އިނގިރޭސި ލީގު ކަޕުގެ ގަދަ 16 ބުރުގައި ޓޮޓްނަމް ހޮޓްސްޕާއާ ދެކޮޅަށް ކުޅުނު މެޗުން މެންޗެސްޓާ ސިޓީ ބަލިވެއްޖެއެވެ.
ލަންޑަންގައި ޓޮޓްނަމް ހޮޓްސްޕާ ސްޓޭޑިއަމްގައި، ފަސްދޮޅަސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 2-1 ގެ ނަތީޖާއަކުންނެވެ.
މި މެޗުގެ ފަސްވަނަ މިނިޓުގައި ޓޮޓްނަމްގެ ފޯވަޑް ޓިމޯ ވާނާ ވަނީ ލަނޑެއް ޖަހައި އެ ޓީމަށް ކުރި ހޯދަދީފަ އެވެ. މިއީ މި ސީޒަނުގައި އޭނާ އެ ކްލަބަށް ކާމިޔާބުކޮށްދިން ފުރަތަމަ ލަނޑެވެ. އަދި އޭގެ 20 މިނިޓު ފަހުން ޕޭޕް ސާ ވަނީ އިތުރު ލަނޑެއް ކާމިޔާބުކޮށް ދެ ޓީމުގެ ދެމެދުގައިވާ ފަރަގު ބޮޑުކޮށްފައެވެ.
މި މެޗުގެ 14 ވަނަ މިނިޓުގައި ޓޮޓްނަމްގެ ޑިފެންޑަރު މިކީ ވެންޑިވެންއަށް ލިބުނު އަނިޔާގެ ސަބަބުން ކޯޗު ޕޮސްޓެކޮގްލޫއަށް ވަނީ އޭނާ ބަދަލުކުރަން މަޖުބޫރުވެފައެވެ.
މި މެޗުގައި ސިޓީން ލަނޑެއް ޖެހުމަށް ކުރަމުން އައި މަސައްކަތަށް ނިމުމެއް އައިސްފައިވަނީ ފުރަތަމަ ހާފްގެ އިތުރު ވަގުތުގައި ސަވީނިއޯގެ އެސިސްޓަކުން، މެތިއުސް ނޫނެޒް ކާމިޔާބުކޮށްދިން ލަނޑާއެކުގައެވެ. އެކަމަކު ދެވަނަ ހާފްގައި ސިޓީން ލަނޑެއް ޖެހުމަށް ގިނަ މަސައްކަތްތަކެއް ކުރި ނަމަވެސް، އެ ޓީމަށް ވަނީ އެކަން ކާމިޔާބުވާގޮތް ނުވެފައެވެ.
2008 ވަނަ އަހަރު ލީގު ކަޕް ކާމިޔާބުކުރި ފަހުން ޓޮޓްނަމަށް މިހާތަނަށް މުބާރާތެއް ކާމިޔާބު ކުރެވިފައިނުވާއިރު، ސިޓީގެ މައްޗަށް ހޯދި ކާމިޔާބީއާއެކު އެ ޓީމަށް ވަނީ މުބާރާތެއް ކާމިޔާބުކުރުމުގެ އުއްމީދު އާވެފައެވެ.
މި މުބާރާތުގެ ކުއާޓާ ފައިނަލުގައި އަންނަ ޑިސެމްބަރ މަހުގެ 16 ވަނަ ދުވަހު ޓޮޓްނަމް ނިކުންނާނީ ޔުނައިޓެޑާ ދެކޮޅަށެވެ.