ގައުމީ ޓީމު ބޭރު މުބާރާތްތަކުގައި ވާދަކުރާއިރު ދިވެހި ވޮލީބޯޅަ އާއިލާއިން އަބަދުވެސް ބޭނުންވާނީ ނަތީޖާ ކަމަށް ގައުމީ ފިރިހެން ވޮލީ ޓީމުގެ ކޯޗު މުޙައްމަދު ޝަރަފް ބުނެފިއެވެ.
ރާއްޖެއިން ވާދަކުރާ ކާވާ ވޮލީބޯލް ޗެލެންޖް ކަޕް ކުރިއަށްދާނީ މާދަމާއިން ފެށިގެން މި މަހުގެ 24 ގެ ނިޔަލަށް އުޒްބެކިސްތާނުގެ ޓަޝްކެންޓުގައެވެ. މި މުބާރާތުގައި ހަ ގައުމެއް ވާދަކުރާއިރު، އެ ގައުމުތަކަކީ ރާއްޖޭގެ އިތުރުން އުޒްބެކިސްތާނާއި، ކިރްގިސްތާނާއި، ތަޖިކިސްތާނާއި، ތުރުކުމެނިސްތާން އަދި އަފްޣާނިސްތާނެވެ.
ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަމުން ޝަރަފް ބުނީ ނަތީޖާ ހޯދަން މަސައްކަތްކުރާ ފަދައިން، ކަނޑެއެޅޭ އަމާޒަށް ވާސިލުވާންވެސް މަސައްކަތް ކުރަންޖެހޭ ކަމަށެވެ. އެގޮތުން އެކަން ހާސިލުކުރެވޭ ގޮތަކީ ކޮބައިތޯ ބަލައި، ޓީމު އެކުލުވާލުމުގައި އެ ވިސްނުން އިސްކޮށްފައިވާނެ ކަމަށް ޝަރަފް ވަނީ ބުނެފައެވެ.
އޭނާއަށް ހަވާލުވެފައި އޮތް އެންމެ ބޮޑު ޒިންމާއަކީ 2027 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ޓީމު ތައްޔާރުކުރުން ކަމަށް ޝަރަފް ވަނީ ބުނެފައެވެ. އެހެންކަމުން މި ތިން އަހަރުގެ ތެރޭގައި މިހާރު ތބި ކުޅުންތެރިންނާއެކު އެންމެ ބޮޑަށް މަސައްކަތް ކުރާނީ އެކަން ހާސިލުކުރުމަށް ކަމަށްވެސް ޝަރަފް ބުންޏެވެ.
"މިހާރު ތިބި ސީނިއާ ކުޅުންތެރިންނާއި، ގާތްގަނޑަކަށް ރިޓަޔާޑް ސްޓޭޖުގައި ތިބި ތަޖުރިބާކާރު ކުޅުންތެރިން އަޅުގަނޑުމެންނާއެކު އެބަ މަސައްކަތްކުރޭ. އެވެރެޖްކޮށް ދަންނަވަންޏާމުން ވަރަށް ރަނގަޅަށް ހުރިހާކަމެއްވެސް ދަނީ." ދިވެހި ވޮލީގައި ގިނަ ކާމިޔާބީތަކެއް ހޯދަފަވާ ކޯޗު ޝަރަފް ބުންޏެވެ.
ޓީމުގަ ހިމެނޭ ތަޖުރިބާކާރު ކުޅުންތެރިޔާ އާދަމް ފައިރޫޒް ބުނީ މުބާރާތާ ކުރިމަތިލާއިރު މުޅި ޓީމުގެ ރޫހު ފެންނަނީ ވަރަށް ރަނގަޅަށް ކަމަށެވެ. އަދި ހުރިހާ ކުޅުންތެރިންވެސް މަސައްކަތް ކުރަމުންދަނީ ކޯޗުގެ އަމާޒު ހާސިލުކުރުމަށް ކަމަށްވެސް ވަނީ ބުނެފައެވެ.
"ބޭނުންވަނީ ހުވަފެނުގައި ކުލަޖައްސައިގެން އެނބުރި އަންނަން. އެންމެންވެސް މިތިބީ އެ ރޫހުގައި ގަދަކޮށް، އިރާދަކުރެއްވިއްޔާ އެގޮތަށް ކަން ވާނެކަމަށް މި އުއްމީދު ކުރަނީ." ފައިރޫޒް ބުންޏެވެ.
ކާވާ ވޮލީބޯލް ޗެލެންޖް ކަޕުގައި ވާދަކުރުމަށާއި، ތަމްރީނުތައް ކުރިއަށްގެންދިޔުމަށް ގައުމީ ޓީމު ވަނީ ހަފުތާއެއް ކުރިން އުޒްބެކިސްތާނަށް ގޮސްފައެވެ. މި މުބާރާތުގައި ވާދަކުރާ ގައުމީ ޓީމުގެ ކެޕްޓަނަކީ ތަޖުރިބާކާރު ކުޅުންތެރިޔާ އިސްމާއީލް ސާޖިދު (ކުޑަ ކާއްޓޭ) އެވެ. އަދި ޓީމުގެ ކޯޗު ޝަރަފްގެ ދަށުން މަސައްކަތް ކުރަން ހަމަޖައްސާފައިވަނީ ކުރީގެ މަޝްހޫރު ދެ ކުޅުންތެރިން ކަމަށްވާ އަޙްމަދު އަބްދުލް ކަރީމް (ލޯންގޭ) އާއި އަބްދުﷲ ޖުނައިދެވެ.