ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް) އިން ކުރިއަށްގެންދާ އިންޓަ ސްކޫލް ޓޭބަލް ޓެނިސް (ޓީޓީ) މުބާރާތް 16 ސްކޫލާއި އެކު ބުރާސްފަތި ދުވަހު ފަށައިފިއެވެ.
މި ފަހަރުގެ މުބާރާތުގައި ބައިވެރިވެފައިވާ ސްކޫލްތަކަކީ، އަހުމަދިއްޔާ އިންޓަނޭޝަނަލް ސްކޫލް، އަމީނިއްޔާ ސްކޫލް، ބިލަބޮން ހައި އިންޓަނޭޝަނަލް ސްކޫލް، ބްރައިޓްވޭ އިންޓަނޭޝަނަލް ސްކޫލް، ގާޒީ ސްކޫލް، ގިޔާސުއްދީން އިންޓަނޭޝަނަލް ސްކޫލް، ހިރިޔާ ސްކޫލް، ހުރަވީ ސްކޫލް، އިމާދުއްދީން ސްކޫލް، އިސްކަންދަރު ސްކޫލް، ޖަމާލުއްދީން ސްކޫލް، މަޖީދިއްޔާ ސްކޫލް، ރެހެންދި ސްކޫލް، ތާޖުއްދީން ސްކޫލްގެ އިތުރުން ފުވައްމުލަކުގެ ދެ ސްކޫލް ކަމަށްވާ ފުވައްމުލަކު ސްކޫލް އާއި ހާފިޒް އަހުމަދު ސްކޫލެވެ.
ފަސް އުމުރުފުރާއެއްގައި ޓީމުތައް ވާދަކުރާ މި މުބާރާތުގައި 11 އަހަރުންދަށް، 13 އަހަރުންދަށް 15 އަހަރުންދަށް 17 އަހަރުންދަށް އަދި 19 އަހަރުންދަށް ވާދަކުރެއެވެ. މުބާރާތުގައި އަންހެން 19 ޓީމު ހިމެނޭއިރު ފިރެހެން 23 ޓީމު ވާދަކުރެއެވެ.
އޯޕަން އިވެންޓުތަކުގައި 11 އަހަރުން ދަށާއި 13 އަހަރުން ދަށުގެ އޮތީ ސިންގަލްސް އެކަންޏެވެ. އަދި، 15 އަހަރުން ދަށާއި 17 އަހަރުން ދަށާއި 19 އަހަރުން ދަށުގެ ކެޓަގަރީތަކުން، ސިންގަލްސް އާއި ޑަބަލްސް ވެސް ވާދަކުރާ ގޮތަށް ވަނީ ހަމަޖެހިފައެވެ.
މިފަހަރުގެ އިންޓަ ސްކޫލް ޓީޓީ މުބާރާތުގައި 600 އަށްވުރެ ގިނަ ކުޅުންތެރިން ހިމެނޭއިރު، މި މުބާރާތުގެ ކުޅުން މި މަހުގެ 10 ވަނަ ދުވަހުގެ ނިޔަލަށް ކުރިޔަށްދާނީ މާލޭ ޓީޓީ ހޯލުގައެވެ.