ރޯދައިގެ ފަހުން މަޖިލިސް އިންތިޚާބު ބޭއްވުމަށް ލަފާދިނުމަށް ކޮމެޓީން ފާސްކޮށްފި

އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބު ރަމަޟާންމަހަށްފަހު، ބޭއްވެން އޮތް އެންމެ އަވަސް ތާރީޚެއްގައި ބޭއްވުމަށް ލަފާދިނުމަށް މިނިވަން މުވައްސަސާތަކުގެ ކޮމެޓީން ފާސްކޮށްފިއެވެ.

އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބު ރަމަޟާން މަހުގެ ފަހު 10އަކާއި ދިމާވާތީ، އޭގެ ކުރިން އިންތިޚާބު ބޭއްވޭނެ ގޮތަށް ޤާނޫނަށް އިޞްލާހު ގެނައުމަށް އިލެކްޝަންސް ކޮމިޝަނުން ރައްޔިތުންގެ މަޖިލީހުގައި ވަނީ އެދިވަޑައިގެންފައެވެ.

އިލެކްޝަންސް ކޮމިޝަނުގެ ހުށަހެޅުމާއި މެދު ގޮތެއް ނިންމުމަށް މިއަދު ބޭއްވި ކޮމެޓީ ބައްދަލުވުމަށް ބާރަށު ދާއިރާގެ މެމްބަރު އަހުމަދު އަބްދުﷲ ހުށަހަޅުއްވާފައި ވަނީ ގާނޫނު ބުނާ މުއްދަތަށް ބަލާއިރު އިންތިޚާބު ބޭއްވެން އޮތް އެންމެ ފަހުގެ ތާރީޚެއްގައި ބޭއްވުމަށެވެ. މިހުށަހެޅުން ކޮމެޓީ މެމްބަރުންގެ އިއްތިފާޤުންވަނީ ފާސްވެފައެވެ.

ހިނގަމުން މިދާ ރައްޔިތުންގެ މަޖިލީހުގެ ދައުރު އަންނަ އަހަރުގެ މޭއި މަހުގެ 28 އަށް ހަމަވާނެއެވެ. އަދި ޤާނޫނު ބަޔާންކުރާގޮތުން 120 ދުވަހުގެ ކުރިން އިންތިޚާބު ބޭއްވުމުގެ މަސައްކަތް ފަށަންޖެހެއެވެ. އަދި 19 ވަނަ މަޖިލީހުގެ ދައުރު ހަމަވުމުގެ އެއްމަސް ކުރިން އިންތިޚާބުގެ ރަސްމީ ނަތީޖާ އިއުލާންކުރަންޖެހެއެވެ. އެއީ އޭޕްރީލް 28 ވަނަ ދުވަހުގެ ކުރިންނެވެ.

މިދިޔަ ހަފްތާތެރޭގައި ކޮމެޓީއަށް ހާޒިރުވެ އިލެކްޝަންސް ކޮމިޝަނުންވަނީ ހުށަހެޅުންތަކެއް ހުށަހަޅާފައެވެ. މީގެ ތެރެއިން އެއްގޮތަކީ އިންތިޚާބުގައި ވާދަކުރާ ކެންޑިޑޭޓުންގެ ނަންތައް އިޢުލާނު ކުރާ ދުވަހުން ފެށިގެން 30 ދުވަހުގެ މުއްދަތެއް ދޭންޖެހޭނެ ކަމަށް މަޖިލީހުގެ އިންތިޚާބުގެ ޤާނޫނުގައި ބަޔާންކުރާ، މުއްދަތު، 20 ދުވަހަށް ކުރު ކޮށްލުމެވެ. މިގޮތަށް ކުރު ކޮށްފިނަމަ، މާރޗް 9 ގައި އިންތިޚާބު ބޭއްވިދާނެ ކަމަށާއި، އަދި އެއީ ރަމަޟާން މަސް ފެށުމުގެ 2 ދުވަސް ކުރިއެވެ.

ދެވަނަ ގޮތަކީ ދައުރު ހަމަވާން 120 ދުވަހަށް ވީމާ މަޖިލިސް އިންތިޚާބަށް ކުރިމަތިލުމަށް އިޢުލާނު ކުރަން ޖެހޭނެ ކަމަށް ޤާނޫނުގައި އޮތް އޮތުން ދައުރު ހަމަވާން 140 ދުވަހަށް ވީމާ އިޢުލާން ކުރަންޖެހޭނެކަމަށް ބުނެ ބަދަލު ގެނައުމެވެ. އޭރުން އަވަހަށް އިޢުލާނުކޮށް، ރޯދަމަހުގެ ކުރިން އިންތިޚާބު ބޭއްވިދާނެ ކަމަށްވެސް އިލެކްޝަންސް ކޮމިޝަނުން ކޮމެޓީގައި ވަނީ ފާހަގަކޮށްފައެވެ.

20 ވަނަ ރައްޔިތުންގެ މަޖިލީހުގައި 93 އިންތިޚާބީ ދާއިރާއެއް ހިމެނެއެވެ. އެއީ މިހާރު ހިނގަމުންދާ މަޖިލީހަށްވުރެ 6 ދާއިރާގެ އިތުރު ޢަދަދެކެވެ.