ސަރުކާރުން ކަނޑައަޅުއްވާ ފެންވަރަކަށް މަސައްކަތެއް ކުރުން ނުވަތަ އެއްޗެއް އުފެއްދުމުގެ ގިންތިން، މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމަށް ކުރިމަތިލުމުގެ ފުރުޞަތު އިކޮނޮމިކް މިނިސްޓްރީން ހުޅުއްވާލައްވައިފިއެވެ.
އެ މިނިސްޓްރީން ވިދާޅުވީ މި ގިންތިން މިއަހަރު އިނާމު ދެއްވުމަށް ހަމަޖެހިފައިވާ ދާއިރާތަކުގެ ތެރޭގައި، ނެތެމުންދާ ދިވެހި މަސައްކަތްތެރިކަން ދިރުވައި އާލާކުރުމުގެ ދާއިރާ، ރައީސުލްޖުމްހޫރިއްޔާ ހިމަނުއްވާފައިވާ ކަމަށެވެ. އެގޮތުން މި ދާއިރާއިން އިނާމު ދެއްވާނެ ފަރާތެއް ކަނޑައެޅުއްވުމަށްޓަކައި ބާއްވަވާ، ނާށި ބޭނުންކޮށްގެން ތަކެތި އުފެއްދުމުގެ މުބާރާތަށް ކުރިމަތިލުމުގެ ފުރުޞަތު މިހާރު ވަނީ ހުޅުވާލައްވާފައެވެ. މި މުބާރާތް ހުޅުވާލައްވާފައިވަނީ ވަކިވަކި ފަރުދުންނަށްކަމަށް އިކޮނޮމިކް މިނިސްޓްރީން ވިދާޅުވެއެވެ.
މި މުބާރާތުގައި ބައިވެރިކުރެވޭނީ، ނާށި ބޭނުންކޮށްގެން ރާއްޖޭގައި އުފައްދާފައިވާ އެކި ބާވަތުގެ އުފެއްދުންތައް، އަދި މި އުފެއްދުންތަކަކީ، މި މުބާރާތަށް އިޢުލާނުކުރެވުނު ފަހުން އުފައްދާފައިވާ ތަކެތިކަމުގައި ވާންޖެހޭނެ ކަމަށްވެސް އެމިނިސްޓްރީން ވިދާޅުވެއެވެ. މި އިނާމު ދޭނީ، މި މުބާރާތުގައި މަދުވެގެން 5 ފަރާތަކުން ބައިވެރިވެ ތަކެތި ހުށަހަޅާފައިވާނަމައެވެ. img:http://s3.psmnews.mv/images/660x400/6764.jpg|އެކްސްޕޯ މޯލްޑިވްސްގައި ބައިވެރިކުރުމަށް ތައްޔާރުކޮށްފައިވާ ބައެއް ތަކެތި - ފައިލް ފޮޓޯ: ޕީއެސްއެމް
މި މުބާރާތުން 1 ވަނަ، 2 ވަނަ އަދި 3 ވަނައަށް އެންމެ ރަނގަޅު އުފެއްދުމެއް ހުށަހަޅާފައިވާ ފަރާތެއް ހޮވުމަށްވަނީ ހަމަޖެހިފައެވެ. މި އުފެއްދުންތަކަށް މާކްސް ދެވޭ ކަންތައްތަކުގެ ތެރޭގައި މަސައްކަތުގެ ފަށުވިކަމާއި، ޑިޒައިންގެ ފުރިހަމަކަމާއި ޚިޔާލުގެ މުއްސަނދިކަން، މީހާގެ ހުނަރު ބޭނުންކޮށްގެން އުފެއްދުން އުފައްދާފައިވާ މިންވަރު، ތަރިކަ، އާދަކާދަ އަދި ސަގާފީ ސިފަ އުފެއްދުމުގައި އެކުލެވިގެންވާ މިންވަރު، އުފެއްދުން މާކެޓް ކުރުމުގައި ވިސްނާފައިވާ މިންވަރު، އަދި އުފެއްދުން ޕެކްކުރުމާއި، ގެންގުޅުމާއި، ބޭނުންކުރުމުގައި ހުރި ފަސޭހަކަން ހިމެނެއެވެ.
މި އިނާމަށް އެދޭ ފަރާތްތަކުން މި މުބާރާތުގައި ބައިވެރިވުމަށްޓަކައި، މުބާރާތަށް ހުށަހަޅާ ތަކެއްޗާއެކު، އެކަމަށް ޚާއްޞަ ފޯމު ފުރިހަމަކޮށް، ސެޕްޓެމްބަރު މަހުގެ 29 ވާ ބުރާސްފަތި ދުވަހުގެ ނިޔަލަށް އެ މިނިސްޓްރީއަށް ހުށަހެޅުމަށް ވަނީ ފުރުޞަތު ހުޅުވާލާފައެވެ.