ޕޮލިސް ބޯޑުގެ ޗެއާޕާސަނަކަށް ޝަރީފް، ނައިބަކަށް ނޫރާ

ދިވެހި ފުލުހުންގެ ޚިދުމަތުގެ ޤާނޫނުގެ ދަށުން އުފައްދަވާފައިވާ ޕޮލިސް ބޯޑުގެ ޗެއާޕާސަނަކަށް އަޙްމަދު ޝަރީފް، އަދި ނައިބަކަށް ޢާއިޝަތު ނޫރާ މުޙައްމަދު ހަމަޖައްސަވައިފިއެވެ.

ޕޮލިސް ބޯޑުގެ ބައެއް މެންބަރުން ވަކިކުރައްވައި، ޕޮލިސް ބޯޑަށް ބައެއް މެންބަރުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޢައްޔަނުކުރައްވާފައިވަނީ މިމަހުގެ 23 ވަނަ ދުވަހުއެވެ.

މިއީ 7 މެންބަރުންގެ މައްޗަށް އެކުލެވޭ ބޯޑެކެވެ. އޭގެ ތެރޭގައި ރައީސުލްޖުމްހޫރިއްޔާ ޢައްޔަނުކުރައްވާ 2 މެންބަރުންނާއި، ފަންނީ ދާއިރާއަކުން ތަޢުލީމާއި ތަޖުރިބާ ލިބިފައިވާ 3 މެންބަރުންގެ އިތުރުން ޢާންމުކޮށް ހުޅުވާލައިގެން ޢާންމު ރައްޔިތުންގެ ތެރެއިން ކުރިމަތިލާ 2 މެންބަރުން ހިމެނެއެވެ.

ޕޮލިސް ބޯޑަށް އައު މެންބަރުން ޢައްޔަނުކުރެއްވުމާއެކު އެ ބޯޑުގައި ހުސްވެފައިވާ ޗެއާޕާސަންއާއި ޗެއާޕާސަންގެ ނައިބުގެ މަޤާމަށް ބޭފުޅުން އައްޔަންކުރުމަށް އެ ބޯޑުގެ ބައްދަލުވުމެއް ވަނީ ބާއްވާފައެވެ. މި ބައްދަލުވުމުގައި ބޯޑުގެ މެންބަރުންގެ މެދުގައި ނެގި ސިއްރު ވޯޓަކުން ޗެއާޕާސަން ކަމަށް ޝަރީފް އަދި ނައިބަކަށް ނޫރާ އައްޔަންކުރުމަށް ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ވަނީ ފާސްކޮށްފައެވެ.

ޝަރީފާއި ނޫރާއަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތްޕުޅުން ޕޮލިސް ބޯޑަށް ޢައްޔަންކުރެއްވި ދެ ބޭފުޅުންނެވެ.

ޕޮލިސް ބޯޑުގައި މިހާރު ހިމެނިވަޑައިގަންނަވާ ބޭފުޅުން:

• އަޙްމަދު ޝަރީފް - ރައީސުލްޖުމްހޫރިއްޔާ ޢައްޔަންކުރައްވާ މެންބަރު
• ޢާއިޝަތު ނޫރާ މުޙައްމަދު - ރައީސުލްޖުމްހޫރިއްޔާ ޢައްޔަންކުރައްވާ މެންބަރު
• އަލްއުސްތާޛު ޢަލީ ނަޞީރު ޤާސިމް - ފަންނީ ދާއިރާއަކުން ތަޢުލީމާއި ތަޖުރިބާ ލިބިފައިވާ މެންބަރު
• އަޙްމަދު އަޒީމް - ފަންނީ ދާއިރާއަކުން ތަޢުލީމާއި ތަޖުރިބާ ލިބިފައިވާ މެންބަރު
• އަޙްމަދު ސަޢުދީ - ފަންނީ ދާއިރާއަކުން ތަޢުލީމާއި ތަޖުރިބާ ލިބިފައިވާ މެންބަރު
• ޙާމިދު ޢަބްދުލްޣަފޫރު - ޢާންމުކޮށް ހުޅުވާލައިގެން ޢާންމު ރައްޔިތުންގެ ތެރެއިން، ކުރިމަތިލާ މެންބަރު
• އަލްއުސްތާޛާ ޞަފާ ޝަރީފް - ޢާންމުކޮށް ހުޅުވާލައިގެން ޢާންމު ރައްޔިތުންގެ ތެރެއިން، ކުރިމަތިލާ މެންބަރު

ޕޮލިސް ބޯޑުގެ މައިގަނޑު މަސްއޫލިއްޔަތުތަކުގެ ތެރޭގައި ފުލުހުންގެ ޚިދުމަތާ ގުޅޭގޮތުން ޤާނޫނުއަސާސީއާއި ޤާނޫނުތަކުގައި ބަޔާންވެފައިވާ އުސޫލުތަކާ އެއްގޮތަށް ފުލުހުންގެ ޚިދުމަތް ދެމުންދޭތޯ ބެލުމާއި، ފުލުހުން ޢަމަލުކުރަމުންދާ އުސޫލަކަށް ގެންނަންޖެހޭ ބަދަލަކާމެދު ފެންނަ ގޮތުގެ ލަފާ ދިނުން ހިމެނެއެވެ. އަދި ދިވެހި ފުލުހުންގެ ޚިދުމަތުން އެއިރަކަށް ހާސިލުކުރުމަށް ކަނޑައަޅާފައިވާ ލަނޑުދަނޑިތައް ހާސިލުކުރެވެމުންދާ މިންވަރު ބަލައި، ދިވެހި ފުލުހުންގެ ޚިދުމަތް ތަރައްޤީކޮށް ކުރިއެރުވުމަށްޓަކައި ބޯޑަށް ފެންނަ ލަފާދިނުންވެސް ހިމެނެއެވެ.

ދިވެހި ފުލުހުންގެ ޚިދުމަތުގެ ޤާނޫނުގައިވާގޮތުން ޕޮލިސް ބޯޑުގެ ބޯޑުގެ މެންބަރުންނަކީ ފުލުހުންގެ ޚިދުމަތުގައި ވަޒީފާ އަދާކުރާ މީހަކުކަމުގައި ވެގެން ނުވާނެއެވެ. އަދި ޕޮލިސް ބޯޑަށް ޢައްޔަންކުރެވޭ މެންބަރުންގެ ދައުރަކީ، 4 އަހަރު ދުވަހެވެ.