ނޫ އިޤްތިޞާދުގެ ދަށުން ތަރައްޤީގެ މަސައްކަތް ކުރިއަށް ގެންދިއުމާއި ގުޅޭ ސަރަހައްދީ ފޯރަމެއް ރާއްޖޭގައި

ނޫ އިޤްތިޞާދުގެ ދަށުން ޤައުމުތަކަށް ތަރައްޤީގެ ދާއިރާއިން ކަންތައްތައް ރާވައި ހިންގުމާއި ގުޅޭ ސަރަހައްދީ ފެންވަރުގެ ފޯރަމެއް ރާއްޖޭގައި ފަށައިފިއެވެ.

ވިލާ ނޯޓިކާ ރިސޯޓުގައި ދެ ދުވަހުގެ މުއްދަތަކަށް ބާއްވާ އޭޝިއާ ޕެސިފިކް ބްލޫ އިކޮނޮމީ ފޯރަމަކީ ޔޫޫއެންޑީޕީގެ ކްލައިމެޓް ފައިނޭންސް ނެޓްވޯކުގައި ހިމެނޭ ޤައުމުތަކުން ބައިވެރިވާ ފޯރަމެކެވެ.

2 ދުވަހުގެ މުއްދަތަކަށް ކުރިއަށްދާ މި ފޯރަމްއަކީ ނޫ އިޤްތިޞާދުގެ ދަށުން ޤައުމުތަކަށް ކުރެވޭނެ ކަންކަން ރާވައި ހިންގުމާއި ގުޅޭގޮތުން މަޝްވަރާ ކުރަމަށް ބާއްވާ ފޯރަމެކެވެ. މި ފޯރަމުގައި 12 ވަރަކަށް ގައުމުން 100 އަށް ވުރެ ގިނަ ފަރާތަކުން ބައިވެރިވެފައިވެއެވެ.

މިފަހަރުގެ ފޯރަމް ރާއްޖެއިން ކޯ ހޯސްޓްކުރާއިރު، މިފަހަރުގެ ފޯރަމް ކުރިއަށް ގެންދަނީ އިޤްތިޞާދީ ތަރައްޤީއާއިބެހޭ ވުޒާރާއާއި، ޔޫއެންޑީޕީއާއި، އިންގިރޭސިވިލާތުގެ ފޮރިން، ކޮމަންވެލްތު އަދި ޑިވެލޮޕްމެންޓް އޮފީހާއި ގުޅިގެންނެވެ.

މިފޯރަމު ފެށުމުގެ ރަސްމިއްޔާތުގައި ޔުނައިޑަޓް ނޭޝަންސް ޑިވެލޮޕްމަންޓު ޕްރޮގްރާމް، ޔޫއެންޑީޕީން ރާއްޖެއަށް ކަނޑައަޅުއްވާފައި ހުންނަވާ ސަފީރު އެންރީކޯ ގަވޭލިއާ ވަނީ ނޫ އިޤްތިސާދެއްގެ މުހިއްމުކަމާއި ގުޅޭގޮތުން ވާހަަކަދައްކަވާފައެވެ. އަދި ރާއްޖެފަދަ ޤައުމަކަށް މިއީ މުހިއްމު ދާއިރާއެއްކަން އެންރީކޯ ފާހަގަކުރެއްވިއެވެ.

"ނޫ އިޤްތިސާދަކީ ރާއްޖެ ފަދަ ޤައުމަކަށް މުހިއްމު ދާއިރާއެއް، ރާއްޖޭގެ 99 އިންސައްތައަކީ ކަނޑުގެ ސަރަހައްދު، ރާއްޖޭގެ ޖީޑީޕީގައިވެސް ނޫ އިޤްތިސާދު މުހިއްމު، މުޅި ދުނިޔެއަށް ބެލި ނަމަވެސް މިއީ މުހިއްމު ދާއިރާއެއް،" އެންރިކޯ ވިދާޅުވިއެވެ.

ނޫ އިޤްތިޞާދު ނިސްބަތްކުރަނީ އިޤްތިޞާދީ ކުރިއެރުމާއި، ދިރިއުޅުމުގެ ހާލަތު ރަނގަޅުކޮށް، ވަޒީފާތައް އިތުރުކުރުމަށްޓަކައި ކަނޑުފަޅުގެ ޤުދުރަތީ ވަސީލަތްތަކާއި މާހައުލީ ނިޒާމުތައް ދެމެހެއްޓެނިވި ގޮތެއްގައި ބޭނުންކުރުމަށެވެ. ނޫ އިޤްތިޞާދުގެ ތެރޭގައި އިއާދަކުރަނިވި ހަކަތައާއި، ދެމެހެއްޓެނިވި މަސްވެރިކަމާއި، ކަނޑު ދަތުރުފަތުރު ކުރުމާއި، މޫސުމަށް އަންނަ ބަދަލުތަކާއި، ކުނި މެނޭޖުކުރުމާއި އަދިވެސް ކަނޑުފަޅާއި ގުޅިފައިވާ މިފަދަ އެހެނިހެން ގިނަ ދާއިރާތަކެއް އެކުލެވެއެވެ.

މި ފޯރަމުގައި ރާއްޖޭގައި ހުންނަވާ އިނގިރޭސިވިލާތުގެ ސަފީރު ކެރޮން ރޮސްލަރވަނީ ޖަޒީރާ ޤައުމުތަކަށް ކަނޑުގެ ވަސީލަތްތައް މުހިއްމުކަން ފާހަގަކުރައްވާފައެވެ. އެގޮތުން ކަނޑުގެ ވަސީލަތްތައް ބޭނުންކުރުމުގައި ތިމާވެށި ހިމާޔަތްކުރުމާއި ގުޅޭ މިފަދަ ފޯރަމެއް މުހިއްމުކަމަށް ރޮސްލަރ ވިދާޅުވިއެވެ.

"ގާތްގަނޑަކަށް 3 ބިލިއަން މީހުން އާމްދަނީ ހޯދުމަށް ކަނޑުގެ ވަސީލަތްތަކަށް ބަރޯސާވޭ، އަދި ހާއްސަކޮށް ތަރައްޤީވަމުން އަންނަ ޤައުމުތަކުގެ ރައްޔިތުންނަށް ކަނޑުގެ ވަސީލަތްތަކުން އާމްދަނީ ހޯދުމުގައި، ތިމާވެއްޓަށްވާ ގެއްލުންތައް ކުޑަކުރުން މުހިއްމު،" ރޮސްލަރ ވިދާޅުވިއެވެ

ރޮސްލަރ ވިދާޅުވީ ނޫ އިޤްތިސާދެއްގައި ޒުވާން ޖީލަކަށް މިދާއިރާއިން ކުރިއަށް ދެވޭނެ މަގު ތަނަވަސް ކޮށްދޭންޖެހޭ ކަމަށެވެ. އެގޮތުން އިނގިރޭސިވިލާތުން ރާއްޖެއަށް ނޫ އިޤްތިސާދުގެ ދާއިރާއިން، ހާއްސަކޮށް ތިމާވެށި ހިމާޔަތްކުރުމަށް ކުރަމުންދާ މަސައްކަތްތަކަށް މާލީ އެހިތެރިކަން ފޯރުކޮށްދެމުންދާ ކަމަށް ވިދާޅުވިއެވެ.