އުޒްބެކިސްތާނުގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) މެންސް ވޮލީބޯލް ޗެލެންޖް ކަޕް 2024 ގައި ރާއްޖޭގެ ގައުމީ ފިރިހެން ވޮލީބޯޅަ ޓީމުން ކުޅުނު ތިންވަނަ މެޗުގައި އަފްޣާނިސްތާން އަތުން ބަލިވެއްޖެއެވެ.
ކާވާ ވޮލީބޯލް ޗެލެންޖް ކަޕް ކުރިއަށްދާނީ އަންނަ ބުރާސްފަތި ދުވަހުގެ ނިޔަލަށް އުޒްބެކިސްތާނުގެ ޓަޝްކެންޓުގައެވެ. މި މުބާރާތުގައި ހަ ގައުމެއް ވާދަކުރާއިރު، އެ ގައުމުތަކަކީ ރާއްޖޭގެ އިތުރުން އުޒްބެކިސްތާނާއި، ކިރްގިސްތާނާއި، ތަޖިކިސްތާނާއި، ތުރުކުމެނިސްތާން އަދި އަފްޣާނިސްތާނެވެ.
މުބާރާތުގައި ރާއްޖެއިން ކުޅުނު ތިންވަނަ މެޗުން ބަލިވީ އަފްޣާނިސްތާން އަތުން ސީދާ ތިން ސެޓުންނެވެ. މި މެޗުގެ ފުރަތަމަ ދެ ސެޓުގައި ރާއްޖޭގެ ފަރާތުން އާދައިގެ ކުޅުމެއް ފެނިގެންދިޔައިރު، މި ދެ ސެޓު އަފްޣާނިސްތާނުން ގެންގޮސްފައިވަނީ 25-19 އަދި 25-18 އިންނެވެ. އެކަމަކު މެޗުގެ ތިންވަނަ ސެޓުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި ސެޓު އަފްޣާނިސްތާނުން ކާމިޔާބުކޮށްފައިވަނީ 28-26 އިންނެވެ.
މި މެޗުން ރާއްޖެ ބަލިވިއިރު، މުބާރާތުގައި ކުޅުނު ފުރަތަމަ މެޗުން ރާއްޖެ ވަނީ ސީދާ ތިން ސެޓުން ކިރްގިސްތާން އަތުން ބަލިވެފައެވެ. އަދި ދެވަނަ މެޗުގައި ވަނީ ތުރުކުމެނިސްތާން އަތުން ތިން ސެޓު ދެ ސެޓުން ބަލިވެފައެވެ.
މި މުބާރާތް ރޭވިފައިވާ ގޮތުން ލީގު ބުރުގައި ކޮންމެ ޓީމެއް ކޮންމެ ޓީމަކާ ބައްދަލުކުރާއިރު، އެއްވަނަ އާއި ދެވަނަ ހޯދާ ޓީމުތައް ފައިނަލަށް ދަތުރުކުރާނެއެވެ. އަދި ތިންވަނަ އާއި ހަތަރުވަނައިގެ މެދުގައި ލޯ މެޑެލް މެޗު ކުޅޭއިރު، ފަސްވަނަ އާއި ހަވަނައިގެ މެދުގައި ރޭންކިން މެޗެއް ކުޅޭނެއެވެ. މި މުބާރާތުގައި ރާއްޖެއިން ކުޅޭ ހަތަރުވަނަ މެޗުގައި އަންގާރަ ދުވަހު ނުކުންނާނީ އުޒްބެކިސްތާނާ ދެކޮޅަށެވެ.