ސޯމާލިޔާ ބަޔަކު ނ. އަތޮޅުގެ ފަޅުރަށަކަށް ޑިންގީއެއްގައި ލައްގައިފި
-
އެމީހުން ލައްގައިފަވަނީ ނ. ވަވައްޗަށް
-
އެއީ ސޯމާލިއާއަށް ނިސްބަތްވާ 3 ފިރިހެނުން
-
ފުލުހުންދަނީ މައްސަލަ ތަހުޤީގު ކުރަމުން
ރާއްޖޭގެ ފަޅުރަށަކަށް ސޯމާލިޔާގެ ބަޔަކު ޑިންގީއެއްގައި ލައްގާފައިވާ ކަމަށް ފުލުހުން ހާމަކޮށްފިއެވެ.
ދިވެހި ފުލުހުންގެ ޚިދުމަތުން ވިދާޅުވީ އެމީހުން ލައްގާފައިވަނީ ނ. ވަވައްޗަށް މިއަދުގެ ވަގުތެއްގައިކަމަށެވެ. އަދި އެއީ ސޯލާމީޔާއަށް ނިސްބަތްވާ 3 ފިރިހެނުންކަމަށާއި، އެމީހުން މިވަގުތު ތިބީ ވަވަތީގައި ފުލުހުންގެ ބެލުމުގައި ދަށުގައިކަމަށްވެސް ފުލުހުން ވިދާޅުވިއެވެ. މިކަން މިހާރު ފުލުހުން އަންނަނީ ތަޙުޤީޤު ކުރަމުންނެވެ.
ދަނޑުވެރިކަން ފުޅާ ދާއިރާއެއްގައި ކުރާ ވަވައްޗަކީ ނ. އަތޮޅުގައި އޮންނަ ވެލާ ޕްރައިވެޓް އައިލޭންޑް ރިސޯޓާއި ކައިރިން އޮންނަ ފަޅު ރަށެކެވެ.
މީގެކުރިންވެސް ސޯމާލިޔާއަށް ނިސްބަތްވާ މީހުން ޑިންގީތަކުގައި ރާއްޖެއަށް ލައްގާފައި އެބަހުއްޓެވެ.
ސޯމާލިޔާއަކީ އިރުމަތީ އެފްރިކާއަށް ނިސްބަތްވާ ޤައުމެކެވެ. އެ ޤައުމުގެ ކަނޑުގެ ސަރަޙައްދަކީ ކަނޑުފޭރުމުގެ ހާދިސާތަށް ގިނަ ނުރައްކާތެރި ހިސާބެކެވެ.