އިހާ ޓޭބަލް ޓެނިސް އެކެޑަމީ (އައިޓީޓީއޭ) އާއި ފިޒިއޯ ކަރްމާ ސޮލިއުޝަންސް (ޕީކޭއެސް) ގުޅިގެން މާލޭގައި ހަ މަސް ދުވަހުގެ މުއްދަތަށް ކުރިއަށްގެންދާ ޓްރެއިނިން ޕްރޮގްރާމެއް ފަށައިފިއެވެ.
މިއީ ޓޭބަލް ޓެނިސް ކޯޗިން، ފިޒިއޮތެރަޕީ އެންޑް ފިޓްނަސް އަދި ބްރެއިން ޓްރެއިނިން ހިމެނޭ ކޮމްޕްރެހެންސިވް ކޯޗިން މޮޑެލްއަކަށް ކުރިއަށްގެންދާ ޕްރޮގްރާމެއް ކަމަށް އިހާ އެކަޑަމީން މައުލޫމާތުދެއެވެ.
ޕްރޮގްރާމުގައި ކޯޗެއްގެ ގޮތުގައި ހަރަކާތްތެރިވަނީ އިންޑިއާ ގައުމީ ޓީމުގެ ކުރީގެ ކުޅުންތެރިޔާ އަދި މިހާރު ކޯޗެއްގެ ގޮތުގައި މަސައްކަތްކުރަމުން އަންނަ ސުނިލް ބަބްރާސް އެވެ. އޭނާއާއެކު ފިިޒިއޮތެރަޕީ އާއި ބްރެއިން ޓްރެއިނާއެއްގެ ގޮތުގައި މަސައްކަތްކުރާނީ ޝެއިކް ކާސިން ސައިޑާ އެވެ.
ޖުމްލަ 24 އެތުލީޓުންނާއެކު މި ޕްރޮގްރާމް ކުރިއަށްދާނީ ހަ މަސްދުވަހުގެ މުއްދަތަކަށެވެ. މި ޕްރޮގްރާމުގެ ތެރެއިން ކުޅިވަރުތައް ކުޅޭ އެތުލީޓުންނަށް ފިޒިކަލް ފިޓްނަސް ޓްރެއިނިން، ފިޒިއޮތެރަޕީ އަދި ބްރެއިން ޓްރެއިނިންގެ ސެޝަންތަކެއް ކުރިއަށްދާނީ އެ ކުޅިވަރަކަށް ހާއްސަކޮށެވެ.
ފިޒިކަލް ފިޓްނަސް ޓްރެއިނިން އާއި ފިޒިއޮތެރަޕީގެ ދަށުން، އިންޖަރީ ޕްރިވެންޝަން އެންޑް މެނޭޖްމަންޓްގެ އިތުރުން ކޯ ސްޓްރެންތެނިންގ، އެޖިލިޓީ އެންޑް ސްޕީޑް ޑްރިލްސް އަދި އެންޑިއުރެންސް މި ޓްރެއިނިންގެ ތެރޭގައި ހިމެނެއެވެ.
ބްރެއިން ޓްރެއިނިންގެ ދަށުން އެތުލީޓުން ނިންމުންތައް ނިންމުމާއި ރިއެކްޝަން ޓައިމް އަދި ނަފްސާނީގޮތުން ވަރުގަދަކުރުމުގެ ބައިތަކެއްވެސް ހިމެނެއެވެ. މިއީ މެޗުތަކުގައި ޕްރެޝަރުތަކާ ކުރިމަތިލާން ކުޅުންތެރިންނަށް އެހީތެރިވެދިނުމުގެ ގޮތުން ކުރިއަށްގެންދާނެ ބައެކެވެ.
މިއީ ރާއްޖޭގެ ޓީޓީ އެކަޑަމީއަކުން މިފަދަ ޓްރެއިނިންއެއް ކުރިއަށްގެންދާ ފުރަތަމަ ފަހަރެވެ.