ހޮޅުދޫގައި 50 އަހަރުގެ އަންހެނަކު ޒަހަމްތަކާއެކު މަރުވެފައި އޮއްވައި ފެނިއްޖެ

ނ. ހޮޅުދޫގައި 50 އަހަރުގެ އަންހެނަކު ޒަހަމްތަކާއެކު މަރުވެފައި އޮއްވައި ފެނިއްޖެއެވެ.

ދިވެހި ފުލުހުންގެ ޚިދުމަތުން ވިދާޅުވީ، ޒަހަމްތަކާއެކު އަންހެނަކު އޮތްކަމަށް މިއަދު ހެނދުނުގެ ވަގުތެއްގައި ރިޕޯޓް ލިބިފައިވާ ކަމަށެވެ. އެ ރިޕޯޓާ ގުޅިގެން ފުލުހުން އެޓެންޑުވެ އަންހެން މީހާ އެ ރަށުގެ ހެލްތު ސެންޓަރަށް ގެންދިޔަ ކަމަށް ވިދާޅުވެއެވެ.

ހެލްތު ސެންޓަރަށް ގެންދިޔަ އިރުވެސް އަންހެން މީހާ މަރުވެފައިވާކަމަށް އެ ސެންޓަރުން މައުލޫމާތު ދެއްވާފައިވާކަމަށް ފުލުހުން ވިދާޅުވެއެވެ.

ޕީއެސްއެމް ނިއުސްއަށް މަޢުލޫމާތު ލިބިފައިވާގޮތުގައި އެ އަންހެން މީހާ ފެނިފައިވަނީ އެރަށު ނިއުލައިފް ނަމަކަށް ކިޔާ ގެއެއްގެ ގުދަން ތެރެއިންނެވެ. ޒަހަމްތަކަކާއެކު އޭނާ ފެނިފައިވަނީ އެގެއަށް މިއަދު ހެނދުނު 9:30 ހާއިރު ކުނި ނަގަން ދިޔަ މީހަކަށެވެ.

އަންހެން މީހާއަށް ލިބިފައިވާ ޒަހަމްތަކުގެ ތަފްސީލެއް ފުލުހުން ހާމަކުރައްވާފައެއްނުވެއެވެ. މިކަމާ ގުޅިިގެން އިތުރަށް ބަލަންޖެހޭ ކަންކަން ފުލުހުން ގެންދަނީ ބަލަމުންނެވެ.