އިނގިރޭސި ޕްރިމިއަރ ލީގުގައި ބޯންމަތާ ދެކޮޅަށް ކުޅުނު މެޗުން 2-0 ގެ ނަތީޖާއަކުން އާސެނަލް ބަލިވެ، މި ސީޒަނުގައި މެޗަކުން ބަލިނުވެ އެ ޓީމުން ދަމަހައްޓަމުން އައި ރިކޯޑު ނިމުމަކަށް އަތުވެއްޖެއެވެ.
ރަށުން ބޭރުގައި އާސެނަލް ކުޅުނު މި މެޗުގެ ފުރަތަމަ ހާފްގައި އެއްވެސް ޓީމަކަށް ލަނޑެއް ކާމިޔާބުކުރެވިފައިނުވި ނަމަވެސް ދެ ޓީމަށްވެސް ވަނީ ލަނޑު ޖަހާނެ ރަގަޅު ފުރުސަތުތަކެއް ލިބިފަ އެވެ.
މި މެޗުގައި އާސެނަލް އަށް މައްސަލަތަކާއި ކުރިމަތިލާން ޖެހުނީ މެޗުގެ 30 ވަނަ މިނިޓުގައި އެ ޓީމުގެ ވިލިއަމް ސަލީބާ އަށް ރެފްރީ ރަތް ކާޑެއް ދައްކާ ދަނޑުން ފޮނުވާލުމާއި ގުޅިގެންނެވެ. މިއީ މި ސީޒަނުގައި އާސެނަލްއަށް ދައްކާފައިވާ ތިންވަނަ ރަތް ކާޑެވެ.
ބޯންމަތު އިން 10 ކުޅުންތެރިންނާއިއެކު ކުޅެމުންދިޔަ އާސެނަލްގެ ގޯލު ހުޅުވާލާފައިވަނީ މެޗުގެ 70 ވަނަ މިނިޓުގައި ރަޔާން ކްރިސްޓީ ކާމިޔާބުކޮށްދިން ލަނޑުންނެވެ.
އަދި އޭގެ ނުވަ މިނިޓު ފަހުން އެ ޓީމަށް ލިބުނު ޕެނަލްޓީ އަކުން ޖަސްޓިން ކްލައިވަޓް ވަނީ އިތުރު ލަނޑެއް ކާމިޔާބުކޮށްދީ މެޗުގެ ނަތީޖާ 2-0 އަށް ބަދަލުކޮށްފަ އެވެ.
މި މެޗުން ބޯންމަތު މޮލުވެފައިވާއިރު ލީގުގައި އެޓީމުން ވަނީ ލީގުގައި އެންމެ ފަހުން ކުޅުނު ހަތަރު މެޗުންވެސް ބަލިވެފަ އެވެ.
މި މޮޅާއެކު އެ ޓީމު އޮތީ ލީގުގައި މިހާތަނަށް ކުޅުނު 8 މެޗުން 11 ޕޮއިންޓާއެކު ތާވަލުގެ 10 ވަނައިގަ އެވެ. އާސެނަލް އަށް 8 މެޗުން ލިބުނު 17 ޕޮއިންޓާއެކު އެ ޓީމު އޮތީ ތާވަލުގެ ތިންވަނައިގަ އެވެ.