ގެސްޓްހައުސްގެ ވިޔަފާރި ފުޅާދާއިރާއެއްގައި ކުރަމުން އަންނަ އއ. ތޮއްޑޫގެ ވިޔަފާރިވެރިންނަށް ދިމާވާ އެންމެ ބޮޑު ދަތިކަމަކީ، މި ވިޔަފާރި ޕްރޮމޯޓްކުރެވޭނެ ގޮތް ނެތުންކަމަށް އެރަށުގައި ގެސްޓްހައުސްގެ ވިޔަފާރިކުރާ ފަރާތްތަކުން ބުނެފިއެވެ.
ހިތްގައިމު ރީތި ގޮނޑުދޮށެއް ލިބިފައިވާ އއ. ތޮއްޑުއަކީ ދަނޑުވެރިކަމަށް މަޝްހޫރު ރަށެއްކަމުގައި ވިޔަސް މި ރަށުގައި ގެސްޓްހައުސްގެ ވިޔަފާރިއަކީ މިހާރު ވަރަށް ފުޅާވަމުން އަންނަ ވިޔަފާރިއެކެވެ.
ގެސްޓްހައުސްގެ ވިޔަފާރި ތޮއްޑޫގައި ފަށާފައިވަނީ މީގެ ދެތިން އަހަރު ކުރިން ނަމަވެސް، މިހާރު މިރަށުގައި މި ވިޔަފާރި ވަނީ ވަރަށް ބޮޑަށް ފުޅާވެ ކުރިއަރާފައެވެ. މިގޮތުން ކައިރި ރަށްތަކަށް ބަލާއިރު ތޮއްޑުއަށްވުރެ ކުރިން މި ވިޔަފާރީގެ މަސައްކަތް ފެށި ބައެއް ރަށްރަށުގައި 10 ނުވަތަ 12 ގެސްޓްހައުސް ހުރި އިރު ތޮއްޑޫގައި މިހާރު 14 ގެސްޓްހައުސް އެބަހުއްޓެވެ. އަދި މިހާރު ތޮއްޑޫގައި އިތުރު އަށްވަރަކަށް ގެސްޓް ހައުސް ހެދުމުގެ މަސައްކަތް ކުރަމުން އަންނަކަންވެސް ފާހަގަކޮށްލެވެއެވެ.
މި ވިޔަފާރިކުރާ ފަރާތްތަކުން ބުނީ ގެސްޓްހައުސްތަކަށް ހައި ސީޒަންގައި ފުލްކޮށް ފަތުރުވެރިން އަންނަކަމަށާއި އަދި އޮފް ސީޒަންގައިވެސް އަންނަ ފަތުރުވެރިންގެ އަދަދު މަދު ނޫންކަމަށެވެ. ޢާއިލާ ނުވަތަ ރައްޓެހިންނާއިއެކީ ގެސްޓްހައުސްގެ ވިޔަފާރި ފެށިނަމަވެސް، މިހާރު މި މަސައްކަތް ފުޅާވެ، އަމިއްލަ ގެސްޓްހައުސްވެސް ބައެއް ފަރާތްތަކުން ވަނީ ހުޅުވާފައެވެ.
ޢާއިލާތަކުގެ އެހީތެރިކަމާއެކީ ތޮއްޑޫގައި ކުރިއަށް ގެންދާ މި ވިޔަފާރިއަކީ ރަށުގައި ތިބެގެން ކުރަން ރަނގަޅު ވިޔަފާރިއެއްކަމަށް ތޮއްޑޫގެ ގެސްޓްހައުސް ވިޔަފާރިކުރާ ފަރާތްތަކުން ބުނެއެވެ. މިހާ ފުޅާކޮށް މި ވިޔަފާރިކުރާއިރު ދިމާވާ އެންމެ ބޮޑު ގޮންޖެހުމަކީ ރާއްޖޭގައި ލޯކަލް ޓޫރިޒަމް ކުރިއަރުވާނެ ބަޔަކު ނެތުންކަމަށް ގެސްޓްހައުސްގެ ވިޔަފާރިކުރާ މީހުން ބުނެއެވެ. ރާއްޖޭގެ ރިސޯޓްތައް ބޭރު ދުނިޔޭގައި އިޝްތިހާރުކުރާ ފަދައިން ރާއްޖޭގެ ލޯކަލް ޓޫރިޒަމް ޕްރޮމޯޓްކުރުމަކީ ގެސްޓްހައުސްގެ ވިޔަފާރިކުރާ ފަރާތްތަކުގެ ވަރަށް ބޮޑު އެދުމެކެވެ.
ރާއްޖޭގައި ލޯކަލް ޓޫރިޒަމް ފުޅާވަމުންދާއިރު ރާއްޖެއަށް ދިމާވެފައިވާ ކުނީގެ މައްސަލައަކީވެސް މިކަމަށް އޮތް ގޮންޖެހުމެކެވެ. ތޮއްޑުއަށްވެސް މި މައްސަލަ ދިމާވެފައިވާކަން އެރަށުގައި ގެސްޓްހައުސްގެ ވިޔަފާރިކުރާ ފަރާތްތަކުން ފާހަގަކުރެވޭ.
ގެސްޓްހައުސް ވިޔަފާރީގެ ސަބަބުން ރަށަށް އިޤްތިޞާދީ ކުރިއެރުންތަކެއް ލިބެމުންދާކަން ތޮއްޑޫ ކައުންސިލްގެ ޒިންމާދާރު އިސްވެރިޔާ އިބްރާހީމް ވަޙީދު ފާހަގަކުރެއްވިއެވެ. ގެސްޓްހައުސްގެ ވިޔަފާރިއަކީ ރާއްޖޭގެ އިޤްތިޞާދަށްވެސް އޭގެ ނަފާކުރާ ވިޔަފާރިއެކެވެ.