ގުރު ނަގާ ވަގުތުން ފެށިގެން ހިޔާވަހި ޕޯޓަލުން ބިމުގެ ތަފްޞީލު ބަލާލެވޭނެ

ގުޅިފަޅުން ގޯތި ލިބުނު މީހުންގެ މެދުގައި ގުރު ނަގާ ވަގުތުން ފެށިގެން އެސްއެމްއެސްގެ ޒަރިއްޔާއިންނާއި ހިޔާވަހި ޕޯޓަލުން ގުރުން ހޮވިފައިވާ ބިމުގެ ތަފްޞީލު ގޯތިލިބޭ ފަރާތްތަކަށް ފެންނާނެކަމަށް ގެދޮރުވެރިކަމާއި ބިމާއި ޢުމާރްނީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.

ގުޅިފަޅުން ގޯތި ލިބުނު މީހުންނަށް ބިން ލިބޭ ޕްލޮޓް ކަނޑައަޅުމަށް ބާއްވާ ގުރުއަތުލުން އަންނަ އަންގާރަ ދުވަހު ބާއްވާ ގޮތަށް ވަނީ ނިންމާފައެވެ. އެގޮތުން ގުޅިފަޅުން ގޯތި ލިބުނު މީހުންނަށް ބިން ލިބޭ ޕްލޮޓް ކަނޑައަޅުމަށް ބާއްވާ ގުރުއަތުލުން އޮންނާނީ އަންގާރަ ދުވަހު ހެނދުނު 9:00 އިން ފެށިގެން ދަރުބާރުގޭ ރަންނަބަނޑޭރި މާލަމުގައެވެ.

ގެދޮރުވެރިކަމާއި ބިމާއި ޢުމާރްނީ ތަރައްޤީއާ ބެހޭ ވުޒާރާއިން ވިދާޅުވީ "ގުޅިފަޅުގެ ލޭންޑް ޔޫސް ޕްލޭން"ގެ ދަށުން އައިސްފައިވާ ބަދަލާއިގުޅިގެން، ބިންވެރިޔާ ސްކީމުގެ ދަށުން ކުރިން ގުޅީފަޅުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަނަށް ބަދަލު އައިސްފައިވާކަމަށެވެ. މިހާތަނަށް ޕްލޮޓް ހަވާލުކޮށްފައިވާ ފަރާތްތަކާއި، މިހާތަނަށް ޕްލޮޓް ހަވާލުނުކޮށް ތިބި ފަރާތްތަކާއި، ގިރާވަރު ފަޅުން ލިބިފައިވާ ގޯތިތައް ގުޅީފަޅަށް ބަދަލުކުރި މީހުންގެ ގޯތީގެ ގުރުއަތުލުންވެސް ކުރިއަށްދާނެއެވެ.

ގެދޮރުވެރިކަމާ ބެހޭ ވުޒާރާއިން ވަނީ ގުޅީފަޅުން ގޯތި ލިބޭ މީހުންގެ ހުރިހާ ކެޓަގަތީތަކުގެ ލިސްޓްވެސް، ގުރުއަތާ ގުޅިގެން ގެޒެޓުކޮށްފައިވާ ލިސްޓްގައި ހިމަނާފައެވެ. ޖުމްލަ 3520 ގޯތި ގުޅީފަޅުން ދޫކުރެއެވެ. އެ ވުޒާރާއިން ވިދާޅުވީ ކޮންމެ ފޮއްޓެއްގައި ހިމެނޭ ފަރާތްތަކުގެ ލިސްޓް އެކުލަވާލާފައިވަނީ އެ ފޮއްޓަކަށް ޚާއްސަކޮށްފައިވާ ފޯމް ނަންބަރުގެ ތަރުތީބުންކަމަށެވެ. އަދ ގުރުނަގާނީ ގޯތި ލިބުނު މީހުންގެ ލިސްޓް ތަރުތީބުންކަމަށާއި ގުރު ނަގާ ވަގުތުން ފެށިގެން ފެށިގެން އެސްއެމްއެސް ޒަރިއްޔާއިންނާއި ހިޔާވަހި ޕޯޓަލްއިން ގުރުން ހޮވިފައިވާ ބިމުގެ ތަފްސީލް ގޯތިލިބޭ ފަރާތްތަކަށް ފެންނާނެކަމަށް އެ ވުޒާރާއިން ވިދާޅުވެއެވެ.

ގުޅިފަޅުން ދޫކުރާ ގޯތީގެ ތަފްޞީލު:

• 1250 އަކަފޫޓުގެ 669 ގޯތި
• 1650 އަކަފޫޓުގެ 1234 ގޯތި
• 2050 އަކަފޫޓުގެ 916 ގޯތި
• 2450 އަކަފޫޓުގެ 473 ގޯތި
• 2850 އަކަފޫޓުގެ 158 ގޯތި
• 3250 އަކަފޫޓުގެ 49 ގޯތި
• 3650 އަކަފޫޓުގެ 21 ގޯތި

ގުރުއަތުނެގުން ކުރިއަށްދާއިރު، ގުރުއަތުނަގާ މާލަމަށް ވަދޭވޭނެ އިންތިޒާމުވާނީ ހަމަޖައްސާފައެވެ. އަދި ބިން ލިބޭ ފަރާތެއްގެ ބަދަލުގައި އެހެން ފަރާތަކުން ޙާޟިރުވާން ބޭނުންނަމަ، ބިން ލިބޭ ފަރާތުގެ އިއުތިރާޒެއްނެތް ކަމުގެ ލިޔުމަކާއި އައި.ޑީ.ކާޑްގެ ކޮޕީ ގެންދަންވާނެކަމަށް އެ ވުޒާރާއިން ވިދާޅުވިއެވެ.

ގެދޮރުވެރިކަމާއި ބިމާއި ޢުމާރްނީ ތަރައްޤީއާ ބެހޭ ވުޒާރާއިން ވިދާޅުވީ، ފާސްކޮށްފައިވާ ގުޅީފަޅުގެ ލޭންޑް ޔޫސް ޕްލޭން ބްލޮކް ނަންބަރު އަދި ޕްލޮޓް ނަންބަރުތައް ހިމެނޭގޮތަށް އަދި ލޮޓް އެލޮކޭޝަން ޕްލޭންގެ ތަފްޞީލުތައް ހިޔާވެހި ޕޯޓަލުން ލިބެންހުންނާނެކަމަށެވެ.