އިންޑިއާގެ ބެންގަލޫރުގައި އިއްޔެ ފެށި 13 ވަނަ އޭޝިއަން ނެޓްބޯލް ޗެމްޕިއަންޝިޕުގައި ރާއްޖޭން ކުޅުނު ފުރަތަމަ މެޗުގައި ސައުދީ އަރަބިއްޔާ އަތުން މޮޅުވެއްޖެއެވެ.
މުޅިން އަލަށް މި މުބާރާތުގައި ވާދަކުރާ ސައުދީ އަތުން ރާއްޖެ މޮޅުވީ 74 ޕޮއިންޓް 14 ޕޮއިންޓުންނެވެ. މި މެޗުގެ ފުރަތަމަ ކުއާޓާރުގައި ރާއްޖެ ނިންމާލީ 20 ޕޮއިންޓް ތިން ޕޮއިންޓުން ކުރީގައި އޮވެގެންނެވެ. އަދި ދެވަނަ ކުއާޓަރު ނިމުނުއިރު 39 ޕޮއިންޓް އަށް ޕޮއިންޓުން ރާއްޖެ ކުރީގައި އޮތްއިރު، ތިންވަނަ ކުއާޓަރު ނިންމާލާފައިވަނީ 57 ޕޮއިންޓް 10 ޕޮއިންޓުން ކުރީގައި އޮވެގެންނެވެ.
މި މަހުގެ 27 ގެ ނިޔަލަށް ކުރިއަށްދާ އޭޝިއަން ނެޓްބޯލް ޗެމްޕިއަންޝިޕުގައި 15 ގައުމު ވާދަކުރެއެވެ. ދެ ގްރޫޕަކަށް ބަހާލައިގެން ކުރިއަށްދާ މުބާރާތުގައި ރާއްޖެ ހިމެނެނީ ގްރޫޕް އޭގައެވެ. މި ގްރޫޕުގައި ރާއްޖެއާއެކު ދެން ހިމެނޭ ގައުމުތަކަކީ ސައުދީ އާއި، ސްރީ ލަންކާ އާއި، މެލޭޝިއާ އާއި، ފިލިޕީންސް އާއި، އިންޑިއާ އަދި ޖަޕާނެވެ. ގުރޫޕް ބީގައި ހިމެނެނީ ސިންގަޕޫރާއި، ހޮންގް ކޮންގާއި، ބުރޫނާއީ ދާރުއްސަލާމާއި، ތައިލެންޑާއި، ޗައިނީސް ޓައިޕޭ އާއި، އިރާގް އަދި ބަހްރެއިނެވެ.
މުބާރާތުގައި ރާއްޖެއިން ދެން ކުޅޭ ދެވަނަ މެޗުގައި މާދަމާ ނުކުންނާނީ މެލޭޝިއާއާ ދެކޮޅަށެވެ.