ސަލްޓަން ޕާކް ތަރައްޤީކުރެއްވުމުގެ މަޝްރޫޢު މިއަހަރު ތެރޭގައި ނިމޭނެކަމަށް ހައުސިން މިނިސްޓްރީން ހާމަކުރައްވައިފިއެވެ.
ސަލްޓަންޕާކަކީވެސް ރައްޔިތުންނަށް ހިތްހަމަޖައްސާލަން މަޑުކޮށްލެވޭފަދަ މާޙައުލަކަށް ހެއްދެވުމުގެ ގޮތުން ސަރުކާރުން ވަނީ މަސައްކަތްތަކެއް ފަށްޓަވާފައެވެ. އެގޮތުން މިނިވަން ފަންސާހާ ދިމާކޯށް، ހުޅުދާން ބަގީޗާގެ ނަމުގައި، ލެޑް ޕާކެއްވެސް އެތަނުގައި ތަރައްޤީ ކުރައްވާފައިވެއެވެ. އަދި އެތަން އިތުރަށް ތަރައްޤީ ކުރެއްވުމަށް ޕްލޭނެއް އެކުލަވާލައްވައި އެ މަސައްކަތް މިހާރުވަނީ ފަށްޓަވާފައެވެ.
ހައުސިންގ މިނިސްޓަރ ޑރ މުޙައްމަދު މުޢިއްޒު ވިދާޅުވީ، ސަލްޓަން ޕާކް ތަރައްޤީ ކުރެއްވުމަށް އިޢުލާން ކުރެއްވި ޑިޒައިނާ އެއްގޮތަށް، ވިންޓަރ ތީމްއާއެކު ސަލްޓަންޕާކް މި އަހަރުގެ ތެރޭގައި ނިންމަވައި ހުޅުވާލައްވާނެކަމަށެވެ. މިނިސްޓަރ ވިދާޅުވީ، މި މަޝްރޫޢު މުޅިން ނުނިމުނު ނަމަވެސް މިނިވަން ދުވަހާ ގުޅުވައިގެން ސަލްޓަން ޕާކްގެ ބޮޑުބައެއް ޢާއްމުންނަށް ހުޅުވާލައްވާނެކަމަށެވެ.
ސަލްޓަން ޕާކްގެ ތަރައްޤީކުރެއްވުމަށް ނިންމަވާފައިވަނީ، ސަލްޓަން ޕާކުގައި މިހާރު ހުންނަ ތާރީހީ ބިނާ "އުސްގެކޮޅު"ގެ އާބާތުރަ ފިލުވައި ކުޑަކުދިންނަށް ތާރީހް ދަސްކުރެވޭ ފަދަ ތަނަކަށް ހެދުމާއި، ޕާކުތެރޭގައި ފިނިފެންމާ ބަގީޗާއެއް ހެދުމާއި، ގްރީން ޓަނަލް ވޯކްވޭއެއް ހެދުމާއި، ކުޑަކުދިންނަށް އެރެވޭނެ ފަދަ ފައްވާރެއް ހެދުމުގެ އިތުރުން، ވިންޓަރ ކޯނާރއަކާއި ސްކޭޓީން އޭރިއާއެއްވެސް ހިމެނޭ ގޮތަށެވެ.
ސަލްޓަން ޕާކް ތަރައްޤީ ކުރެއްވުމަށް ހައުސިންގ މިނިސްޓްރީން އެމްޓީސީސީއާ ހަވާލު ކުރައްވާފައިވަނީ ޖެނުއަރީ މަހުގެ ތެރޭގައެވެ.