"ޕޯޗުގަލްގެ އެކަޑެމީތަކުގެ އިތުރުން ދުނިޔޭގެ ފުޓްބޯޅައިގައި ވެސް މިކަމުން މިސާލު ނަގަންޖެހޭ،ޕޯޗުގަލްގެ ކޯޗު، ރޮބާޓޯ މާޓިނޭޒް
ޔޫރޯ 2024 ގެ ގްރޫޕް އެފް ގައި ރޭ ތުރުކީ އަތުން 0-3 އިން މޮޅުވި މެޗަށްފަހު ދެއްކި ވާހަކައިގައި ޕޯޗުގަލްގެ ކޯޗު، ރޮބާޓޯ މާޓިނޭޒް ވަނީ، އެ މެޗުގައި އެ ޓީމުގެ ތަރި އަދި ކެޕްޓަން، ކްރިސްޓިއާނޯ ރޮނާލްޑޯ ދައްކައިދިނީ ފުރިހަމަ މިސާލެއް ކަމަށް ބުނެފައެވެ.
އެގޮތުން، މާޓިނޭޒް ބުނީ، ގޯލްކީޕަރު ކުރިމަތީގައި ހުރެ ރޮނާލްޑޯ ވަނީ އެ ޓީމުގެ މިޑްފީލްޑަރު، ބްރޫނޯ ފެނާންޑޭސް އަށް އެ ބޯޅަ ޖައްސާލައި، އޭނާ އަށް ލަނޑުޖަހަން މަގުފަހިކޮށްދީފައި ކަމަށެވެ. މިއީ ވަރަށް އާދަޔާ ހިލާފު ކަމެއް ކަމަށާއި، އެންމެ މުހިއްމީ ޓީމުކަން ރޮނާލްޑޯ މިވަނީ ސާބިތުކޮށްދީފަ ކަމަށް ވެސް މާޓިނޭޒް ބުންޏެވެ.
މާޓިނޭޒް ވަނީ، ފުރަތަމަ މެޗުގައި ޗެކް ރިޕަބްލިކާ ދެކޮޅަށް ކުޅުނު ލެވެލްގައި އޭނާގެ ޓީމުން ކުޅެފައިވާ ކަމަށާއި، މި ފަހަރު ތަފާތަކަށްވެގެންދިޔައީ ކުރިން ސްކޯ ކުރެވުން ކަމަށް ބުނެފައެވެ. ތުރުކީ އިން ވެސް ރަނގަޅަށް ފެށި ނަމަވެސް، އޭނާގެ ޓީމުން އެކަން ރަނގަޅަށް ހަމައަކަށް އެޅުވުމަށްފަހު ލަނޑުޖަހައި، މެޗުގެ ކޮންޓްރޯލް ފުރަތަމަ ހާފުގައި ހޯދި ކަމަށް ވެސް މާޓިނޭޒް ބުންޏެވެ.
ތުރުކީއާ ދެކޮޅަށް ކުޅެން ފަސޭހަނުވި ކަމަށާއި، ހުނަރުވެރި ކުޅުންތެރިންތަކެއްތިބި އެ ޓީމުގެ ކުޅުން ހުއްޓުވުނު ކަމަށް ވެސް މާޓިނޭޒް ބުންޏެވެ. އަދި، މެޗުގައި ކުޅެމުންދިޔަ ހައި ޓެމްޕޯގެ ސަބަބުން އޭނާގެ ޓީމަށް އެހީވި ކަމަށާއި، އެންމެ ރަނގަޅަށް ފޯކަސްކޮށް ދިފާއީ ކުޅުމަށް ސަމާލުކަންދެވުނު ކަމަށް ވެސް މާޓިނޭޒް ވަނީ ބުނެފައެވެ. އަދި އޭނާގެ ޓީމުން ބައިކޮޅަށް ލަނޑެއްވަނަނުދީ މެޗު ނިންމާލެވުމުން ވަރަށް ބޮޑު ހިތްހަމަޖެހުމެއް ލިބިފައިވާ ކަމަށް ވެސް މާޓިނޭޒް ބުންޏެވެ.
މާޓިނޭޒް ބުނީ، މި ނަތީޖާއާއެކު އޭނާގެ ޓީމަށް ކުރިއަށް އޮތް މެޗުގައި ބަދަލުތަކެއް ގެންނާނެ ކަމަށެވެ. އެގޮތުން، ޓީމުގައި ހިމެނޭ ކުޅުންތެރިންގެ ތެރެއިން މިހާތަނަށް ކުޅުމުގެ ފުރުޞަތު އެކަށީގެންވާ ވަރަށް ނުލިބޭ ކުޅުންތެރިންގެ ބޭނުންހިފާނެ ކަމަށް އޭނާ ވަނީ ބުނެފައެވެ.
ޕެޕޭއާ ބެހޭގޮތުން މާޓިނޭޒް ބުނީ، ޕެޕޭގެ އުމުރަކީ 41 އަހަރުކަމަށް މެޗު ބެލި ނިއުޓްރަލް މީހަކު ނުބުނާނެ ކަމަށެވެ. އޭނާ އަކީ ޕޯޗުގަލްގެ ފުޓްބޯޅައިގެ ނަމޫނާ ކުޅުންތެރިއެއް ކަމަށާއި، 24 ގަޑިއިރު އޭނާ އަކީ ޕްރޮފެޝަނަލްއެއް ކަމަށް ވެސް މާޓިނޭޒްގެ ވާހަކައިގައި ފާހަގަކުރިއެވެ.
މުބާރާތުގައި ޕޯޗުގަލް އަށް ދެން އޮތީ ގްރޫޕް ސްޓޭޖުގެ ފަހު މެޗުގައި ޖޯޖިއާ އާ ދެކޮޅަށް ކުޅޭ މެޗެވެ. މި މެޗު ކުޅުމަށް ހަމަޖެހިފައިވަނީ މި މަހުގެ 26 ވާ ބުދަ ދުވަހުގެ ރޭ ރާއްޖޭގަޑިން 12 ޖަހާއިރު އެވެ.