ސްޕެނިޝް ލީގުގައި ރޭ ރަށުން ބޭރުގައި ރެއާލް ބެޓިސް އަތުން 1-0 ގެ ނަތީޖާއަކުން ބަލިވެ، އެތުލެޓިކޯ މެޑްރިޑުން ބަލިނުވެ ދަމަހައްޓަމުން އައި ރިކޯޑު ނިމުމަކަށް އަތުވެއްޖެއެވެ.
ރޭގެ މެޗުގެ ކުރީން، ލީގުގައި އެތުލެޓިކޯ ކުޅުނު ފުރަތަމަ 10 މެޗުގެ ތެރެއިން ފަސް މެޗުން މޮޅުވެފައިވާއިރު، އަނެއް ފަސް މެޗުން ވަނީ އެއްވަރުވެފައެވެ.
ބެޓިސްގެ އެސްޓާޑިއޯ ބެނީޓޯ ވިޔަމެރީންގައި ރޭ ކުޅުނު މި މެޗުގައި ފެނިގެންދިޔަ ހަމައެކަނި ގޯލަކީ، އެތުލެޓިކޯގެ ޑިފެންޑަރު، ހޯސޭ ގިމެނޭޒް އަތުން ބައިކޮޅަށް ވަތް ލަނޑެކެވެ. މިއީ މެޗު ފެށިގެން ހަތަރުވަނަ މިނެޓުގައި ބެޓިސްގެ އަބްދެ އެޒަލްޒޫލީ ނެގި ހުރަހެއް ދިފާއުކުރަން އުޅުމުގެ ތެރޭގައި ގިމެނޭޒް އަތުން ބައިކޮޅަށް ވަތް ގޯލެކެވެ.
އެތުލެޓިކޯ އަށް ލަނޑެއްޖަހައިދޭން ލިބުނު އެންމެ ރަނގަޅު ފުރުޞަތުގައި ރެއިނިލްޑޯ މަންޑާވާ ބޮލުން ފޮނުވާލި ބޯޅަ ބެޓިސްގެ ގޯލްކީޕަރު، ރުއީ ސިލްވާ ހުއްޓުވިއެވެ. މީގެއިތުރުން، އެ ޓީމުގެ އާޖެންޓީނާ ފޯވާޑް، ހޫލިއަން އަލްވަރޭޒް އާއި ރޮޑްރިގޯ ޑެ ޕޯލް އަދި އެންޓޮއިން ގްރީޒްމަން ފޮނުވާލި ހަމަލާތަކުން ވެސް ގޯލެއް ކާމިޔާބުކުރެވޭ ގޮތެއް ނުވިއެވެ.
މި މެޗުގައި ބެޓިސްގެ ލީޑް ފުޅާކޮށްދޭން ވިޓާ ރޮކޭ އަށް ލިބުނު ފުރުޞަތުގައި ލަނޑެއް ކާމިޔާބުކުރިނަމަވެސް އޮފްސައިޑް ކަމަށް ނިންމާ، ރެފްރީ އެ ލަނޑު ގަބޫލެއްނުކުރިއެވެ.
މެޗަށްފަހު ވާހަކަ ދައްކަމުން އެތުލެޓިކޯގެ ކޯޗު، ޑިއޭގޯ ސިމިއޯނީ ބުނީ، މެޗުން ބަލިވުމުގެ ފުރިހަމަ ޒިންމާ އޭނާ ނަގާ ކަމަށެވެ.
"އެންމެ ރަނގަޅަށް މި މެޗަށް ތައްޔާރުނުވެވުނު،"
"އަހަރެންގެ ރޭވުންތެރިކަމާ އެއްގޮތަށް ކަންކަން ނުދިއުމުގެ ފުރިހަމަ ޒިންމާ ނަގަން." މެޗަށްފަހު ނޫސްވެރިންނާ ވާހަކަދައްކަމުން ކޯޗު، ސިމިއޯނީ ބުންޏެވެ.
މި ނަތީޖާއާއެކު އެތުލެޓިކޯ ވަނީ ތާވަލްގެ ހަތަރުވަނަ އަށް ވެއްޓިފައެވެ. މިހާތަނަށް ކުޅުނު 11 މެޗުން އެ ޓީމަށް ލިބިފައިވަނީ 20 ޕޮއިންޓެވެ. ބެޓިސް ވަނީ 11 މެޗުން 18 ޕޮއިންޓް ހަމަކޮށް، ފަސްވަނަ އަށް ޖެހިލައި އެތުލެޓިކޯގެ ފަހަތުގައި ވިއްދާފައެވެ.
ލީގުގައި އެތުލެޓިކޯ އަށް ދެން އޮތީ އަންނަ ނޮވެންބަރު މަހުގެ ތިންވަނަ ދުވަހު އަމިއްލަ ދަނޑުގައި ލަސް ޕަލްމާސްއާ ދެކޮޅަށް ކުޅެން ޖެހޭ މެޗެވެ.