ހުރިހާ އަތޮޅަކަށް ފަތުރުވެރިކަން ފުޅާކުރުމަށް ޚާއްޞަ ޕްލޭނެއް

ރާއްޖޭގެ ހުރިހާ ހިސާބަކަށްވެސް ފަތުރުވެރިކަން ފުޅާކޮށް ކުރިއެރުވުމަށް ޚާއްޞަ ޕްލޭންތަކެއް ރާވައި ތަންފީޒްކުރަން މަސައްކަތްކުރައްވަމުން ގެންދަވާކަމަށް ފަތުރުވެރިކަމާ ބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްއަށް ދެއްވި ހާއްސަ އިންޓަރވިއުއެއްގައެވެ.

ރާއްޖޭގެ ހުރިހާ ހިސާބަކަށް ފަތުރުވެރިކަން ފުޅާކުރުމަކީ ސަރުކާރުގެ އަމާޒެކެވެ. އަދި މި ދައުރު ނިމޭއިރު ކޮންމެ އަތޮޅެއްގައިވެސް ފަތުރުވެރިކަމުގެ އެނދު ވަކި ޢަދަދަކަށް ތަރައްޤީކުރުމުކީ ސަރުކާރުގެ ވައުދެކެވެ.

ފަތުރުވެރިކަމާއި ބެހޭ ވަޒީރު އިބްރާހީމް ފައިސަލް ވިދާޅުވީ، ފަތުރުވެރިކަން ނެތް ހިސާބުތަކަށް ފަތުރުވެރިކަން ފުޅާކުރުމަށްޓަކައި ކުރައްވާ އެންމެ މުހިންމު އެއް މަސައްކަތަކީ އެ ސަރަހައްދުތަކުގައި އިންވެސްޓުކުރާ ފަރާތްތަކަށް ލުއިތަކެއް ދިނުންކަމަށެވެ. މިކަމާއި ގުޅޭ މަޝްވަރާތައް މިހާރު ކުރަމުންދާކަމަށް ވަޒީރު ވިދާޅުވިއެވެ. އެގޮތުން ސަރުކާރުގެ ކަމާގުޅުންހުރި ފަރާތްތަކާއި ފަތުރުވެރިކަމުގެ ސިނާއަތުގެ އިސް ފަރާތްތަކާވެސް މަޝްވަރާކުރައްވާނެކަމަަށް ވަޒީރު ވިދާޅުވިއެވެ.

ވަޒީރުގެ ވާހަކަފުޅުގައި ހުރިހާ އަތޮޅަކަށް ފަތުރުވެރިކަން ފުޅާކުރުމުގައި ޤައުމީ އެއަރލައިން މޯލްޑިވިއަނަށްވެސް މުހިންމު ދައުރެއް އަދާކުރެވޭނެކަމަށް ދެކެވަޑައިގަންނަވާކަމަށް ވަނީ ވިދާޅުވެފައެވެ. އެކަމުގައި މޯލްޑިވިއަން ހަރަކާތްތެރިވާ ދުވަސް ދެކެން ބޭނުންވާކަމަށްވެސް ވަޒީރު ވިދާޅުވިއެވެ.

"އިކޮނޮމިކް ކައުންސިލަށްވެސް ހުށަހަޅާނަން، އަދި ރައީސާވެސް މަޝްވަރާކޮށް، އިކިއުޒިޝަން ކޯސްޓަށްވެސް ލުއިގޮތްތަކެއް އަދި ޓެކްސް ލުއިތަކެއް ދިނުން، އެއީ ޤާނޫނަށް އިސްލާޙު ގެނެސްގެން، މިކަމާއި އަދި ސިނާއަތުގެ ފަރާތްތަކާއިވެސް ވާހަކަދައްކާނަން،" ފަތުރުވެރިކަމާ ބެހޭ ވަޒީރު އިބްރާހީމް ފައިޞަލް ވިދާޅުވިއެވެ.

ފައިޞަލް ވިދާޅުވީ އަތޮޅެއްގައި ފަތުރުވެރިކަން ދެމެހެއްޓެނިވިގޮތެއްގައި ކުރިއަށް ގެންދިޔުމަށް 4000-6000 ދެމެދުގެ އަދަދަކަށް ފަތުރުވެރިކަމުގެ އެނދު ބޭނުންވާ ކަމަށެވެ.
މި ޢަދަދަށް ފަތުރުވެރިކަމުގެ އެނދުތައް ތަރައްޤީކުރުމުގައި ލޯކަލް ޓޫރިޒަމަށް އިސްކަން ދެއްވާނެ ކަމަށް ވަޒީރު ވިދާޅުވިއެވެ.

"ލޯކަލް ޓޫރިޒަމްގެތެރެއިން 2000 ބެޑު އުފެއްދުން، މިއީ ދިވެހި ޒުވާނުން އޯންކުރާ ތަންތަން، ދެން ވަން އައިލެންޑު ރިސޯޓުތަކުން އަނެއް 2000 ނޫނީ 3000 އުފެދިފަ. ދެން އެ އަތޮޅެއްގައި އިންޓަރނޭޝަން އެއަރޕޯޓެއް އަޅާ، ދެން ފުރުސަތު ލިބޭ ޑައިރެކްޓު ފްލައިޓް ގެނައުމަށް، މިއާ އެކު، މޯލްޑިވިއަން އިން ބޭރު ޤައުމުތަކުން ރާއްޖެއަށް ފަތުރުވެރިން ގެނެސް، ފައިދާވާ ކުންފުންޏަކަށް މޯލްޑިވިއަން ވެގެންދާނެ،" ފަތުރުވެރިކަމާ ބެހޭ ވަޒީރު އިބްރާހީމް ފައިޞަލް ވިދާޅުވިއެވެ.

ރާއްޖޭގެ ހުރިހާ ހިސާބަކަށްވެސް ފަތުރުވެރިކަން ފުޅާކުރުމަށް ޚާއްޞަ ޕްލޭންތަކާއެކު މަސައްކަތްކުރައްވަމުން ގެންދަވާކަމަށް ވަޒީރު ވިދާޅުވެފައިވާއިރު، އެ ވުޒާރައިން ގެންދަނީ ކޮންމެ އަތޮޅެއްވެސް ވަކި މަންޒިލެއްގެގޮތުގައި އިޝްތިހާރު ކުރުމަށްވެސް މަސައްކަތްކުރަމުންނެވެ.

ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ޗެއަރ ކުރައްވާ ވިޒިޓަރ އިކޮނޮމީ ކައުންސިލްގެ މަސައްކަތްތަކާއި ގުޅޭގޮތުން ވާހަކަފުޅު ދައްކަވަމުން ފަތުރުވެރިކަމާ ބެހޭ ވަޒީރު ފައިޞަލް ވިދާޅުވީ ރާއްޖޭގެ ފަތުރުވެރިކަން ސިންދަފާތުކުރުމާއި ގުޅޭ ކަރުދާހެއް މިހާރު އެ ކައުންސިލުން ފާސްކޮށްފައިވާކަމަށެވެ. އެގޮތުން ސްޕޯޓްސް ޓޫރިޒަމް، މެޑިކަލް ޓޫރިޒަމް، އަދި އެޑިއުކޭޝަނަލް ޓޫރިޒަމް ރާއްޖޭގައި ކުރިއެރުވުމާއި ގުޅޭގޮތުން ހުރި ފުރުސަތުތައް ބެލުމަށް ނިންމާފައިވާކަމަށް ފަތުރުވެރިކަމާ ބެހޭ ވަޒީރު އިބްރާހީމް ފައިޞަލް ވިދާޅުވިއެވެ.