މ.ރަބީއުވިލާ ތަޅާލުމުގެ މަސައްކަތް ނިންމާލައިފި؛ މަގު މިރޭ ހުޅުވާލާނެ

މީހުން ދިރިނޫޅެވޭވަރަށް ބާވެ، ވެއްޓެން ކައިރިވެފައި ހުރި މ.ރަބީއުވިލާ ތަޅާލުމުގެ މަސައްކަތް ނިންމާލައިފިއެވެ.

ރަބީއުވިލާ ތަޅާލުމުގެ މަސައްކަތް، ސިޓީތަކާއި އިދާރީ ދާއިރާތަކާއި އާންމު ޚިދުމަތްތަކާ ބެހޭ ވުޒާރާއިން ކުރައްވާފައިވަނީ، ގޭގެ ވެރިފަރާތުގެ އެދުމުގެ މަތިން ރައީސުލްޖުމްހޫރިއްޔާގެ އިސްނެންގެވުމާއެކުއެވެ.

މ. ރަބީއުވިލާއަކީ މީހުން ދިރިއުޅުމަށް ކަމުނުދާ ވަރަށް ވީރާނާވެފައިވާ ގެއެކެވެ. އަދި އެގޭގައި އަލިފާނުގެ ހާދިސާއެއް މިފަހުން ހިނގާފައިވާއިރު، ކުއްތަކަށް އަރައިގަތުމަށްވެސް އެގެ ބޭނުން ކުރަމުން ގޮސްފައިވާ ކަމަށް ކަމާއި ބެހޭ ފަރާތްތަކުންވެސްވަނީ ވިދާޅުވެފައެވެ. މީގެއިތުރުން އިމާރާތުގެ ހާލަތު ގޯސްވެ މަގުން ހިނގާފައި ދާ މީހުންނަށާއި އުޅަނދުތަކަށްވެސް އެގެވެފައި އޮތީ ނުރައްކަލަކަށެވެ.

6 ފަންގިފިލާއަށް އުވައިން ހަދާފައި ހުރި މި ގެ ތަޅާލުމުގެ މަސައްކަތް ސިޓީތަކާއި އިދާރީ ދާއިރާތައް ހިންގުމާއި ބެހޭ ވުޒާރާ އިސްވެ އޮވެ ފެއްޓެވީ މިމަހުގެ 17 ވަނަ ދުވަހުއެވެ.

މިމަސައްކަތް ކުރިއަށް ގެންދިޔަ ގޮތާއި ގުޅޭގޮތުން، އިދާރީ ދާއިރާތަކާއި އާންމު ޚިދުމަތްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވީ، މިމަސައްކަތް ކުރުމަށް 14 ދުވަސް ހޭދަވި ކަމަށެވެ.

"އަޅުގަނޑުމެން މިމަސައްކަތް މި ކުރީ 14 ދުވަހުގެ ތެރޭގައި. ހުކުރު ދުވަހު މަސައްކަތް ނުކުރަން. އެހެންނަމަވެސް މިފަދަ މަސައްކަތްތަކާއި ބަލާ ވަރަށް އަވަހަށް ނިންމާލެވިފައި މިވަނީ. ރައީސުލްޖުމްހޫރިއްޔާގެ އިސްނެންގެވުމުގެ މަތިން ކުރިއަށް ގެންދިޔަ މަސައްކަތަކަށްވާއިރު، މިސަރަހައްދުގައި ދިރިއުޅޭ ރައްޔިތުންގެ ފުށުން އަޅުގަނޑުމެންނަށް ވަރަށް ބޮޑަށް އެއްބާރުލުން ލިބުނު" ވަޒީރު އާދަމް ޝަރީފް އުމަރު ވިދާޅުވިއެވެ.

ރަބީއުވިލާ ތަޅާލުމުގެ މަސައްކަތް ނިންމާލާފައިވާއިރު، މިހާރު ކުރިއަށްދަނީ އެ ބިން ސާފު ކުރުމުގެ މަސައްކަތެވެ. އެގެ ތަޅާލުމުގެ މަސައްކަތް ކުރިއަށް ގެންދިޔައީ މަގު ބަންދުކޮށްގެންނެވެ. މިމަގު އުޅަނދުތަކަށް ދަތުރުކުރެވޭ ގޮތަށް މިރޭ ހުޅުވާލެވޭނެ ކަމަށް އިދާރީ ދާއިރާތަކާއި އާންމު ޚިދުމަތްތަކާ ބެހޭ ވުޒާރާއިން ވިދާޅުވެއެވެ.

މާލޭގައި ހުރި ވީރާނާވެފައިވާ މިފަދަ ގެތަކާއި މެދު ޢަމަލު ކުރާނެ ގޮތެއް ބަލަމުންދާ ކަމަށް ސަރުކާރުން ވަނީ ހާމަކުރައްވާފައެވެ.