ދެމެހެއްޓެނިވި ގޮތެއްގައި ސިޑްސްގެ ޤައުމުތަކަށް، ފައިސާގެ އެހީ ލިބެންޖެހޭ: ވަޒީރު ހައިދަރު

ސްމޯލް އައިލެންޑް ޑިވެލޮޕްމެންޓް ސްޓޭޓްސް، ސިޑްސްގެ ޤައުމުތަކަށް ދެމެހެއްޓެނިވި ގޮތެއްގައި ފައިނެންސް ލިބެންޖެހޭކަމަށް ގެދޮރުވެރިކަމާއި ބިމާއި ޢުމްރާނީ ތަރައްޤީއާބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވެއްޖެއެވެ.

ވަޒީރު މިހެން ވިދާޅުވީ އިތިއޯޕިއާގައި މިހާރު ކުރިއަށްދާ 4 ވަނަ ފައިނެންސިން ފޯ ޑިވެލޮޕްމެންޓް، އެފްއެފްޑީ ކޮންފަރެންސްގައި ރާއްޖެ ތަމްސީލްކުރައްވާ ވާހަކަފުޅު ދައްކަވަމުންނެވެ.

ވަޒީރުގެ ވާހަކަފުޅުގައި ވިދާޅުވީ މިހާރު ސިޑްސްގައި ހިމެނޭ ޤައުމުތަކަށް މާލީ އެހީތެރިކަން ދިނުމަށް އޮންނަ ނިޒާމު އިތުރަށް ހަރުދަނާކުރަންޖެހޭ ކަމަށާއި ދެމެހެއްޓެނިވި ގޮތެއްގައި މާލީ އެހީތެރިކަންދެވޭނެ ގޮތްތަކެއް އެކަށައަޅަންޖެހޭކަމަށެވެ.

މީގެއިތުރުން ޖަޒީރާ ޤައުމުތަކުގެ ތަރައްޤީގެ މަޝްރޫޢުތަކަށް މާލީ އެހީތެރިކަން ފޯރުކޮށްދިނުމާއި ސިޑްސްގެ ޤައުމުތަކަށް ކުރިމަތިވާ އެކިކަހަލަ ގޮންޖެހުންތަކުން އަރައިގަތުމަށް ޤާބިލްކަން އިތުރުކުރުމުގެ މުހިންމުކަމުގެ މައްޗަށްވެސް ވަޒީރު ޑރ. އަލީ ހައިދަރުގެ ވާހަކަފުޅުގައި އަލިއަޅުވާލެއްވިއެވެ.

Minister Dr. Ali Haidar joined as a panelist in the Ministerial Scene-Setter at the #FFD4. He stressed on the need to prioritize innovative financial mechanisms to tackle challenges in financial sustainability and close funding gaps.#FfD4#FfDDay pic.twitter.com/Iytlfltutu

— Ministry of Housing, Land and Urban Development (@MHLUDmv) July 22, 2024

މިދިޔަ މެއި މަހުގެ ތެރޭގައި ބޭއްވި 4 ވަނަ ސިޑްސް މަހާސިންތާގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުވެސް ވަނީ ޖަޒީރާ ޤައުމުތަކަށް މާލީ އެހީތެރިކަން ލިބެންޖެހޭކަމަށް ވިދާޅުވެ ވަކާލާތު ކުރައްވާފައެވެ.

އެގޮތުން ތަރައްޤީގެ ރޮނގުން އައު އުސްމިންތަކަށް ވާސިލުވުމަށް ކުދި ޖަޒީރާ ޤައުމުތަކަށް ބޭނުންވާ މާލީ އެހީތެރިކަން ފަސޭހައިން ލިބޭނެ އިންތިޒާމް ހަމަޖައްސަންޖެހޭ ކަމަށް ރައީސުލްޖުމްހޫރިއްޔާ ވިދާޅުވެފައިވެއެވެ.