އަންހެނުންގެ ސާފް ޗެމްޕިއަންޝިޕުގައި ވާދަކުރުމަށް ރާއްޖޭގެ ގައުމީ އަންހެން ފުޓްބޯޅަ ޓީމު ނޭޕާލަށް ހިނގައްޖެއެވެ.
މި މުބާރާތް ފެށުމަށް ހަމަޖެހިފައިވަނީ އަންނަ ބުރާސްފަތި ދުވަހު ނޭޕާލްގެ ވެރިރަށް ކަތަމަންޑޫގައެވެ. އެއާއެކު އިއްޔެ ހަވީރުގެ ވަގުތެއްގައި ގައުމީ ޓީމު ވަނީ ނޭޕާލަށް ފުރާފައެވެ. ސާފް ޗެމްޕިއަންޝިޕުގައި ވާދަކުރާ ރާއްޖޭގެ ޓީމުގެ ކޯޗަކަށް ހަމަޖައްސާފައިވަނީ ތަޖުރިބާކާރު ކޯޗު މުޙައްމަދު ނިޒާމް (ނިޒާމްބެ) އެވެ. ނޭޕާލަށް ގައުމީ ޓީމު ފުރުމުގެ ކުރިން، އިއްޔެ ވަނީ ޓީމުގެ ކުޅުންތެރިންނާއި އޮފިޝަލުންނަށް ޖާޒީ ހަވާލުކޮށްފައެވެ. ޓީމަށް ޖާޒީ ހަވާލުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ.
މި ފަހަރުގެ މުބާރާތުގައި ދެކުނު އޭޝިއާގެ ހަތް ގައުމު ވާދަކުރާއިރު، މުބާރާތް ކުރިއަށްދާނީ މި މަހުގެ 30 ވަނަ ދުވަހުގެ ނިޔަލަށެވެ. މި މުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ ކަތަމަންޑޫގެ ދަޝްރަތު ރަންގްސަލާ ސްޓޭޑިއަމުގައެވެ.
މުބާރާތުގެ ގުރުއަތުލުން މި އަހަރުގެ ޖޫން މަހުގެ އަށްވަނަ ދުވަހު ބަންގްލަދޭޝްގެ ވެރިރަށް ޑާކާގެ އިންޓަކޮންޓިނެންޓަލް ހޮޓަލުގައި ބާއްވާފައިވާއިރު، މުބާރާތުގައި ވާދަކުރާ ހަތް ގައުމު ވަނީ ދެ ގުރޫޕަކަށް ބަހާލާފައެވެ. މި މުބާރާތުގެ ގުރޫޕް އޭގައި ތިން ޓީމު ހިމެނޭއިރު، ގުރޫޕް ބީގައި ހަތަރު ޓީމު ހިމެނޭއެވެ. ގުރޫޕް އޭގައި ހިމެނޭ ޓީމުތަކަކީ ބަންގްލަދޭޝް އާއި، އިންޑިއާ އަދި ޕާކިސްތާނެވެ. އަދި ގުރޫޕް ބީގައި ހިމެނެނީ މުބާރާތް ބާއްވާ ގައުމު ނޭޕާލާއި، ސްރީ ލަންކާ އާއި، ބޫޓާން އަދި ރާއްޖެއެވެ.
ކޮންމެ ގުރޫޕަކުން އެންމެ ރަނގަޅު ނަތީޖާ ނެރޭ ދެ ޓީމު ސެމީއަށް ކޮލިފައިވާއިރު، ސެމީގެ ފުރަތަމަ މެޗުގައި ވާދަކުރުމަށް ހަމަޖެހިފައިވަނީ ގުރޫޕް އޭގެ އެއްވަނަ ޓީމާއި ގުރޫޕް ބީގެ ދެވަނަ ޓީމެވެ. އަދި މުބާރާތުގެ ދެވަނަ ސެމީގައި ވާދަކުރުމަށް ހަމަޖެހިފައިވަނީ ގުރޫޕު ބީގެ އެއްވަނަ ޓީމާއި ގުރޫޕް އޭގެ ދެވަނަ ޓީމެވެ.
މި މުބާރާތް ހުޅުވާ މެޗުގައި ރާއްޖެއިން އަވައްޓެރި ލަންކާއާ ދެކޮޅަށް ކުޅުމަށް ހަމަޖެހިފައިވަނީ މިމަހު 18 ވަނަ ދުވަހު، ރާއްޖެ ގަޑިން މެންދުރު 12:45 ގައެވެ. އަދި މުބާރާތުގެ ގުރޫޕް ފިޔަވަހީގެ ދެވަނަ މެޗުގައި ރާއްޖެއިން މުބާރާތް ބާއްވާ ގައުމު ނޭޕާލާ ދެކޮޅަށް ނުކުންނައިރު، ފަހު މެޗުގައި މި މަހުގެ 24 ވަނަ ދުވަހުގެ މެންދުރު 12:45 ގައި ރާއްޖެ ނުކުންނާނީ ބުޓާނާ ދެކޮޅަށެވެ.