މަޖިލީހުން ޒިންމާދާރު އިދިކޮޅު ޕާޓީއެއް ނުފެނޭ: މެންބަރު އައިފާން

ރައްޔިތުންގެ މަޖިލީހުގައި މިހާތަނަށް ޒިންމާދާރު އިދިކޮޅު ޕާޓީއެއް ނުފެންނަކަމަށް ހެންވޭރު އުތުރު ދާއިރާގެ މެންބަރު އަޙްމަދު އައިފާން ވިދާޅުވެއްޖެއެވެ.

އައިފާން މިހެން ވިދާޅުވީ ޕީއެސްއެމް ނިއުސްގެ "ބާބު111" ޕްރޮގްރާމުގައި ވާހަކަދައްކަވަމުންނެވެ.

މަޖިލީހުގެ ހެންވޭރު އުތުރު ދާއިރާގެ މެންބަރު އަޙްމަދު އައިފާން ވިދާޅުވީ، މަޖިލީހުގައި ބައެއް މެންބަރުންގެ ފަރާތުން އަދިވެސް ރައްޔިތުން އެދޭ ގޮތަށް މަސައްކަތްކުރާ މަންޒަރު ނުފެންނަ ކަމަށެވެ. ޚާއްސަކޮށް މިހާރު އިދިކޮޅުގައި އޮތް އެމްޑީޕީގެ މެންބަރުން ރައްޔިތުންގެ މަޖިލިސް ސިޔާސީ ޖަގަހައަކަށް ހެދުމަށް މަސައްކަތް ކުރަމުން އަންނަކަމަށް ވިދާޅުވިއެވެ.

އިދިކޮޅުގެ މެންބަރުން ހުށަހަޅުއްވާ ކުއްލި މައްސަލަތަކަށް އިޝާރާތް ކުރައްވައި އައިފާން ވިދާޅުވީ، ކުއްލި މައްސަލަތައް ހުށަހެޅުމަކީ ޒިންމާދާރުވުން ނޫން ކަމަށެވެ. އެގޮތުން، މަޖިލީހުގައި ކުރަންހުރި ރައްޔިތުންނަށް ފައިދާވާނެ އެތައް ކަމެއް ހުރިއިރު މަޖިލީހުގެ ވަގުތު ބޭކާރު ކުރުމަށް އެކިއެކި ކުއްލި މައްސަލަތައް ހުށަހަޅާ ކަމަށާއި، ރައްޔިތުންނަށް އޮޅުވާލުމުގެ ގޮތުން މަސައްކަތް ކުރާކަމަށްވެސް އައިފާން ވިދާޅުވިއެވެ.

އައިފާން ވިދާޅުވީ، ކޮންމެ މަޖިލީހެއްގައިވެސް ރައްޔިތުން ސަރުކާރަށް މެޖޯރިޓީ ދެނީ ސަރުކާރުން ރައްޔިތުންނަށްޓަކައި ކުރަން ބޭނުންވާ ކަންކަމުގައި އެއްބާރުލުންދިނުމުގެ ބޭނުމުގައި ކަމަށެވެ. އަދި ރައްޔިތުން މެންބަރުންނަށް ވޯޓުދިނީ އެ ރައްޔިތުންނާ ގުޅޭ މުހިންމު މައްސަލަތަކާއި ދަތިތަކަށް ޤާނޫނީ ހައްލުތައް ހޯދައިދިނުމަށް ކަމަށާއި، އެގޮތުގައި މަސައްކަތްކުރުމުގައި ޕީއެންސީގެ މެންބަރުން އަބަދުވެސް މަސައްކަތް ކުރައްވާނެ ކަމަށް އައިފާން ވިދާޅުވިއެވެ.

"ރައްޔިތުންގެ މަސްލަހަތު ހިމެނޭމަމަ އަޅުގަނޑުމެން ގަބޫލުކުރަމޭ. އެމްޑީޕީ މެންބަރަކުވެސް ކަންބޮޑުވާ މައްސަލައަކަށްވަންޏާ އަޅުގަނޑުމެންވެސް ކަންބޮޑުވާނެއޭ. ޤައުމަށް ދިމާވެފައިވާ ދައްޗެއް ނުވަތަ ޤައުމުގެ ކޮންމެ ރައްޔިތަކަށް ދިމާވާ ދަތި އުނދަގުލެއް ދިމާވެއްޖެއްޔާ އަޅުގަނޑުމެންވެސް އެކަމާ ކަންބޮޑުވާނެ،" އައިފާން ވިދާޅުވިއެވެ.

އައިފާން ވިދާޅުވީ، އެމްޑީޕީގެ މެންބަރުން ހުށަހަޅުއްވާފައިވާ ރައްޔިތުންނާ ގުޅުންހުރި މުހިންމު ކުއްލި މައްސަލަތައް މިހާރުވެސް ޕީއެންސީގެ މެޖޯރިޓީ އޮތް މަޖިލީހުން ބަލައިގަންނަ ކަމަށެވެ. ނަމަވެސް އެމްޑީޕީގެ މެޖޯރިޓީ އޮތް 19ވަނަ މަޖިލީހުން ޕީޕީއެމްގެ މެންބަރުން ހުށަހެޅި މުހިންމު އެތައް މައްސަލަތައް ބޭރުކޮށްލިކަން މެންބަރު ފާހަގަކުރެއްވިއެވެ.

20 ވަނަ މަޖިލީހުގައި މައިނޯރިޓީއަށް ފުރުޞަތު ލިބޭނެކަން ފާހަގަކުރައްވައި ހެންވޭރު އުތުރު ދާއިރާގެ މެންބަރު އަޙްމަދު އައިފާން ވިދާޅުވީ، މަޖިލީހުގެ މި ދައުރުގައި ތަފާތު ދައްކާނެ ކަމަށެވެ.