޖުތަމައުއިން މަސައްކަތްކުރަން ޖެހޭ." ސަފީރު ވިދާޅުވިއެވެ.

ފަލަސްޠީނުގެ ޙަމާސް ޖަމާޢަތުން އިސްވެ އޮވެ އިސްރާއީލާއި މުޅި ދުނިޔެ ސިއްސުވާލާފަދަ ޙަމަލާތަކެއް އަންނަނީ ދެމުންނެވެ. އޮކްޓޫބަރު 7 ވަނަ ދުވަހު ޔަހޫދީން ފެށި ލާއިންސާނީ އުދުވާނުގައި ޝަހީދު ކޮށްލާފައިވާ ފަލަސްޠީނުގެ މީހުންގެ ޢަދަދު މިހާރު ވަނީ 11,300 އަށް އުފުލިފައެވެ. އޭގެ ތެރޭގައި 4,600 އަށްވުރެ ގިނަ ޢަދަދެއްގެ ކުޑަކުދިންނާއި 3,100 އަށްވުރެ ގިނަ އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 29,000 އަށް އުފުލިފައެވެ. އެމެރިކާގެ އެހީތެރިކަމާ އެކު ޔަހޫދީން ދެމުންދާ ހަމަލަތަކުގައި ޒަޚަމު ކޮށްލާފައިވާ މީހުންނަށް ޞިއްޙީ ފަރުވާ ދިނުމަށް ޣައްޒާގެ ޞިއްޙީ އިދާރާތައް ވަނީ ނުކުޅެދިފައެވެ.