ލިވަޕޫލަށް ކުޅެމުން އަންނަ ނެދަލެންޑްސްގެ ޑިފެންޑަރު، ވާޖިލް ވެން ޑައިކް ވަނީ، މި މަހުގެ ތެރޭގައި ޓްރާންސްފާ ބާޒާރު ބަންދުވުމުގެ ކުރީން އެ ކްލަބުން ސްކޮޑަށް އިތުރު ކުޅުންތެރިން ގެންނަންޖެހޭ ކަމަށާއި، އެކަން އެގޮތަށް ކުރާނެކަމުގެ ޔަގީންކަން އެބައޮތް ކަމަށް ބުނެފައެވެ.
ވެން ޑައިކް މިހެން ބުނީ، އެންފީލްޑްގައި އައު ކޯޗު، އާނޭ ސްލޮޓްގެ އިރުޝާދުގެ ދަށުން ލިވަޕޫލް ކުޅުނު ފުރަތަމަ މެޗުގައި ސެވިއްޔާއާ ދެކޮޅަށް 4-1 އިން ކާމިޔާބު ކުރުމަށްފަހުއެވެ.
މިފަހަރުގެ ސީޒަނަށް މިހާތަނަށް ކުޅުންތެރިއަކު ގެނެސްފައިނުވާ ހަމައެކަނި ޕްރިމިއާ ލީގުގެ ޓީމަކީ ލިވަޕޫލެވެ. އައު ކޯޗު، އާނޭ ސްލޮޓްގެ އިރުޝާދުގެ ދަށުން ޕްރީ-ސީޒަންގައި އެ ޓީމުން އަންނަނީ މޮޅު ކުޅުމެއްދައްކަމުންނެވެ. އެހެންކަމުން، މިވަގުތު ސްލޮޓް ދަނީ އެ ޓީމުގެ ސްކޮޑު އެންމެ ރަނގަޅަށް އެސެސްކުރަމުންނެވެ.
ލިވަޕޫލުން މިހާތަނަށް ކުޅުންތެރިއަކުގެ ސޮއި ހޯދާފައިނުވީނަމަވެސް، ފަހުގެ މީޑިއާ ހަބަރުތައް ބުނާގޮތުން، އެޓީމުން އަންނަނީ މިޑްފީލްޑްގެ ނަންބަރު 6 ގެ މަގާމަށް ކުޅޭނެ ކުޅުންތެރިއަކު ހޯދުމުގެ މަސައްކަތްކުރަމުންނެވެ. އެގޮތުން، މިހާރު އެ ކްލަބުގެ އަމާޒަކީ ސްޕެއިނުގެ ރެއާލް ސޮސިއެޑާޑްގެ މިޑްފީލްޑަރު، މާޓިން ޒުބިމެންޑީ ކަމަށް ހަބަރުތައް ބުނެއެވެ.
ލިވަޕޫލްގެ ޓްރާންސްފާތަކާ ގުޅޭގޮތުން ވެން ޑައިކް ވަނީ، މިފަހަރުގެ ސީޒަނުގައި ޔުއެފާ ޗެމްޕިއަންސް ލީގުގެ ފޯމެޓަށް ގެނައި ބަދަލުތަކާއެކު ހުރިހާ މުބާރާތެއްގައި އެ ކްލަބުން އެންމެ ރަނގަޅަށް ވާދަކުރުމަށް މިހާރުގެ ސްކޮޑު ވަރުގަދަނަމަވެސް، އިތުރު ކުޅުންތެރިން ގެންނަންޖެހޭ ކަމަށާއި، އެކަން ކުރާނެ ކަމަށް ބުނެފައެވެ.
"އަހަރެން ވަރަށް ޕޮޒިޓިވް. އަހަރެން ވަރަށް ބޮޑު އިތުބާރެއް އެބައޮތް. ސީޒަން ދިގުދެމިގެންދާނެ މިންވަރަކަށް ބަލައި، ލިވަޕޫލުން ބައެއް ކުޅުންތެރިން ގެންނަންޖެހޭނެ ކަމަށް އަހަރެން ދެކެން،" ވެން ޑައިކް ބުންޏެވެ.
ވެން ޑައިކް ބުނީ، އޭނާ އަށް ހީވާގޮތުގައި ލިވަޕޫލުން ފަރުދާގެ ފުރަގަހުގައި ގިނަ ކަންތައްތަކެއް ކުރަމުން އަންނަ ކަމަށާއި، އެންމެ ރަނގަޅު ސްކޮޑެއް ބިނާކޮށް ހުރިހާ މުބާރާތެއްގައި ރަނގަޅު ވާދައެއްކުރުމަށް ބުރަކޮށް މަސައްކަތްކުރާ ކަމަށެވެ. އަދި އެކަމުގެ ފުރިހަމަ އިތުބާރާއި ޔަގީންކަން އެބައޮތް ކަމަށާއި، ކުރިއަށް އޮތް ތާނގާއި، ވާގޮތެއް ބަލަން ތިބެމާ ހިނގާށޭ ވެސް ވެން ޑައިކް ވަނީ ބުނެފައެވެ.
ލިވަޕޫލްގެ ޓްރާންސްފާ ހަރަކާތްތަކުގެ އަޕްޑޭޓެއް ދިނުމަށް އެދުމުން، ސްލޮޓް ބުނީ، "އަޅުގަނޑުމެން ކަހަލަ ކުލަބަކުން އަބަދުވެސް ސްކޮޑު ވަރުގަދަ ކުރެވޭތޯ ބަލަމުން ދަނީ. އެކަމަކު ސްކޮޑު ވަރުގަދަ ކުރުމަކީ އެހާ ފަސޭހަ ކަމެއް ނޫން، މިއަދުގެ ދެ މެޗުން ވެސް އެކަން ފެނިގެންގޮސްފި."
ލިވަޕޫލްގެ ކޯޗު، ސްލޮޓް ބުނީ، އޭނާ ކުރިންވެސް އެކި ފަހަރުމަތީން ބުނެފައިވާ ފަދައިން މިވަގުތު އެ ކްލަބުގައި އޮތީ ވަރުގަދަ ޓީމެއް ކަމަށާއި، ޓްރާންސްފާ ބާޒާރުގައި އެ ޓީމަށް ކަމެއް ކުރެވިދާނެ ކަމަށް ގަބޫލުކުރެވިއްޖެނަމަ ސްކޮޑް ވަރުގަދަ ކުރުމުގެ ގޮތުން އެކަމެއް ކުރާނެ ކަމަށެވެ. އެކަމަކު، އެކަން ކުރެވޭނީ އެއީ ކުރެވިދާނެ ކަމަށް ގަބޫލުކުރެވޭނަމަ އެކަނި ކަމަށް ވެސް ސްލޮޓްގެ ވާހަކައިގައި ފާހަގަކުރިއެވެ.
އައު ސީޒަނުގެ ލީގުގައި ލިވަޕޫލުން ކުޅޭ ފުރަތަމަ މެޗުގައި އަންނަ ހަފްތާގައި ނިކުންނާނީ ރަށުން ބޭރުގައި އިޕްސްވިޗް ޓައުންއާ ދެކޮޅަށެވެ.