"އެމީހުން ވަރަށް މޮޅު، ޕްރެސް ކުރުމަށާއި، އެމީހުންނާ ދެކޮޅަށް ޑިފެންސްކުރަން އުނދަގޫ. އެމީހުންގެ މޫވްމަންޓްވެސް ރަނގަޅު.އިންގްލެންޑްގެ ކޯޗު، ގަރެތު ސައުތުގޭޓް
ޔޫރޯ ފުޓްބޯޅަ މުބާރާތުގެ ކުއާޓާ ފައިނަލްގައި ރޭ ޕެނަލްޓީ ޖަހައިގެން ސްވިޒަލޭންޑް އަތުން 5-3 އިން މޮޅުވި މެޗަށްފަހު ދެއްކި ވާހަކައިގައި އިންގްލެންޑްގެ ކޯޗު، ގަރެތު ސައުތުގޭޓް ވަނީ، މިއީ އިންގްލެންޑުން މިދިޔަ ހަތަރު ފަހަރުގެ ތެރެއިން ސެމީ އަށް ދަތުރުކުރި ތިންވަނަ ފަހަރު ކަމަށާއި، މިހާ ހިސާބުން ނިންމާލަން ބޭނުންނުވާ ކަމަށް ބުނެފައެވެ.
މެޗަށްފަހު ބޭއްވި ނޫސްވެރިންގެ ބައްދަލުވުމުގައި ސައުތުގޭޓް ބުނީ، މުބާރާތް ފެށުނީއްސުރެ އިންގްލެންޑަށް ބޮޑު ޕްރެޝަރެއް އޮތް ކަމަށާއި، ރޭގެ މެޗުގައި އޭނާގެ ޓީމުން މޮޅު ކުޅުމެއްދެއްކި ކަމަށާއި، މިވަގުތަށް ބަލާއިރު މާގިނަ ލަނޑުތަކެއް ނުޖެހުނުނަމަވެސް މިދިޔަ ތިން މެޗުގައި ކުޅެން ޖެހުނީ ފަހަތަށް ފަސް ކުޅުންތެރިން ލައިގެން ކުޅޭ ޓީމުތަކާ ދެކޮޅަށް ކަމަށެވެ.
މިއީ މި މުބާރާތުގައި މިހާތަނަށް އިންގްލެންޑްގެ ފަރާތުން ފެނުނު އެންމެ މޮޅު ކުޅުން ކަމަށް ވެސް ސައުތުގޭޓް ފާހަގަކުރިއެވެ. އިންގްލެންޑުން މި މެޗުގައި އިދިކޮޅު ޓީމަށް ވަރަށް ގިނަ އުނދަގޫތައް ކުރިމަތިކުރުވި ކަމަށާއި، ސްވިޒަލޭންޑަކީ މޮޅު ޓީމެއް ކަމަށާއި، އެމީހުންނާ ދެކޮޅަށް ޑިފެންސްކުރަން އުނދަގޫވިއިރު ޕްރެސްކުރުމަށްވެސް ދަތިވި ކަމަށް ސައުތުގޭޓް ބުންޏެވެ.
"އަހަރެންނަށް ހީވަނީ ކުޅުންތެރިންގެ ފަރާތުން މޮޅު ކުޅުމެއް ފެނިގެންދިޔަހެން،" ސައުތުގޭޓް ބުންޏެވެ.
މެޗުގެ ވަކި ހިސާބަކުން އިތުރަށް ކުރިއަށްޖެހިގެން ކުޅެން ޖެހުނުއިރު ސަކާގެ އެހީ އާއެކު އިންގްލެންޑަށް އެޑްވާންޓޭޖެއް އޮތް ކަމަށާއި، އޭނާގެ ޓީމުން ފެނުނީ ރަނގަޅަށް ކުޅެ، ސްވިޒަލޭންޑަށް އުނދަގޫތައް ކުރިމަތިކުރުވި މަންޒަރު ކަމަށް ސައުތުގޭޓް ބުންޏެވެ.
މުޅި މެޗުގައި ވެސް އިންގްލެންޑްގެ ފަރާތުން މޮޅު ކުޅުމެއް ފެނިގެންދިޔައިރު ބޯޅަ ނެތް ދަނޑިވަޅުގައި ވެސް ރަނގަޅު ކުޅުމެއް ދައްކައި، ހަގީގީ ޑިސިޕްލިން އާއެކު ޑިފެންސްކުރި ކަމަށް ވެސް ސައުތުގޭޓް ވަނީ ބުނެފައެވެ.
އަނެއްކާވެސް ފަހަތުންއަރައި ކާމިޔާބުކުރި ގޯލުން އޭނާގެ ޓީމުގެ ކެރެކްޓާ ފެނިގެންގޮސްފި ކަމަށާއި، މުބާރާތެއް ކާމިޔާބުކުރެވެނީ ހަމައެކަނި މޮޅު ކުޅުމެއް ދައްކައިގެން ނޫން ކަމަށާއި، އެ މެޗުގައި ފެނިގެންދިޔަ ފަދަ ކަންތައްތަކަކީ ވެސް މުހިއްމު ކަންކަމުގެ ގޮތުގައި ސައުތުގޭޓް ފާހަގަކުރިއެވެ.
ހަމައެކަނި މޮޅަށް ކުޅެގެން ނުފުދޭ ކަމަށާއި، ބައެއް ފަހަރު މޮޅުވެވޭނެ އެހެން ގޮތްތައް ހޯދަން ޖެހޭ ކަމަށާއި، ކުރިން ރޭގައި ސްޕެއިނުގެ ފަރާތުން ވެސް އެފަދަ ކަމެއް ފެނިގެންދިޔަ ކަމަށާއި، މެޗުގައި އޭނާގެ ޓީމުން ދެއްކި ކުޅުމާ މެދު ފަޚުރުވެރިވާ ކަމަށް ވެސް ނިންމާލަމުން ސައުތުގޭޓް ބުންޏެވެ.
ސެމީގައި ނެދަލެންޑްސްއާ ދެކޮޅަށް އިންގްލެންޑް ނިކުންނާނީ މި މަހުގެ 10 ވާ ބުދަ ދުވަހުގެ ރޭ ރާއްޖޭގަޑިން 12 ޖަހާއިރު އެވެ.