ޔުއެފާ ޔޫރޮޕާ ލީގުގައި ރޭ އަލްކްމާއާ ދެކޮޅަށް ކުޅުނު މެޗު 1-0 ގެ ނަތީޖާއަކުން ކާމިޔާބުކޮށް، ތާވަލުގެ ދެވަނަ މަގާމު ޓޮޓްނަމް ހޮޓްސްޕާއިން ހޯދައިފިއެވެ.
ލަންޑަނުގައި ހުންނަ ޓޮޓްނަމް ސްޓޭޑިއަމްގައި ކުޅުނު މި މެޗު ކާމިޔާބުކުރުމާއެކު އެ ޓީމަށް ވަނީ މި ފަހަރުގެ ޔޫރޮޕާ ލީގުގައި ކުޅުނު ތިން މެޗުންވެސް މޮޅުވެ، ޖުމްލަ 9 ޕޮއިންޓާއެކު ތާވަލުގެ ދެވަނަ މަގާމް ލިބިފައެވެ. އެއްވަނައިގައި އޮތް އިޓަލީގެ ލާޒިއޯއަށްވެސް 9 ޕޮއިންޓް ލިބިފައިވާއިރު، އެ ޓީމަށް އެއްވަނަ ލިބިފައިވަނީ ފައިދާ ލަނޑުގެ ތަފާތުންނެވެ.
ޓޮޓްނަމްގެ ކޯޗު ޕޮސްޓެކޮގްލޫ ވަނީ މި މެޗަށް ގިނަ ބަދަލުތަކެއް ގެނެސްފައެވެ. އެގޮތުން ވެސްޓް ހޭމް ޔުނައިޓެޑާ ދެކޮޅަށް އެންމެ ފަހުން ކުޅުނު މެޗުގެ ފުރަތަމަ އެގާރައިގައި ކުޅުނު ޓީމަށް ނުވަ ބަދަލެއް ގެނެސްފައިވާއިރު، މި މެޗުގެ ފުރަތަމަ ހާފްގައި ޓޮޓްނަމަށް ވަނީ އަލްކްމާގެ ގޯލު ހުޅުވާލުމަށް ނުކުޅެދިފައެވެ.
މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 53 ވަނަ މިނިޓުގައި އެ ޓީމަށް ލިބުނު ޕެނަލްޓީއަކުން ކާމިޔާބުކޮށްދީފައިވަނީ ރިޗާލިސަން އެވެ. މިއީ އަނިޔާގައި ހުރުމަށްފަހު ފުރަތަމަ އެގާރައިގައި ރިޗާލިސަން މި ސީޒަނުގައި ކުޅުނު ފުރަތަމަ ފަހަރެވެ.
ޓޮޓްނަމްގެ ކޯޗު ވަނީ މި މެޗުގައި ޒުވާން ކުޅުންތެރިންނަށް ފުރުސަތުދީ އެ ކުޅުންތެރިން ޓެސްޓްކޮށްފައެވެ. އެގޮތުން މޫރޭ އާއި ބާގްވެލްގެ އިތުރުން އާޗީ ގްރޭއަށް ވަނީ ފުރުސަތު ދީފައެވެ. އަދި މި މެޗުގައި މޫރޭގެ ފަރާތުން ފެނިގެންދިޔަ ކުޅުމަށް ގިނަ ބައެއްގެ ސަމާލުކަން ވަނީ ހުއްޓިފައެވެ.
ޔޫރޮޕާ ލީގުގައި އަންނަ މަހު ޓޮޓްނަމް ނިކުންނާނީ ތުރުކީގެ ގަލަތަސަރާއީ އާއި އިޓަލީގެ ރޯމާއާ ދެކޮޅަށެވެ.