މާލޭގައި އެއްމެދު ގޯތި ނުވަތަ ބިންކޮޅެއް އޮވެ، އެކަށީގެންވާ ބޯހިޔާވަހިކަން ތަނަވަސްކުރެވިފައި ނެތް ޢާއިލާތަކަށް ގެދޮރު ޢިމާރާތްކުރުމަށް ދިމާވެފައިވާ އެންމެ ބޮޑު އެއް ގޮންޖެހުމަކީ، މާލީ ފުދުންތެރިކަން ނެތުމާއި، ގެދޮރު ޢިމާރާތްކުރުމަށް ލޯނު ނުވަތަ ފައިސާ ލިބޭނެ ގޮތްތައް ހަނިވުމެވެ. ޚާއްޞަކޮށް ބޭންކު މެދުވެރިކޮށް ގެދޮރު ޢިމާރާތްކުރުމަށް ލޯނު ހޯދުމަކީ ގިނަ ފަރާތްތަކަށް ފަސޭހަކަމަކަށް ނުވެއެވެ. މީ އިތުރުން ގެދޮރު ޢިމާރާތްކުރުމަށް މާލީ އިދާރާތަކުން ދޫކުރާ ލޯނުގެ ޝަރުޠުތަކަކީވެސް ރާއްޖޭގެ އާބާދީގެ ބޮޑުބަޔަކަށް އޭގެ ބޭނުން ހިފޭވަރަށްވުރެ ބޮޑެތި ޝަރުތުތަކެކެވެ. އަދި މިފަދަ ލޯނުތަކަށް ކޮލިފައިވުމަށް ޢިމާރާތްކުރުމުގެ ޚަރަދުގެ 20 އިންސައްތައިގެ ގޮތުގައި މާލީ އިދާރާތަކަށް ދައްކަންޖެހޭ ފައިސާ ހޯދުމަކީވެސް ގިނަ ބަޔަކަށް ފަސޭހަ ކަމަކަށް ނުވެއެވެ. އެހެންކަމުން މާލޭގައި ދިރިއުޅޭ ރައްޔިތުން ގެދޮރު ޢިމާރާތްކުރުމަށް މަގުފަހިކުރުމަށްޓަކައި އެކަމަށް ޚާއްޞަ ލޯނު ސްކީމެއް ސަރުކާރުން މިވަނީ ތަޢާރަފް ކުރައްވާފައެވެ.
މި ލޯން ސްކީމާ ގުޅޭގޮތުން ވާހަކަފުޅު ދައްކަވަމުން ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވީ، މި ލޯން ސްކީމްގެ ސަބަބުން ގިނަ ބަޔަކަށް ލޯން ހޯދުމުގައި ފަސޭހަތަކެއް ލިބިގެންދާނެ ކަމަށެވެ.
ހައުސިން ޑިވެލޮޕްމަންޓް އެންޑް ފައިނޭންސް ކޯޕަރޭޝަން މެދުވެރިކޮށް ގެދޮރު ޢިމާރާތް ކުރުމަށް ކުރާ ޚަރަދުގެ 20 އިންސައްތަ، ލުއި ލޯނުގެ ގޮތުގައި، މިކަމަށް އެދޭ ފަރާތްތަކަށް މި ސްކީމްގެ ދަށުން، ދެއްވުމަށް ހައުސިންގ މިނިސްޓްރީން ވަނީ ނިންމަވާފައެވެ. މި ސްކީމްގެ ދަށުން ލޯން ލިބޭ ފަރާތްތަކަށް ގެ ޢިމާރާތް ފަށައި އަދި ނިންމުމަށް 80 އިންސައްތަ ލޯނުގެ ގޮތުގައި އެޗްޑީއެފްސީ މެދުވެރިކޮށް ލިބުމުގެ މަގުފަހި ވެގެންދާނެއެވެ.
މި ސްކީމްގެ ދަށުން ނަގާ ފައިސާ ދެއްކުމުގެ އެންމެ ދިގު މުއްދަތަކީ 20 އަހަރެވެ. ލޯންގެ އިންޓަރެސްޓް ރޭޓަކީ ފަހެއް އިންސައްތައެވެ. މިއީ ސަރުކާރުގެ ގެދޮރުވެރިކުރުމުގެ ވަޢުދުގެ ދަށުން ތަޢާރަފްކުރެއްވި ލޯނެކެވެ. ގެދޮރުވެރިކަމުގެ ވަޢުދުގެ ދަށުން މާލީ އިދާރާތަކުން ޑިވެލޮޕަރ ފައިނޭންސް ލިބޭނެ ގޮތްތައް ފުޅާކުރުމާއި، ޢިމާރާތްކުރުމަށް ބޭނުންވާ ތަކެއްޗާއި، ސާމާނު ގަނޑުކޮށް އިމްޕޯރޓްކުރެވޭނެ މަގު ފަހިކޮށްދެއްވައިގެން ޢިމާރާތްކުރެވޭނެ އަގު ދަށްކުރުމާއި ރިއަލް އެސްޓޭޓް ވިޔަފާރި ފުޅާކުރުމުގައި ސަރުކާރުން ޕްރައިވެޓް ސެކްޓަރއަށް އެއްބާރުލުން ދެއްވުމާއި، ގެދޮރު ހޯދުމަށް ބޭނުންވާ މީހުންނަށް މާލީ ތަނަވަސްކަން ހޯދުމުގެ މަގުފަހި ކުރުމަށްޓަކައި، ފައިސާ ރައްކާކުރެވޭނެ މަގު ތަނަވަސްކުރުން ހިމެނެއެވެ.
ގެދޮރުވެރި ލޯން ސްކީމްގެ ދަށުން ލޯން ލިބޭ ފަރާތްތައް ކަނޑައެޅުމުގައި ބަލަނީ، ލޯން ނަގާ ފަރާތުން ފައިސާ އަނބުރާ ދެއްކުމުގެ ޤާބިލިއްޔަތާއ، ލޯނަށް އެދޭ ފަރާތުގެ ބިމެއް ރަޖިސްޓްރީވެފައި އޮތުމާއި، ލޯން ސްކީމްގެ ދަށުން ހެދޭ ހުރިހާ ތަނަކީ ޤާނޫނީ ގޮތުން ރަހުނުކުރެވޭ ތަންތަނަށް ވުމާއި، ދެމަފިރިއަކު ލޯނަށް ކުރިމަތިލައި، ދެ ފަރާތުގެ ޝަރުތު ފުރިހަމަވާނަމަ ދެފަރާތުން އެއްބަސްވާ ކޮންމެވެސް އެއްފަރާތަކަށް ލޯން ދޫކުރުމުގެ އިތުރުން، އެމީހެއްގެ އަމިއްލަ ނަމުގައި ސަރުކާރުގެ ގެދޮރުވެރިކުރުމުގެ އެއްވެސް ސްކީމަކުން ބޯހިޔާވަހިކަން ލިބިފައި ނެތުމާއި، ޢުމުރުން އަށާރަ އަހަރު ވެފައިވުން ހިމެނެއެވެ.
މި ސްކީމްގެ ސަބަބުން މާލޭގައި ގެދޮރު އިމާރާތް ނުކުރެވި، އެކަށީގެންވާ ބޯހިޔާވަހިކަން ލިބިފައި ނެތް އާއިލާތަކަށް އެކަމުގެ ޙައްޤު ލިބިގެންދާނެ ކަމަށް ސަރުކާރުން ވިދާޅުވެއެވެ.