މެންޗެސްޓާ ޔުނައިޓެޑުގެ އިނގިރޭސި ޑިފެންޑަރު ހެރީ މެގުއާއަށް އަނިޔާވެ، މި މަހުގެ ތެރޭގައި އެ ޓީމަށް ކުރިއަށް އޮތް މެޗުތަކުގައި ނުކުޅެވިދާނެ ކަމަށް ފަހުގެ މީޑިއާ ރިޕޯޓުތައް ބުނެފިއެވެ.
އުމުރުން 31 އަހަރުގެ މެގުއާއަށް ލިބުނު އަނިޔާއާ ގުޅޭގޮތުން، އިންސްޓަގްރާމްގައި ކުރި ޕޯސްޓެއްގައިވަނީ، ކުރިއަށް އޮތް ދެތިން ހަފްތާއަށް ކުޅުމާ ދުރަށް ދާން ޖެހިފައިވާ ކަމަށާއި، ވަރުގަދަކޮށް އެނބުރި އަންނާނެ ކަމަށެވެ.
ޔުނައިޓެޑްގެ ކެޕްޓަންކަން ކުރިން ކޮށްފައިވާ މެގުއާ އަށް އަނިޔާވީ، ލީގުގައި އެންމެ ފަހުން ރަށުން ބޭރުގައި އެސްޓަން ވިލާއާ 0-0 އިން އެއްވަރުވި މެޗުގައެވެ. މި އަނިޔާގެ ސަބަބުން ފުރަތަމަ ހާފަށް ފަހު މެގުއާ ވަނީ ބަދަލުކޮށްފައެވެ.
ފަހަކަށްއައިސް ޔުނައިޓެޑްގެ ފުރަތަމަ އެގާރައިން ގަވާއިދުން ޖާގަ ނުލިބުނުނަމަވެސް، މެގުއާ ވަނީ ލިބެމުންއަންނަ މަދު ފުރުޞަތުތަކުގައި ރަނގަޅު ކުޅުމެއް ދައްކަމުންނެވެ. އެގޮތުން، ޔުނައިޓެޑުން ޔުއެފާ ޔުރޮޕާ ލީގުގައި އެންމެ ފަހުން ރަށުން ބޭރުގައި ޕޯޗުގަލްގެ އެފްސީ ޕޯޓޯއާ 3-3 އިން އެއްވަރުވި މެޗުގެ ފަހުވަގުތު ކޮޅުގެ ތެރޭގައި މެގުއާ ވަނީ ލަނޑުޖަހައިފައެވެ.
ސީޒަނުގެ ކުރީކޮޅު ޔުނައިޓެޑުން ނެރެމުން އަންނަ ދަށް ނަތީޖާތަކުގެ ސަބަބުން މިހާރުގެ ކޯޗު، އެރިކް ޓެން ހާގަށް ބޮޑު ޕްރެޝަރެއް އޮތްއިރު، މިހާތަނަށް ލީގުގައި ކުޅުނު މެޗުތަކަށްފަހު އެ ޓީމު ވަނީ 8 ޕޮއިންޓާއެކު ތާވަލްގެ 14 ވަނަ އަށް ވެއްޓިފައެވެ.
މިއީ 1990 ވަނަ އަހަރުގެ ސީޒަނަށްފަހު ލީގުގެ ފުރަތަމަ ހަތް މެޗުން ޔުނައިޓެޑަށް މިހާތަނަށް އެންމެ މަދުން ޕޮއިންޓް ލިބުނު ފަހަރެވެ. ޓެން ހާގްގެ ކޯޗުކަމުގައި މިދިޔަ ދެ ސީޒަނުގައި ވެސް ފުރަތަމަ ހަތް މެޗަށްފަހު އެ ޓީމަށް ލިބުނީ ނުވަ ޕޮއިންޓެވެ.
ލީގުގައި ޔުނައިޓެޑަށް ދެން އެންމެ އަވަހަށް އޮތީ މި މަހުގެ 19 ވަނަ ދުވަހު އަމިއްލަ ދަނޑުގައި ބްރެންޓްފޯޑާ ދެކޮޅަށް ކުޅެން ޖެހޭ މެޗެވެ. އެއަށްފަހު ޔުރޮޕާ ލީގުގައި އެ ޓީމަށް އޮތީ ކުރީގެ ކޯޗު، ހޯސޭ މޮރީނިއޯގެ ފެނަބާޗޭއާ ބައްދަލުކުރާ މެޗެވެ.