އެސްޓީއޯގެ ދަށުން މިފްކޯ ވަކިކުރުމުގެ މަސައްކަތް ފަށައިފިން: މަސްވެރިކަމާބެހޭ ވަޒީރު
-
އެސްޓީއޯގެ ދަށަށް މިފްކޯ ގެނައީ 2016ގައި
-
މިފްކޯ ހިންގުމުގައި މަސްވެރިންގެ ދައުރު ފުޅާކުރުމަށް ސަރުކާރުން ބޭނުންވޭ
-
އެސްޓީއޯގެ ދަށުން މިފްކޯ ވަކިކުރުމަށް ކެބިނެޓަށް ކަރުދާހެއް ހުށަހަޅަނީ
އެސްޓީއޯގެ ދަށުން މިފްކޯ ވަކިކުރުމަށްޓަކައި ކުރަން ޖެހޭ މަސައްކަތްތައް މިހާރު ކުރައްވަމުންގެންދަވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙުމަދު ޝިޔާމް ވިދާޅުވެއްޖެއެވެ.
އެސްޓީއޯގެ ސަބްސިޑަރީ ކުންފުންޏެއް ގޮތުގައި މިފްކޯ ހަމަޖައްސާފައިވަނީ 2016 ވަނަ އަހަރުގެތެރޭގައެވެ.
މިފްކޯ ހިންގުމުގައި މަސްވެރިންގެ ދައުރު ފުޅާކުރުމަށް ގެންނަން ޖެހޭ ބަދަލުތައް ގެނައުމަކީ ރައީސް ޑރ. މުޙައްމަދު މުޢިއްޒުގެ "ހަފްތާ-14"ގައިވެސް ހިމެނޭ ކަމެކެވެ.
މިފްކޯގެ ހިންގުމަށް ގެންނަ ބަދަލުތަކާއި ގުޅޭގޮތުން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަަކަފުޅު ދައްކަވަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙުމަދު ޝިޔާމް ވިދާޅުވީ މިފްކޯ ވަކި ކުންފުންޏެއްގެ ގޮތުގައި ހިންގުމަށް އެކަމާއި ގުޅޭ ކަރުދާހެއް މިހާރު ތައްޔާރުކުރައްވާފައިވާކަމަށެވެ.
" މިހާރު މިދަނީ އެމަސައްކަތްކުރަމުން، މިކަމާއި ގުޅޭ ހުރިހާ ފަރާތްތަކާއި އެކީގައި، ރައީސް އޮފީސްވެސް ހިމެނޭގޮތަށް ވަރަށް އިސްކަމެއް ދެއްވައިގެން، އެކަމާއި ގުޅޭ ކަރުދާހެއްވަނީ ތައްޔާރުކޮށްފައި، އަންނަ ހަފްތާގައި އެކަރުދާސް ވަޒީރުންގެ މަޖިލީހަށް ހުށަހަޅަން ތައްޔާރުވެފައި އޮތީ،" ޝިޔާމް ވިދާޅުވިއެވެ.
ޝިޔާމް ވިދާޅުވީ އެސްޓީއޯގެ ދަށުން މިފްކޯ ހިންގަމުން ދިޔުމަކީ މިފްކޯއަށް ގޮންޖެހުންތަކެއް ހުރި ކަމެއް ކަމަށެވެ. އެހެންކަމުން ވަކި ކުންފުންޏެއްގެގޮތުގައި މިފްކޯ ހިންގުމުން މިކަމަށް ހައްލު ލިބި، މަސްވެރިންނަށް އެކަމުގެ ފައިދާ ލިބިގެންދާނެ ކަމަށް ޝިޔާމް ވިދާޅުވިއެވެ.
މަސްވެރިކަމުގެ ސިނާއަތުގެ އިންޖީނަކީ މިފްކޯ ކަމަށާއި، މިފްކޯގެ ކޮޅަށް ޖެހުން މުހިންމު ކަމަށްވެސް ޝިޔާމް ވިދާޅުވިއެވެ.