އިބްރާހީމް ނާޞިރު އިންޓަރނޭޝަނަލް އެއަރޕޯޓްގެ އާ ޓާރމިނަލް އެޅުމަށްޓަކައި ބައެއް އިމާރާތްތައް ރިލޮކޭޓް ކުރެއްވުމަށް ކުރައްވާ މަސައްކަތުގެ 95 އިންސައްތަ މަސައްކަތް ނިމިފައިވާ ކަމަށް އެމްޓީސީސީން ބުނެފިއެވެ.
އެމްޓީސީސީގެ ސީއީއޯ ޢަބްދުއްރައްޒާޤް ޙަލީމް ވިދާޅުވީ، ރިލޮކޭޓްކުރުމުގެ މަސައްކަތުގެ 95 އިންސައްތަ މަސައްކަތް ނިމިފައިވާއިރު، މިހާރު ކުރިއަށްދަނީ އެތަނުގެ ބައެއް މަގުތަކުގައި ތާރުއެޅުމުގެ މަސައްކަތެވެ. ހުރިހާ ކަމެއް ނިމި، މި މަހުގެ ތެރޭގައި އެތަން އެއަރޕޯޓްސް ކޮމްޕެނީއާ ޙަވާލުކުރާނެކަމަށް ޙަލީމް ވިދާޅުވިއެވެ.
އާ ޓަރމިނަލް އެޅުމަށް ނިންމާފައިވާ ސަރަޙައްދުގައި ހުރި ޢިމާރާތްތައް އެހެން ތަނަކަށް ބަދަލުކޮށް، އާ ޓާރމިނަލް އެޅުމަށް ޖާގަ ހުސްކުރުމަށް އެއަރޕޯޓްސް ކޮމްޕެނީން އެމްޓީސީސީއާ ޙަވާލުކޮށްފައިވަނީ މިދިޔަ އަހަރުގެ މާރޗް މަހުއެވެ. މި މަޝްރޫޢުގެ ދަށުން، އާ ޓާމިނަލް އެޅުމަށް ނިންމާފައިވާ ސަރަޙައްދުގައި ހުރި 13 ޢިމާރާތެއް ހުޅުލޭގެ އިރުމަތީފަރާތަށް ބަދަލުކުރުމަށް ހަމަޖެހިފައިވެއެވެ. އަދި އެ ސަރަޙައްދުގައި ހުރި އިތުރު ފަސް އިމާރާތެއް މަރާމާތުކުރުމަށްވެސް ވަނީ ހަމަޖެހިފައެވެ.
އެމްއޭސީއެލްއިން އެމްޓީސީސީއާއެކު ވެފައިވާ މި އެއްބަސްވުމުގައި، އާ ޓަރމިނަލް އެޅުމަށް ހަމަޖެހިފައިވާ ސަރަޙައްދުގެ މަގުތައް ހެދުމާއި ފެންސް ޖެހުން ހިމެނެއެވެ. އަދި އިންޑިއާގެ ޖީއެމްއާރުން އެއަރޕޯޓް ހިންގިއިރު، އެއަރޕޯޓް ތަރައްޤީކުރުމަށް އަޅާފައިވާ ބުޑުތައް ނަގައި، އެ ސަރަޙައްދު ސާފުކުރުމުގެ އިތުރުން ފެނާއި ނަރުދަމާ ނިޒާމާއި ކަރަންޓުގެ މަސައްކަތްތައް ކުރުމަށްވެސް އެއްބަސްވުމުގައިވެއެވެ.