ބަރުބަރީ މިސްކިތުގެ މަސައްކަތް މިއަހަރު ފެށޭނެ: ޝަހީމް

މަސްޖިދުލް ޔޫސުފުލް ބަރުބަރީ ހުރި ބިމުގައި ބިނާކުރާ އައު މިސްކިތުގެ މަސައްކަތް މިއަހަރު ފެށޭނެކަމަށް އިސްލާމީ ކަންތައްތަކާއިބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

އިސްލާމީ ކަންތައްތަކާއިބެހޭ ވުޒާރާއިން މި މިސްކިތް ބިނާކުރުމަށް ހަވާލުކޮށްފައިވަނީ އަމިއްލަ ފަރާތަކާއެވެ. އަދި އެކަމާއި ގުޅޭ އެއްބަސްވުމުގައި އެ ވުޒާރާއިން ސޮއިކޮށްފައިވަނީ މިދިޔަ ޖަނަވަރީމަހުގެތެރޭގައެވެ.

އިސްލާމީ ކަންތައްތަކާއިބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވަނީ މި މިސްކިތުގެ އައު އިމާރާތުގެ ކުރެހުން ސޯޝަލް މީޑިއާގައި ހިއްސާކޮށްފައެވެ.

ވަޒީރު ވިދާޅުވީ ބަރުބަރީ މިސްކިތުގެ މަސައްކަތް މިއަހަރު ފެށިގެންދާނެ ކަމަށެވެ. އަދި 3 ބުރިއަށް އިމާރާތްކުރާ މި މިސްކިތަކީ 1400 މީހުންގެ ޖާގައިގެ މިސްކިތެއްކަމަށްވެސް ވަޒީރު ވިދާޅުވިއެވެ.

މާތް ﷲ އިރާދަކުރެއްވިއްޔާ މާލެ ސިޓީ، ރައްދެބައިމަގު ބަރުބަރީ މިސްކިތް މިއަހަރު މަސައްކަތްފެށޭނެ. މި މިސްކިތް އަޅަން ހެޔޮ އެދޭ ފަރާތަކާ ވަނީ ޙަވާލުކުރެވިފަ. 1400 މީހުންނަށް ނަމާދުކުރެވޭގޮތައް 3 ބުރިއަށް ހެދިގެންދާނެ. އަލްޙަމްދު ﷲ. pic.twitter.com/P56Euev5C1

— Mohamed Shaheem Ali Saeed (@Mohamedshaheem1) June 5, 2024

ވަޒީރު މީގެކުރިން ވިދާޅުވީ 2 އަހަރެއްހާ ދުވަހުގެތެރޭ މިސްކިތުގެ މަސައްކަތް ނިންމުމަށްފަހު ހުޅުވުމަކީ އަމާޒެއްކަމަށެވެ.

ރާއްޖޭގެ އެކި ސަރަހައްދުތަކުގައި މިސްކިތްތައް ބިނާކުރުމުގެ ފުރުސަތު އަމިއްލަ ފަރާތްތަކަށް ހުޅުވާލާފައިވާއިރު، މިފަހުން ވަނީ ހއ. އިހަވަންދޫ މިސްކިތް ބިނާކުރުމަށް ބަޔަކާއި ހަވާލުކޮށްފައެވެ. މިއީ 150 މީހުންގެ ޖާގައިގެ މިސްކިތެކެވެ.