މާލޭގައި ޕްރިމިއަމް ޓެކްސީގެ ޚިދުމަތް ދިނުމަށް ނިންމާފައިވާ ކަމަށް އެމްޓީސީސީން ހާމަކޮށްފިއެވެ.
ޕީއެސްއެމްއާ ވާހަކަދައްކަމުން އެމްޓީސީސީގެ ސީއީއޯ އަބްދުއްރައްޒާޤް ޙަލީމް ވިދާޅުވީ، މާލޭގައި ދިރިއުޅޭ ރައްޔިތުންނަށް ޓެކްސީ ލިބުމުގައި ދިމާވެފައިވާ ދަތިކަން ހައްލުކުރުމުގެ މަޤްސަދުގައި ޕްރިމިއަމް ޓެކްސީގެ ޚިދުމަށް ފެށުމަށް އެމްޓީސީސީން މިހާރު ތައްޔާރުވަމުން އަންނަކަމަށެވެ. އެގޮތުން މިހާރު އެކަމުގެ މަޝްވަރާތައް ސަރުކާރާއެކު ކުރައްވަމުން ގެންދަވާކަން ފާހަގަ ކުރައްވަމުން ހަލީމް ވިދާޅުވީ، އަގުތައް ވެގެންދާނީ، ރައްޔިތުންނަށް އަތްފޯރާވަރުގެ އަގުތަކަށްކަމަށެވެ.
ހަލީމް ވިދާޅުވީ، މި ކަމަކީ، މިހާރު މާލެއަށް ދިމާވެފައިވާ ޓެކްސީ ލިބުމުގެ ދަތިކަމަށް ހައްލު ހޯދައިދިނުމުގެ ވިސްނުމުގައި ތައާރަފް ކުރެއްވުމަށް ނިންމަވާފައިވާ ކަމެއްކަމަށެވެ.
އެމްޓީސީސީން ޕްރީމިއަމް ޓެކްސީގެ ޚިދުމަތް ދެއްވުމަށް ތައްޔާރުވަމުންދާއިރު، އިކޮނޮމިކް މިނިސްޓްރީންވެސް ދަނީ ޕްރީމިއަމް ޓެކްސީ ތައާރަފްކުރެއްވުމުގެ މަސައްކަތް ކުރައްވަމުންނެވެ. އެގޮތުން އެކަމަށް ޝައުޤުވެރިކަން ފާޅުކުރުމަށް އެމިނިސްޓްރީން ވަނީ ހުޅުވާލައްވާފައެވެ.