ފަތުރުވެރިކަން ފުޅާކުރުމަށް ކަރުދާހެއް އެކުލަވާލާ ކެބިނެޓަށް ހުށަހަޅަނީ

ރާއްޖޭގެ އެކި ހިސާބުތަކުގައި ފަތުރުވެރިކަން ފުޅާކުރުމުގައި އަމަލުކުރާނެގޮތްތަކާއި ގުޅޭ ކަރުދާހެއް ކެބިނެޓަށް ހުށަހެޅުމަށް ތައްޔާރުވަމުންދާ ކަމަށް ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ.

ވަޒީރު މިހެން ވިދާޅުވީ ރާއްޖޭގައި ބާއްވާ އެންމެ ބޮޑު ޓްރެވަލް ޓްރޭޑު ފެއަރ ފެށުމުގެ ރަސްމިއްޔާތު ޝަރަފްވެރިކޮށްދެއްވާ ދެއްކެވިވާހަކަފުޅުގައެވެ.

މިއަހަރުގެ ޓީޓީއެމް މޯލްޑިވްސް ކުރިއަށްދާނީ މިމަހުގެ 21 އިން 22 އަށް މީރުމާގައެވެ. ޓީޓީއެމް ފެއަރގައި ވާހަކަދައްކަވަމުން ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް ވިދާޅުވީ ފަތުރުވެރިކަން ކުރިއެރުވުމުގައި މިދާއިރާގައި މަސައްކަތްކުރާ ފަރާތްތަކުން ސަރުކާރާއި ގުޅިގެން މަސައްކަތްކުރުން މުހިންމު ކަމަށެވެ.

ސަރުކާރުން މަސައްކަތްކުރަމުންދަނީ ފަތުރުވެރިކަން އިތުރަށް ފުޅާކުރުމަށް ކަމަށާއި މި މަސައްކަތުގެދަށުން، ރާއްޖޭގައި ފަތުރުވެރިކަން ނެތް ހިސާބުތަކަށް ފަތުުރުވެރިކަން ގެންދިޔުމަށް ޚާއްސަ ޕްލޭންތަކެއް ކުރައްވަމުންދާ ކަމަށް ވަޒީރު ވިދާޅުވިއެވެ.

އަދި މި މަސައްކަތުގެދަށުން ކެބިނެޓަށް އެކަމާއި ގުޅޭ ކަރުދާހެއް ހުށަހެޅުމަށް ތައްޔާރުވަމުންދާ ކަމަށް ވަޒީރު ވިދާޅުވިއެވެ.

"މިހާރު މިދަނީ ކެބިނެޓު ޕޭޕަރެއް ރާއްޖޭގެ ޓޫރިޒަމް ކުރިއަށް އޮތް 5 އަހަރަށް ނުވަތަ 15-20 އަހަރަށް، ރާއްޖޭގެ ފަތުރުވެރިކަން ނެތް ހިސާބުތަކަށް ފަތުރުވެރިކަން ގެންދާނެ ގޮތްތައް އަދި ކޮންމެ އަތޮޅެއްގައި ފަތުރުވެރިކަން ފުޅާކުރާނެ ގޮތް، އަދި އެއަރލައިންތަކުގެ ޑައިރެކްޓު ފްލައިޓުތައް ގެންދިޔުމާއި ގުޅޭގޮތުންވެސް މި ކަރުދާހުގައި ބަލާލާނެ،" ވަޒީރު ވިދާޅުވިއެވެ.

ވަޒީރު ފައިސަލް ވިދާޅުވީ ފަތުރުވެރިކަން މުޅި ރާއްޖެއަށް ފުޅާކުރުުގައި ގޮންޖެހުންތަކެއް އެބަހުރިކަމަށެވެ. އަދި އެގޮންޖެހުންތައް ދެނެގަނެ އެކަންކަމަށް ހައްލު ގެނައުމަށް ސަރުކާރުން ބޭނުންވާ ކަމަށެވެ. އަދި މި މަސައްކަތުގައި ޤައުމީ އެއަރލައިން މޯލްޑިވިއަންއަށް މުހިންމު ދައުރެއް އަދާކުރެވޭނެކަން ވަޒީރު ފާހަގަކުރެއްވިއެވެ.

ރާއްޖެއަށް އަންނަ ފަތުރުވެރިންގެ އަދަދު އިތުރުވަމުންދާއިރު، މިހާރު ކުރެވެމުންދާ މަސައްކަތްތަކުން މި 5 އަހަރު ނިމޭއިރު 3 މިލިޔަން ނުވަތަ 3.5 މިލިޔަނަށް އިތުރުވާނެކަމަށެވެ. މީގެ އިތުރުން ފަތުރުވެރިކަމުން ލިބޭ އާމްދަނީވެސް މިއަހަރު އިތުރުވެފައިވާކަން ވަޒީރު ފާހަގަކުރެއްވިއެވެ.

"ރެވެނިއު މި ދަށްވާކަން ފާހަގަކުރެވޭ، އެހެން ނަމަވެސް މިދިޔަ އަހަރާއި އަޅާ ބަލާއިރު މިއަހަރު ރެވެނިއުވަނީ އިތުރުވެފައި، އެހެން ނަމަވެސް ހަމަ އަދިވެސް ގިނަ މަސައްކަތްތަކެއް ކުރަން އެބަޖެހޭ ރާއްޖެ ޕްރޮމޯޓުކުރުމުގައި،" ފަތުރުވެރިކަމާ ބެހޭ ވަޒީރު ވިދާޅުވިއެވެ.

ވަޒީރު ވަނީ ފަތުރުވެރިކަމުގެ ދާއިރާގައި މަސައްކަތްކުރައްވާ ފަރާތްތަކުން މި ދާއިރާއިން ކުރިއެރުން ހޯދުމަށް ގުޅިގެން މަސައްކަތްކޮށް، ޑޭޓާތައް ހިއްސާކުރުމަށް އެދިވަޑައިގަންނަވާފައެވެ.