"ޗައިނާ މޯލްޑިވްސް ފްރެންޑްޝިޕް ބްރިޖް" ގެ ކޮންކްރިޓް ފައުންޑޭޝަން މަސައްކަތް މޭމަހުގެ ތެރޭގައި ފަށްޓަވާނެކަމަށް ހައުސިންގ މިނިސްޓަރ ވިދާޅުވެއްޖެއެވެ.
ބްރިޖްގެ މަސައްކަތައް ބޭނުންވާ ޕްލެޓް ފޯމްގެ ތެރެއިން ދެ ޕްލެޓްފޯރމްގެ މަސައްކަތް މިހާރު ވަނީ ނިމިފައެވެ. "ޗައިނާ މޯލްޑިވްސް ފްރެންޑްޝިޕް ބްރިޖްގެ ތަނބުތައް ޖެހުމަށްޓަކައި ވަގުތީގޮތުން ފަސް ޕްލެޓްފޯމެއް ހެއްދެވުމަށް ވަނީ ހަމަޖެހިފައެވެ. ޕްލެޓްފޯމްތައް ބެހެއްޓެވުމަށް ޖަހަންޖެހޭ 20 ޕައިޕްވެސް މިހާރު ވަނީ ޖަހައި ނިމިފައެވެ. ޕްލެޓްފޯމްގެ މަސައްކަތް ނިމި މޭމަހުގެ ތެރޭގައި ކޮންކްރީޓް މަސައްކަތް ފެއްޓެވުމަށް ވަނީ ތާވަލް ކުރައްވާފައެވެ.
މި ޕްލެޓްފޯމްތައް އެންމެ ފުރަތަމަ ބޭނުން ކުރެވޭނީ، ބްރިޖްގެ ތަނބުތައް ޖެހުމަށް ކަނޑުއަޑީގައި ކުރިއަށް ގެންދާ ކޮންކްރީޓްގެ މަސައްކަތްތަކެވެ. ކޮންކްރީޓްގެ މަސައްކަތް މޭމަހުގެ ތެރޭގައި ފެށިގެންދާއިރު، މާލެއާއި ހުޅުލެއާ ދެމެދު އަޅުއްވާ ޓްރެސަލް ބްރިޖްގެ މަސައްކަތްވެސް މިހާރު ވަނީ ފަށްޓަވާފައެވެ. ޓްރެސަލް ބްރިޖަކީ ވަގުތީ ގޮތުން ހަދާ ބްރިޖެކެވެ.
ޓްރެސަލް ބްރިޖްގެ މަސައްކަތް މާލޭ ކޮޅުން މިހާރު ފަށާފައިވާއިރު ހުޅުލޭ ކޮޅުން ފެށުމަށްދަނީ ތައްޔާރުވަމުންނެވެ. ޖޫން މަހުގެތެރޭގައި މި ޓްރެސަލް ބްރިޖްގެ މަސައްކަތް ނިމޭނެކަމަށް ހައުސިންގ މިނިސްޓަރ ވިދާޅުވިއެވެ.
ޗައިނާ- މޯލްޑިވްސް ފްރެންޑްޝިޕް ބްރިޖްގެ ތަނބުތައް ޖެހުމަށްފަހު 2017 ވަނަ އަހަރުގެ ތެރޭގައި ކުރިއަށްދާނީ ބްރިޖްގެ މައިގަނޑުގެ މަސައްކަތެވެ. އަދި ބްރިޖް ނިންމެވުމަށް ކަނޑައަޅުއްވާފައިވަނީ 2018 ވަނަ އަހަރުގެ ޖުލައި މަހުގެ ނިޔަލަށެވެ.