އިޤްތިސާދީ ތަރައްޤީގައި އަންހެނުންގެ ބައިވެރިވުން އިތުރުކުރަންޖެހޭ: ސައީދު

އިޤްތިސާދީ ތަރައްޤީގެ ނިންމުންތަކުގައި އަންހެނުންގެ ބައިވެރިވުން އިތުރުކުރުމަށް މަސައްކަތްކުރަންޖެހޭކަމަށް އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.

ވަޒީރު މިހެން ވިދާޅުވީ އިޤްތިޞާދީ ތަރައްޤީއާއި ބެހޭ ވުޒާރާއާއި ޔޫއެންޑީޕީ ގުޅިގެން ބާއްވާ އޭޝިއާ ޕެސިފިކް ބްލޫ އިކޮނޮމީ ފޯރަމު ހުޅުވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.

ވިލާ ނޯޓިކާ ރިސޯޓުގައި ދެ ދުވަހުގެ މުއްދަތަކަށް ބާއްވާ އޭޝިއާ ޕެސިފިކް ބްލޫ އިކޮނޮމީ ފޯރަމަކީ ޔޫޫއެންޑީޕީގެ ކްލައިމެޓް ފައިނޭންސް ނެޓްވޯކުގައި ހިމެނޭ ޤައުމުތަކުން ބައިވެރިވާ ފޯރަމެކެވެ. އެގޮތުން ފޯރަމުގައި 12 ވަރަކަށް ގައުމުން 100 އަށް ވުރެ ގިނަ ފަރާތަކުން ބައިވެރިވެފައިވެއެވެ.

ފޯރަމް ފެށުމުގެ ރަސްމިއްޔާތުގައި ވާހަކަދައްކަވަމުން އިޤްތިސާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސައީދު ވިދާޅުވީ ސަރުކާރުގެ ތަރައްޤީގެ އެޖެންޑާގައިވެސް ތިމާވެށި ހިމާޔަތްކޮށް ދެމެހެއްޓެނިވި ގޮތެއްގައި ތަރައްޤީގެ މަޝްރޫޢުތައް ކުރިއަށް ގެންދިޔުމަށް ހާއްސަ އިސްކަމެއް ދެއްވާ ކަމަށެވެ.

ވަޒީރު ސައީދު ވަނީ ރާއްޖޭގެ ތަރައްޤީއާއިވެސް ގުޅުންހުރި ތިން ދާއިރާއަކުން ފޯރަމުގައި މަޝްވަރާކުރުމަށް އެދިވަޑައިގެންފައެވެ. އެގޮތުން ތިމާވެށި ހިމާޔަތްކުރުމަށް ބޭރުގެ އެހީދޭ ޖަމައްޔާތަކުން މާލީ އެހީތެރިކަން ހޯދުމުގައި ހުރި ދަތިތަކަށް ހައްލު ހޯދުމާއި ގުޅޭގޮތުންނާއި، އެހީ އެންމެ ބޭނުންވާ ޤައުމުތަކަށް އެހީ ލިބޭނެ މަގު ތަނަވަސް ކުރުމާއި ގުޅޭގޮތުން މަޝްވަރާކުރުން މުޙިމުކަމަށް ވިދާޅުވިއެވެ. އަދި ކުދި ވިޔަފާރިތައް ކުރިއެރުވުމާއި ފަސޭހައިން މާލީ އެހީތެރިކަން ލިބޭނެ އިންތިޒާމެއް ހަމަޖެއްސުންވެސް މުހިއްމު ކަމަށް ވަޒީރު ވިދާޅުވިއެވެ.

"ކުދި ވިޔަފާރިތަކަށް ބޭނުންވާ މާލީ އެހީތެރިކަން ލިބޭނެ އިނޮވޭޓިވް ގޮތްތައް މުހިއްމު، މިކަމާއި ގުޅޭގޮތުން މަޝްވަރާކޮށް ހައްލު ހޯދަން ޖެހޭ،" ވަޒީރު ވިދާޅުވިއެވެ.

ވަޒީރު ސައީދު ވިދާޅުވީ ޤައުމުގެ ތަރައްޤީގައި ހުރިހާ ފަރާތްތަކުގެ ބައިވެރިވުން މުހިއްމުކަމަށެވެ. އެހެންނަމަވެސް ޤައުމުގެ ތަރައްޤީގެ ނިންމުންތަކުގައި އަންހެނުންގެ ބައިވެރިވުން ކުޑަ ކަމަށާއި މިކަމަށް ހައްލެއް ބޭނުންވާ ކަމަށް ވަޒީރު ވިދާޅުވިއެވެ.

"އަންހެނުން ކަންތައްތަކާއި މެދު ހުށަހަޅާ ހިޔާލުތަކަކީ ވަރަށް ތަފާތު ބޭނުންތެރި ހިޔާލުތަކެއް، އެހެން ނަމަވެސް ޤައުމުގެ ތަރައްޤީގައި އަންހެނުންގެ ބައިވެރިވުން ކުޑަ، މިކަމަށް ހައްލެއް ބޭނުންވޭ،" ވަޒީރު ވިދާޅުވިއެވެ.

ވަޒީރު ސައީދު ވިދާޅުވީ އަންހެނުންގެ ބައިވެރިވުން ހުރިހާ ދާއިރާއެއްގައި އިތުރުކުރުމަކީ މުޅި ޤައުމުގެ ތަރަައްޤީއަށް މުހިއްމުކަމެއް ކަމަށެވެ.

މިފަހަރުގެ އޭޝިއާ ޕެސިފިކް ބްލޫ އިކޮނޮމީ ފޯރަމު ރާއްޖެއިން ކޯ ހޮސްޓްކުރާއިރު، މިފަހަރުގެ ފޯރަމް ކުރިއަށް ގެންދަނީ އިޤްތިޞާދީ ތަރައްޤީއާއިބެހޭ ވުޒާރާއާއި، ޔޫއެންޑީޕީއާއި، އިންގިރޭސިވިލާތުގެ ފޮރިން، ކޮމަންވެލްތު އަދި ޑިވެލޮޕްމެންޓް އޮފީހާއި ގުޅިގެންނެވެ.