ރައްކާތެރި ނޫންގޮތުގައި ކާބޯތަކެތި ތައްޔާރު ކުރަމުންދިޔަ 3 ތަނެެއް ބަންދުކޮށްފި

ރައްކާތެރި ނޫންގޮތުގައި ކާބޯތަކެތި ތައްޔާރު ކުރަމުންދިޔަ 3 ތަނަކަށް ސިއްޙަތާބެހޭ ވުޒާރާއިން ނޯޓިސް ދީފިއެވެ.

ސިއްޙަތާބެހޭ ވުޒާރާއިން ނޯޓިސް ދީފައިވަނީ ސާފުތާހިރު ނޫން ތަންތަނުގައި ކާބޯތަކެތި ތައްޔާރުކުރާ ފަރާތްތަކާއި ދެކޮޅަށް ފިޔަވަޅު އެޅުމަށް މިދިޔަ އަންގާރަ ދުވަހު ޞިއްޙީ ވުޒާރާއިން ކުރިއަށް ގެންދިޔަ އިސްޕެކްޝަނަކަށްފަހުއެވެ.

ސިއްޙަތާބެހޭ ވުޒާރާއިން ވިދާޅުވީ މިދިޔަ އަންގާރަ ދުވަހު ކުރިއަށްގެންދިޔަ އިންސްޕެކްޝަންގައި 6 ތަނެއް ބަލައި ފާސްކޮށްފައިވާ ކަމަށެވެ. އަދި މި 6 ތަނުގެ ތެރެއިން 3 ތަނަކަށް ނޯޓިސް ދީފައިވަނީ އެތަންތަނުގެ ޢާންމު ސާފުތާހިރުކަން ދަށްވެ، ޢާންމު ޞިއްޙަތަށް ނުރައްކާވެދާނޭ ޙާލަތެއް މެދުވެރި ވެދާނެތީކަމަށް އެ ވުޒާރާއިން ވިދާޅުވެއެވެ.

ނޯޓިސް ދީފައިވާ 3 ތަނަކީ މެމްބަރ ހޮޓެލް / މ.ކަފަގަސްދޮށުގެ، ދަ ކެބިން ( ޓޭކްއަވޭ ) / މ. ހަނީ ސަކުލް އަދި މއ.ހަނީ ސަކުލްގައި ރަޖިސްޓްރީނުކޮށް ހިންގަމުން ދިޔަ ބަދިގެތަކަކަށެވެ.

މި ނޯޓިސްއާއެކު އެ ތަންތަނުގައި ކާބޯތަކެތި ތައްޔާރުކުރުން ވަނީ ހުއްޓުވާފައެވެ. އަދި އެތަންތަނުން އަލުން ޚިދުމަތް ކުރިޔަށް ގެންދެވޭނީ އެފަރާތްތަކުން ރަނގަޅު ކުރަންޖެހޭ ކަންކަން ރަނގަޅު ކުރުމަށްފަހު އެކަން ޞިއްޙީ ވުޒާރާއިން ކަށަވަރުކުރުމަށްފަހުކަމަށެވެ.

ރައްކާތެރި ނޫން ގޮތުގައި ކާބޯތަކެތި ތައްޔާރުކުރާ ތަންތަން ދެނެގަތުމަށް އިންސްޕެކްޝަން ކުރިއަށް ގެންދަނީ މޯލްޑިވްސް ފުޑް އެންޑް ޑްރަގް އޮތޯރިޓީއާއި ހެލްތު ޕްރޮޓެކްޝަން އެޖެންސީ، ޞިއްޙީ ވުޒާރާ އަދި މާލޭ ސިޓީ ކައުންސިލް ގުޅިގެންނެވެ.

މި މަސައްކަތުގެ ދަށުން ޞިއްޙީ ވުޒާރާއިން ވަނީ ރައްކާތެރި ނޫން ގޮތުގައި ކާބޯތަކެތި ތައްޔާރުކޮށް ވިއްކަމުން ގެންދިޔަ ހުޅުމާލޭގެ 10 ތަނެއް، ރައްކާތެރި މިންގަނޑަށް ފެއްތުމަށް އަންގާ ނޯޓިސް ދީފައެވެ. މި ތަންތަނަށް ނޯޓިސް ދީފައިވަނީ މިދިޔަ ހަފްތާގައި ކުރިއަށްގެންދިޔަ އިސްޕެކްޝަނަކަށްފަހުއެވެ.

ރައްކާތެރި ނޫން ގޮތުގައި ބިދޭސީން ކާބޯތަކެތި ތައްޔާރުކުރަމުންދާ ތަންތަން ދެނެގަތުމަށް މޯލްޑިވްސް އިމިގްރޭޝަނުންވެސް ދަނީ ހާއްސަ މަސައްކަތްތަކެއް ކުރަމުންނެވެ. ރައްކާތެރި ނޫން ގޮތުގައި ކާބޯތަކެތި ތައްޔާރުކުރާ މައްސަލަ ޙައްލުކުރުމަށް ކާބޯތަކެތީގެ ރައްކާތެރިކަމުގެ ޤާނޫނަށްވެސް ވަނީ އިސްލާޙުތަކެއް ގެނެސްފައެވެ. އެގޮތުން ކާބޯތަކެތި އުފައްދާ ތަންތަން އައު ޤާނޫނުގެ ދަށުން މޯލްޑިވްސް ފުޑް އެންޑް ޑްރަގް އޮތޯރިޓީ، އެމްއެފްޑީއޭގައި ރަޖިސްޓްރީ ކުރަންޖެހެއެވެ.