ޕީއެސްއެމުން އިންތިޒާމްކޮށްގެން މި އަހަރުގެ ރަމަޟާން މަހު ބާއްވާ ކުޑަކުދިންގެ ޤުރުއާން ކިޔެވުމުގެ މުބާރާތުގެ އޮޑިޝަން ފަށައިފިއެވެ.
ދިވެހިރާއްޖޭގެ އަޑުގެ ސެނެކޯ މާލަމުގައި ކުރިއަށްދާ އޮޑިޝަން މިއަދުން ފެށިގެން މެއި މަހުގެ އެއްވަނަ ދުވަހުގެ ނިޔަލަށް ކުރިއަށްދާނެއެވެ. އެހެން އަހަރުތަކާ ޚިލާފަށް މިއަހަރުގެ ޤުރުއާން މުބާރާތަށް ކުދިން ހޮވަނީ، އެ ކުއްޖަކު ވާދަކުރަން ބޭނުންވާ އުމުރުފުރާގެ އޮޑިޝަން އޮންނަ ގަޑިއަށް ފޮޓޯޖެހި ލިޔުމެއް ހިފައިގެން ސެނެކޯ މާލަމަށް ދިޔުމުން އޮޑިޝަންގައި ކިޔެވުމަށްފަހުއެވެ.
މާލޭގެ އިތުރުން އަތޮޅުތެރޭގެ ހަތަރު ސަރަޙައްދެއްގައި އޮޑިޝަން ބޭއްވުމަށްވަނީ ހަމަޖެހިފައެވެ. ހދ ކުޅުދުއްފުށީގެ އޮޑިޝަން އޮންނާނީ، މެއި މަހުގެ ފަހަކުން ހަތަކަށެވެ. އައްޑޫ ސިޓީގެ ހިތަދޫގެ އޮޑިޝަން އޮންނާނީ، މެއި ބާރައިން ސާދައަށް ހިތަދޫގައެވެ. ރ އުގޫފާރުގެ އޮޑިޝަން އޮންނާނީ، މެއި މަހުގެ ނަވާރައިން އެކާވީހަށެވެ. ލ ފޮނަދޫގެ އޮޑިޝަން އޮންނާނީ، މެއި މަހުގެ ސައްބީހުން އަށާވީހަށެވެ. ޖުމްލަ ހަތްސަތޭކަ ކުދިން އޮޑިޝަނުން ހޮވުމަށް ނިންމާފައިވާއިރު، މީގެ ތެރެއިން 500 ކުދިން ހޮވާނީ މާލޭ އޮޑިޝަނުންނެވެ.
މި މުބާރާތުގައި އުމުރުފުރާތަކުންނާއި، މުޅި މުބާރާތުން ބަލައިގެން ކިޔެވުމާއި، ހިތުދަސްކުރުމުގެ ބައިން ވަނަ ވަނައަށް އަންނަ ދަރިވަރުން ހޮވުމަށް ވަނީ ހަމަޖެހިފައެވެ.