ސްޕެނިޝް ލީގުގައި ރޭ ކުޅުނު އެލް ކްލަސިކޯ މެޗުގައި ވާދަވެރި ރެއާލް މެޑްރިޑް އަތުން 4-0 ގެ ނަތީޖާއަކުން ބާސެލޯނާ މޮޅުވެއްޖެއެވެ.
މެޑްރިޑްގެ ސެންޓިއާގޯ ބަރނަބިއު ސްޓޭޑިއަމްގައި ކުޅުނު މި މެޗުގެ ފުރަތަމަ ހާފްގައި އެއްވެސް ޓީމަކަށް ލަނޑެއް ކާމިޔާބުކުރެވިފައި ނުވި ނަމަވެސް ދެ ޓީމުންވެސް ވަނީ ލަނޑު ޖަހާނެ ރަގަޅު ފުރުސަތުތަކެއް ހޯދާފަ އެވެ. އަދި މެޗުގެ ފުރަތަމަ ހާފްގައި ވާދަވެރި ކުޅުމެއް ދެ ޓީމުގެ ފަރާތުން ވެސް ވަނީ ފެނިގެންގޮސްފަ އެވެ.
މި މެޗުން ރެއާލް މެޑްރިޑް ބަލިވުމާއެކު އެ ޓީމުން މެޗަކުން ބަލިނުވެ ލީގުގައި ދަމަހައްޓަމުން އަންނަ ރެކޯޑް 42 މެޗަށްފަހު ވަނީ ނިމުމަކަށް އައިސްފަ އެވެ. މީގެ ކުރިން ލީގުގައި މެޗަކުން ބަލިނުވެ އެންމެ ގިނަ މެޗު ކުޅެފައިވަނީ 2017 އާއި 2018 އާއި ދެމެދު 43 މެޗު ހަމަކޮށްގެން ބާސެލޯނާ އެވެ.
މި މެޗުގައި ރެއާލް މެޑްރިޑްގެ އެމްބާޕޭ ދެ ފަހަރު މަތިން ބާސެލޯނާގެ ގޯލުގެ ތެރެއަށް ބޯޅަ ފޮނުވާލި ނަމަވެސް ރެފްރީ ވަނީ ދެ ފަހަރުވެސް އޮފްސައިޑް ކަމަށް ނިންމާފަ އެވެ.
ބާސެލޯނާ އިން މި މެޗުގައި ލީޑު ނަގާފައިވަނީ މެޗުގެ 54 ވަނަ މިނިޓުގައި ރޮބަޓް ލެވަންޑޯސްކީ ކާމިޔާބުކޮށްދިން ލަނޑުންނެވެ. އަދި އޭގެ މިނިޓެއް ފަހުން އޭނާ ވަނީ އިތުރު ލަނޑެއް ކާމިޔާބުކޮށް ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ. ލެވަންޑޯސްކީ މި ލަނޑު ޖަހާފައިވަނީ އޭރިޔާ ތެރޭގައި ހުހަށްހުރެ ބޮލުން ގޯލުގެ ތެރެއަށް ފޮނުވާލައިގެންނެވެ.
ލެވަންޑޯސްކީގެ ދެ ލަނޑަށްފަހު އޭނާއަށް ވަނީ މި މެޗުގައި ހެޓްރިކް ހެދުމަށް ރަނުގެ ދެ ފުރުސަތެއް ލިބިފަ އެވެ. އެ ގޮތުން އޭރިޔާ ތެރޭގައި ހުރެ ފުރަތަމަ ފަހަރު ފޮނުވާލި ހަމަލާ ގޯލުގެ ދަނޑިއަށް އަމާޒުވެފައިވާއިރު ދެވަނަ ހަމަލާ ދިޔައީ ހުރަސް ދަނޑި މަތިން ބޭރަށެވެ.
މި މެޗުގައި ބާސެލޯނާ އިން ޖެހި ތިންވަނަ ލަނޑު މެޗުގެ 77 ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ އުމުރުން 17 އަހަރުގެ ޒުވާން ތަރި ލަމީން ޔަމާލް އެވެ. މި ލަނޑާއެކު ލަމީން ޔަމާލް ވެފައިވަނީ އެލް ކްލެސިކޯގައި ލަނޑެއް ޖެހި އެންމެ ޒުވާން ކުޅުންތެރިޔާއަށް ވެފަ އެވެ.
ބާސެލޯނާއިން މި މެޗުގައި ޖެހި ހަތަރުވަނަ ލަނޑު މެޗުގެ ފުރިހަމަ ވަގުތު ހަމަވާން ހަ މިނިޓަށް ވެފައިވަނިކޮށް އެ ޓީމަށް ކާމިޔާބުކޮށްދީފައިވަނީ ކެޕްޓަން ރަފީނިއާ އެވެ.
ރެއާލް މެޑްރިޑާއި އެންމެ ވާދަވެރި ބާސެލޯނާއިން މި މެޗު ކާމިޔާބު ކުރުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 11 މެޗުން 30 ޕޮއިންޓާއެކު ތާވަލުގެ އެއްވަނަ މަގާމުގައި 6 ޕޮއިންޓްގެ ލީޑެއް ލިބިފަ އެވެ. ދެވަނައިގައި އޮތް ރެއާލް މެޑްރިޑަށް 11 މެޗުން ލިބިފައިވަނީ 24 ޕޮއިންޓެވެ.