މެންޗެސްޓާ ސިޓީން ފައިނޭންޝިއަލް ފެއާޕްލޭ (އެފްއެފްޕީ)އާ ގުޅޭ ކަންކަމާ ހިލާފުވެފައިވާ 115 މައްސަލައެއް ބަލަމުން އަންނައިރު، މިހާރު މި މައްސަލަތަކުގެ އަޑުއެހުން ބާއްވައި ޖަވާބުދާރީވުމުގެ ވަގުތު އައިސްފައިވާކަމަށް ޕްރިމިއާ ލީގުގެ ސީއީއޯ، ރިޗަޑް މާސްޓާސް ވިދާޅުވެއްޖެއެވެ.
މާސްޓާސް މިހެން ވިދާޅުވީ، ދާދިފަހުން ބީބީސީ އަށް ދިން އިންޓަވިއު އެއްގައެވެ.
"މިހާރު މިވަނީ މި މައްސަލަ ނިމުމަކަށް އަންނަންވީ ވަގުތު އައިސްޖެހިފަ." މާސްޓާސް ވިދާޅުވިއެވެ.
އަދި މި މައްސަލަ ވަނީ އެތައް އަހަރަކަށް ދިގުދެމިގެންގޮސްފައި ކަމަށާއި، މި މައްސަލަ އަޑުއަހައި ޖަވާބުދާރީވާންޖެހޭ ކަމީ ވަރަށް ސާފުކޮށް އެނގޭ ކަމެއް ކަމުގައި ދެކޭ ކަމަށްވެސް މާސްޓާސް ވަނީ ވިދާޅުވެފައެވެ.
މާސްޓާސް އިތުރަށް ވިދާޅުވީ، މި މައްސަލައިގެ އަޑުއެހުން ނިންމާލުމަށްފަހު، ނިންމިގޮތް ޝާޢިއުކުރެވިގެންދާނެ ކަމަށާއި، އަދި އެކަމާ ގުޅޭގޮތުން ޖަވާބުހޯދަން ބޭނުންވާ ސުވާލުތަކަށް އެ ޕްރޮސެސްގެ ތެރެއިން ޖަވާބުލިބިގެންދާނެ ކަމަށެވެ.
ސިޓީން 2009 އިން 2018 އާ ދެމެދު އެފްއެފްޕީގެ ގަވާއިދާ ހިލާފުވެފައިވާ ކަމަށް ބުނެ، މި ދަޢުވާތައް ކުރެވުނީ މިދިޔަ އަހަރުގެ ފެބްރުއަރީ މަހުގައެވެ. އެއީ އަބޫދާބީ-ސިޓީ ފުޓްބޯޅަ ގްރޫޕުން ކުލަބު ގަތް ފަހުން މާލީ ގަވާއިދުތަކާ ޚިލާފުވެފައިވާ ކަމަށް ތުހުމަތުކުރެވޭ 115 މައްސަލައެވެ. އަދި މި މައްސަލަތައް މިނިވަން ކޮމިޝަނަކުން މިހާރު އަންނަނީ ދިރާސާކޮށް، ބަލަމުންނެވެ.
މި މައްސަލަތަކުގައި ކުށްވެރިވެއްޖެނަމަ، ދެވޭނެ އެންމެ ބޮޑު އަދަބެއްގެ ގޮތުން ސިޓީއަށް ޕޮއިންޓް އުނިކުރުން ނުވަތަ ދަށު ލީގަކަށް ވެއްޓުމާ ކުރިމަތިލާން ޖެހިދާނެއެވެ. މިހާތަނަށް ސިޓީން ދަނީ އެއްވެސް ކުށެއް ކޮށްފައިވާކަމަށް ދެކޮޅުހަދައި، މި ދަޢުވާތަކާ ދެކޮޅަށް މަސައްކަތްކުރަމުންނެވެ. މި މައްސަލައިގައި އަދި އެއްވެސް ނިންމުމެއް ނިންމާފައެއް ނުވެއެވެ.
މި މައްސަލަތަކާ ގުޅޭގޮތުން، ދާދިފަހުން ދި ޓައިމްސް އިން ރިޕޯޓުކޮށްފައިވަނީ، ސިޓީއާ ދެކޮޅަށް ކުރެވިފައިވާ މި ތުހުމަތުތަކުގެ އަޑުއެހުން ފެށުމަށް ހަމަޖެހިފައިވަނީ ސެޕްޓެމްބަރު މަހުގައި ކަމަށާއި، އެކަމާ ގޮތެއް ނިންމާނީ އަންނަ އަހަރުގެ ކުރީކޮޅު ކަމަށެވެ.
އެ ކުލަބުގެ މައްޗަށް މި ބޮޑު ކަޅު ވިލާގަނޑު އެޅިފައިވީ ނަމަވެސް، ސިޓީން ވަނީ 2022-23 ވަނަ އަހަރުގެ ސީޒަނުގައި ޓްރެބަލް ހޯދުމަށްފަހު، ވިދިވިދިގެން ހަތަރުވަނަ ފަހަރަށް ލީގު ކާމިޔާބުކޮށްފައެވެ.
އައު ސީޒަނުގައި އެ ޓީމުން ކުޅޭ ފުރަތަމަ މެޗުގައި މި އޮގަސްޓް މަހުގެ 18 ވަނަ ދުވަހު ރަށުން ބޭރުގައި ނިކުންނާނީ ޗެލްސީއާ ދެކޮޅަށެވެ.