ބޫޓާން ޓީ20 އިންޓަނޭޝަނަލް ކުއަޑްރަންގިއުލާ ސީރީސްގައި ވާދަކޮށް ރިހި މެޑަލް ހޯދި ގައުމީ ކްރިކެޓް ޓީމު އެނބުރި ރާއްޖެ އައުމުން ހޫނު މަރުހަބާއެއް ކިޔައިފިއެވެ.
ބޫޓާންގެ ފުރަތަމަ ކްރިކެޓް ދަނޑު ހުޅުވުމުގެ ގޮތުން ބޭއްވި މި މުބާރާތުގައި އެ ގައުމުގެ އިތުރުން ދެން ވާދަކުރީ ރާއްޖެ އާއި، އިންޑޮނޭޝިއާ އަދި ތައިލެންޑެވެ. މުބާރާތުގެ ފައިނަލަށް ރާއްޖެ ދަތުރުކުރި ނަމަވެސް މެޗު ނުކުޅެ ތައިލެންޑަށް ވަނީ މުބާރާތުގެ ޗެމްޕިއަންކަން ދީފައެވެ. އެއީ މުބާރާތުގެ ގަވާއިދު އޮތް ގޮތުން މެޗު ނުކުޅޭ ހާލަތެއް އަތުވެއްޖެ ނަމަ ޗެމްޕިއަންކަން ދޭނީ ލީގު ބުރުން އެއްވަނަ ޓީމެވެ.
އެއާއެކު ތައިލެންޑަށް ޗެމްޕިއަންކަން ލިބުނުއިރު ދެވަނަ ލިބުނީ ރާއްޖެއަށެވެ. ރާއްޖެ ފައިނަލަށް ދަތުރުކޮށްފައިވަނީ ސެމީ ފައިނަލުގައި ބޫޓާން ހަތް ވިކެޓުން ބަލިކޮށްގެންނެވެ. މި މެޗުގައި ބޫޓާން އަތުން ރާއްޖެ މޮޅުވިއިރު، ލީގު ބުރުގައި ރާއްޖެ ވަނީ ބޫޓާން އަތުން ހަތަރު ވިކެޓުން ބަލިވެފައެވެ.
މުބާރާތުގެ ދެވަނަ މަގާމާއެކު އެނބުރި ރާއްޖެ އައުމުން މަރުހަބާ ވިދާޅުވީ ކޮމިޝަނަރ އޮފް ސްޕޯޓްސް މުޙައްމަދު ޠަލާލް އާއި ކުޅިވަރާ ބެހޭ ވުޒާރާގެ ބައެއް އިސްވެރިންނެވެ. އަދި ކްރިކެޓު ބޯޑުގެ އިސްވެރިންވެސް ބައިވެރިވެވަޑައިގެންނެވި އެވެ.
ރާއްޖޭން އެންމެ ފަހުން، އިންޓަނޭޝަނަލް ކްރިކެޓް ފައިނަލެއްގައި ކުޅުނީ 2010 ވަަނަ އަހަރު ތައިލެންޑްގައި ބޭއްވި، އޭސީސީ ޓްރޮފީ ޗެލެންޖް މުބާރާތުގައެވެ. އެ މުބާރާތުގެ ފައިނަލުގައި ސައުދީ އަރަބިއްޔާ އަތުން އެއް ވިކެޓުން ވަަނީ މޮޅުވެފައެވެ. މިއީ 14 އަަހަރު ތެރޭ ފުރަތަމަ ފަހަރަށް މުބާރާތެއްގެ ފައިނަލަށް ރާއްޖޭގެ ގައުމީ ޓީމު ދަތުރުކުރި ފުރަތަމަ ފަހަރެވެ.